Jeremiah 25:37 - Hawaii Pidgin Bible

³⁷ Da places wea da sheeps stay Wea eryting stay quiet, Dose places goin come all wipe out. Cuz Da One In Charge stay real huhu An he goin burn up eryting.

Jeremiah 25:37 ပူးပေါင်းရင်းမြစ်များ

Songs 97:1

Da One In Charge, he da king! I like erybody inside da world Stay good inside cuz a dat! I even like all da islans Go dance an sing!

Isaiah 32:14

Erybody goin go way from da palace An leave da big town Dat wen get plenny noise befo time. Da hill wit da strong wall an da towas Goin get pukas an caves inside. Da wild donkeys goin like live dea Cuz no mo peopo, An da goats goin get food fo eat ova dea.

Isaiah 66:15

Cuz you know wat?! Wen Da One In Charge come, he goin come wit fire! His war wagons goin come Jalike one strong wind storm! He goin come fo pay back Da peopo he stay real huhu wit. He goin bring da big fire Fo tell um no do bad kine tings.

Jeremiah 12:10

“Get plenny leada guys from anodda place Goin wase wat I wen plant. Dey goin walk all ova my field. Dey goin bus up my nice place! (I stay talking bout wat dey goin do to my peopo!)

Jeremiah 12:13

Da peopo goin plant wheat But ony thorns dey goin harves. Dey bus ass an come tired, But dea work no goin help dem notting. I like fo dem come shame cuz no mo wheat fo harves, Cuz Da One In Charge stay real huhu wit dem!”

Jeremiah 13:20

Look, you Jerusalem guys! You no can see Da army guys dat stay come from da north side, o wat?! So! Wea da peopo Da One In Charge tell you fo take kea dem?! Dey jalike uku pile a sheeps An you guys wen talk big bout dem!

Jeremiah 25:36

Da sheep guys stay yell fo help! Da ones dat own da sheeps stay scream fo help! Cuz Da One In Charge stay wipe out dea grass fields.

Jeremiah 5:17

Dey goin eat up all da food you guys harves, An all da odda food you get. Dey goin kill all yoa kids. Dey goin eat all yoa cows, sheeps, an goats. Dey goin eat all yoa grapes an figs. No matta you guys trus da big towns dat get strong wall fo proteck you, Dey still goin wipe out all da peopo inside da towns wit dea swords.”

Hebrews 12:29

You know, jalike da Bible tell, “Oua God, he jalike one fire dat burn up eryting.”