Jeremiah 33:14 - Hawaii Pidgin Bible

¹⁴ Da One In Charge tell: “You know wat?! Da time goin come wen I goin do all da good kine tings I wen promise fo do fo da Israel ohana an da Judah ohana.

Jeremiah 33:14 ပူးပေါင်းရင်းမြစ်များ

Start 22:18

All da diffren peopos all ova da world, bumbye wen dey tink bout da peopos dat come from you, dey goin tell, ‘God do good tings fo us, cuz a da Abraham ohana!’ Dey goin tell dat, cuz today, you wen do wat I tell you fo do.”

Start 49:10

Judah guys goin carry da spesho stick fo show peopo dey da king, Da Judah ohana goin keep dat stick foeva. Till da real owna show up Dass goin be da one Dat da odda peopos goin do wat he tell um fo do.

Isaiah 7:14

Cuz a dat, my Boss goin give you guys one sign. Dis da sign: goin get one young wahine dat neva sleep wit one guy, but layta she goin come hapai, an bumbye dat wahine goin born one boy. She goin call him ‘Immanuel,’ dat mean, ‘God stay wit us guys.’

Jeremiah 23:5

Da One In Charge tell: “An you know wat?! Da time goin come bumbye Wen I goin do dis fo King David: I goin make one guy from King David blood line Come da king. Jalike King David da Root An dis guy da New Branch dat come out from him, One guy dat goin do wass right erytime. He goin be da kine king dat know how come stuff happen. He goin keep all da rules An do wass right inside da land.

Jeremiah 29:10

But dis wat Da One In Charge tell fo real kine: “Wen da time pau fo da Babylon guys stay in charge, az goin be seventy year. Dass wen I goin come by you guys. I goin make happen fo you guys da good kine stuff dat I wen make one promise fo do. I goin bring you guys back dis place.

Jeremiah 31:27

Da One In Charge tell: “Da time goin come wen da Israel an Judah land goin get plenny peopo an animals, jalike I wen throw seed all ova da place.

Jeremiah 32:42

Dis da message from Da One In Charge: “Jalike I wen bring all dis bad kine stuff on top dis peopo, now I da One goin give dem all da good kine stuff I wen promise dem.

Jeremiah 33:9

Den plenny peopo goin know wat kine god me cuz a wat goin happen Jerusalem town. Peopo goin stay good inside, talk good bout me, an respeck me plenny. All da diffren peopos on top da earth goin hear bout all da good kine stuff dat I stay do fo da Jerusalem peopo. Dey goin feel real good, cuz a all da good kine stuff I do fo da peopo inside Jerusalem, an cuz I make eryting come good fo dem.”

Daniel 2:44

“Da time numba four kine govmen get powa, God Inside Da Sky goin set up anodda kine govmen. Dat govmen, no goin come wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

Daniel 9:25

“Know dis an tink plenny bout um: From da time da message come fo go build Jerusalem town one mo time, till one guy come dat God goin pick fo lead da peopo. Dat goin be seven times seven year, an den sixty-two times seven year. Dey goin build Jerusalem town wit open spaces inside an one real strong wall, no matta goin get big trouble dat time.

Amos 9:11

Plus, Da One In Charge tell dis: “Dis peopo dat had King David fo dea king befo time, Now dey all hamajang, jalike one shack ready fo fall down. But goin come da time, I goin fix up dea land jalike was King David time. Jalike da peopo fix one wall dass all broke an fall down, I goin fix dat wall dat was all bus up An put up da tings dat wen broke. I goin build um jalike was befo time.

Micah 5:2

But you peopo from da Efratah ohana Betlehem town, No matta peopo tink da tousans a odda Judah guys Mo importan den yoa ohana! But az Betlehem wea da guy goin come from, Dat goin lead da Israel peopo fo me! He stay from befo time, long time awready.

Malakai 3:1

Da One In Charge, da God Ova All Da Armies, tell dis: “You know wat I goin do? I stay ready fo sen my messenja guy. He goin make ready da road befo I go dea. Da boss guy goin show up Befo you tink he goin come Ova dea inside his Temple! Dat messenja guy da one Dat you guys tell you stay look fo him, He da messenja dat tell bout da deal. An you guys tell, ‘Us guys goin stay real good inside wen he come!’ You neva know, o wat?! Fo shua he goin come!

Luke 10:24

I tell you, Plenny kings an plenny guys dat wen talk fo God wen like see an hear da stuff you guys see an hear, but dey neva see um.”

2 Corint 1:20

Da stuff God wen promise fo do, you guys figga he can do um, o wat?! Jesus tell, “Yeah!” An us guys goin tell, “Az right!” cuz us know wat Jesus Christ wen do. We tell dat fo show how awesome God stay.

Hebrews 11:40

Dass cuz God from befo time had one way mo betta plan fo us guys. Dis plan not ony fo us guys fo come perfeck, but fo dem guys togedda wit us guys come perfeck.

1 Peter 1:10

Da guys dat wen talk fo God long time befoa, wen talk bout da way God stay hemo you guys from da bad kine stuff you guys stay in. Dey wen tell bout how God goin do plenny stuff fo you guys. Dose talka guys wen look hard an check out plenny stuffs fo find out bout da good tings dat goin happen to you guys.

Jesus Show 19:10

An I go down by da angel feets fo show him love an respeck. But he tell me, “No do dat! I ony one worka fo God jalike you an yoa braddahs an sistahs dat tell da trut bout Jesus. Show love an respeck fo God! Cuz da trut bout Jesus, dass wat make da guys dat talk fo God know wat fo tell.”