Jeremiah 3:19 - Hawaii Pidgin Bible

¹⁹ “Da One In Charge tell, ‘Me, I da One wen tell Dat fo shua I like make you guys importan, jalike you my kids. I like give you guys da good kine land dat erybody like live dea Fo stay yoas foeva. Dis place, mo nice looking den da lands da odda peopos get. I wen like fo you guys call me yoa faddah. An I no tink you guys goin dig out from me an no stay tight wit me.

Jeremiah 3:19 ပူးပေါင်းရင်းမြစ်များ

Songs 106:24

Afta dat, da peopo neva like come Inside dis nice land. Dey ack jalike da place no good. Wen God make one promise to dem Dey neva trus him fo do um.

Songs 16:6

Az nice, da stuff you do fo me! I stay real good inside Cuz a wat you give me cuz I yoa kid!

Songs 89:26

He goin tell me, ‘Eh God, you my faddah! You da God fo me. You get me outa trouble cuz you strong Jalike one big rock.’

Smart Guys 3:35

Da peopo dat know wat fo do erytime, Dey goin get plenny respeck. But az diffren, fo da stupid guys wit attitude. Shame, dass all dey goin get.

Isaiah 63:16

But you, you oua Faddah! Cuz no matta Abraham an Israel Dey donno notting bout us guys, You Da One In Charge, you oua Faddah! You da One wen do wat you gotta do Fo get us guys outa trouble from befo time. Cuz dass wat kine god you, An dass yoa name, Get Us Outa Trouble!

Isaiah 64:8

Still yet, Da One In Charge, you oua Faddah. Us, jalike da clay. You, da guy dat make us guys come jalike clay pots. All us guys, you wen make us.

Jeremiah 12:10

“Get plenny leada guys from anodda place Goin wase wat I wen plant. Dey goin walk all ova my field. Dey goin bus up my nice place! (I stay talking bout wat dey goin do to my peopo!)

Jeremiah 3:17

Dat time, peopo goin call Jerusalem ‘Da Place Wea Da One In Charge Put His Throne.’ All da diffren peopos goin come togedda inside Jerusalem fo show me respeck cuz dey know wat kine god me. Dey no goin stay piss off an stay hard head an do bad kine tings jalike dey stay do now.

Jeremiah 3:4

Even now, you guys no mo shame Fo call me fo help. You tell, ‘Eh my faddah, You my fren from small kid time!

Jeremiah 31:20

But Da One In Charge tell: “Da Efraim peopo, dey my kids dat I love! Dey my kids, an dey make me feel good inside. I grumble bout dem plenny times, Still yet, I no foget dem even litto bit! Az why I stay sad inside Cuz I miss dem plenny. I get plenny love an pity fo dem.” Az wat Da One In Charge tell.

Jeremiah 31:9

Dey goin cry all da way hea, An wen I lead dem, dey goin pray plenny. I goin bring dem by da streams dat get plenny watta inside dat time, On top one easy fo go road Wea nobody goin trip an fall down. Cuz I da faddah fo da Israel peopo, An da Efraim ohana, dey jalike my numba one boy.

Jeremiah 33:9

Den plenny peopo goin know wat kine god me cuz a wat goin happen Jerusalem town. Peopo goin stay good inside, talk good bout me, an respeck me plenny. All da diffren peopos on top da earth goin hear bout all da good kine stuff dat I stay do fo da Jerusalem peopo. Dey goin feel real good, cuz a all da good kine stuff I do fo da peopo inside Jerusalem, an cuz I make eryting come good fo dem.”

Jeremiah 5:7

Da One In Charge tell: “How come you Jerusalem guys tink I gotta let you guys go? Yoa kids wen dig out from me. Wen yoa kids make one promise, Dey call out to da gods dat not gods fo real kine, Fo make shua dey goin do wat dey wen promise fo do. I da One give dem eryting dey need. But dey fool aroun wit da wahines dat not dea wife, in front da odda gods. Dey all go togedda to da houses wea da wahines stay Dat fool aroun fo get money fo da odda gods.

Ezekiel 20:6

Dat day I make one strong promise to dem: ‘I goin bring you guys outa Egypt fo go one land I wen pick fo you. Az one land dat get plenny milk an honey, da mos beautiful land from all da odda lands.’

Daniel 11:16

“Da Syria king dat fight dem goin do wateva he like do. No goin get nobody from da Egypt army can fight da Syria army. Da Syria king goin take ova da Israel land dat mo nice looking. An he goin get da powa fo wipe out dat whole land.

Daniel 11:41

He goin attack da Beautiful Land too. He goin make plenny trouble in plenny lands an kill dea peopo, but Edom, Moab, an da leada guys inside Ammon, dey no goin come unda his powa.

Daniel 11:45

He goin put up his king kine tents wit da Mediterranean Sea makai side, an da nice looking mountain dat stay spesho fo God, mauka side. But den, he goin mahke, an no goin get nobody dea fo help him.”

Daniel 8:9

From one a da four horns, anodda horn start fo grow up dat start small, but come mo strong. He grow to da south an da east, an to da beautiful Israel land.

Hosea 11:8

“You Efraim peopo, no way I goin tell you guys ‘Laytas!’ No way I goin give you Israel peopo to anodda god! No way I goin wipe out you guys jalike I wen wipe out Admah town! O Zeboim town! Now I wen change my mind, Az why now I feel all kine love an pity fo you guys!

Galatia 3:26

All you guys God kids cuz you trus Jesus, God Spesho Guy.

Efesus 1:5

From befo time, God make plan fo eryting. He make one plan fo hanai us into his ohana, an fo Jesus Christ make all dat happen. Dass wat God like an dass wat make him stay good inside.

Rules Secon Time 14:1

You guys da peopo fo yoa God, Da One In Charge. So no go cut yoa body o shave da front a yoa head wen somebody mahke jalike odda peopos do.

Hebrews 10:39

Us guys not da kine peopo dat stay sked an lose fight. Dose kine peopo goin come wipe out. But us guys, we da kine peopo dat trus God, an cuz a dat, us goin get da kine life dat stay fo real kine.

1 Peter 1:17

Wen you guys talk to God az jalike he yoa Faddah. He da Judge dat check out wat erybody do, an he no like one guy mo betta den anodda. Dass why you guys gotta show plenny respeck fo God fo eryting you do hea inside dis world.