Jeremiah 5:27 - Hawaii Pidgin Bible

²⁷ Dey fill up dea houses wit all kine stuff Cuz dey bulai peopo fo get um. Dis jalike one bird catcha dat fill up cages wit birds. Dey come importan an rich.

Jeremiah 5:27 ပူးပေါင်းရင်းမြစ်များ

Job 12:6

Eryting stay quiet inside da tents Wea da guys live dat like bus up eryting. An inside da tents wea da guys live Dat make God come huhu, No mo nobody bodda dem. Az jalike dey carry dea idol kine gods wit dem.

Isaiah 3:14

Da One In Charge da One goin judge da older leadas An da odda ones dat stay lead his peopo. He tell dem, “You, jalike da guys Dat wen bus up my grape fields. All da stuff you guys wen rip off From da peopo dat no mo notting, All dat stuff you guys take um Inside yoa houses.

Jeremiah 12:1

“You, Da One In Charge. You erytime judge da right way Weneva I tell you I get one problem. Still yet, I like talk to you Bout how you tink wass right an wass wrong. How come da bad kine guys come out okay erytime, aah?! How come all da peopo dat you no can trus live one easy kine life?!

Jeremiah 8:5

So! How come dese peopo stay go da wrong road? How come da Jerusalem peopo erytime no come back by me? Dey stay tight wit bulaia kine gods. Da Jerusalem peopo tell, ‘Us guys no goin go back!’

Jeremiah 9:6

Wea you live, erybody bulai erybody. An cuz dey bulai, No way dey goin tell dat I dea God.” Az da message from Da One In Charge.

Hosea 12:9

Da One In Charge tell, “Me, Da One In Charge, yoa God. I wen bring yoa ancesta guys outa Egypt. Bumbye I goin make you guys live inside tents one mo time, Jalike wen yoa ancesta guys make da spesho religious ceremony, Da one Fo Live In Shacks.

Micah 1:12

Da peopo inside Marot, da Bad Taste Town, dey wait fo somebody help dem. Dey suffa, cuz bad kine stuff happen to dem from Da One In Charge. Da army guys dat stay agains us guys stay come all da way By da Jerusalem town gate awready.

Zefaniah 1:9

Dat time, I goin punish Erybody dat jump ova da flat stone Unda da door a da temple Fo show respeck fo dea gods. Dose guys bulai peopo an bus um up, Fo dem fill up dea bosses house Wit stuff dey get From rip off peopo.”

Jesus Show 18:2

Da angel tell wit one loud voice, “Babylon wen get wipe out! Dat big town pau awready! Now inside dea ony get bad kine spirits, An all kine pilau scavenja birds stay hide dea too!