Jeremiah 20:12 - Hawaii Pidgin Bible

¹² Da One In Charge, you da God Ova All Da Armies. You tes da peopo dat do da right ting. You know how dey feel an how dey tink. I like see you pay back dose odda guys, Cuz I wen tell you eryting bout da problem I get.

Jeremiah 20:12 ပူးပေါင်းရင်းမြစ်များ

2 Records 24:22

King Joash foget awready dat Zekariah faddah Jehoiada wen stay tight wit Joash befo time, but King Joash kill Jehoiada boy Zekariah. Wen Zekariah stay die, he tell, “I like Da One In Charge see dis an make you pay fo um.”

Songs 11:5

Da One In Charge, he look good on da peopo dat do wass right, An on da peopo dat do real bad kine stuff too. Deep inside, he hate da peopo Dat like bus up odda peopo.

Songs 139:23

Eh, God! Check me out Fo see how I stay deep inside. Go tes me, an know wat tings I tink bout dat bodda me.

Songs 17:3

You look inside me, An you know how I tink. Nite time, you come by me Fo tes me An see if get anyting pilau inside me, So you know no mo notting wrong. I make up my mind fo no tink bad kine tings. No way notting pilau goin come outa my mout,

Songs 54:7

You get me outa All kine trouble awready, An I wen see awready wat you do Bout da peopo dat stay agains me.

Songs 58:10

Da peopo dat stay do wass right, Wen dey see dat God Pay back da bad guys Fo wat dey wen do, Dey goin come real good inside. Jalike God goin get his feets wet Wit da blood from da bad guys.

Songs 59:10

Da God dat erytime stay tight wit me, He goin show up wea I stay Fo help me. Da peopo dat scope me out fo attack me, God goin let me see Wat he goin do to dem.

Songs 62:8

Eh you peopo! Trus God foeva! Tell him eryting you tink bout! God, he da One Stay hide us guys from trouble. (Time out fo da music.)

Songs 7:9

Cuz you da God dat do wass right erytime, An tes wat peopo tink An judge how dey stay inside. Make da peopo dat stay do bad tings, Fo no do um no moa! Make da peopo dat stay do wass right, Come strong an solid.

Songs 86:4

You my Boss, so make nice to me, Cuz I trus you fo eryting inside.

Isaiah 37:14

Afta Hezekiah read da letta da messenja guys bring, he go up to da Temple Fo Da One In Charge. He spread out da letta in front Da One In Charge.

Isaiah 38:14

I make noise jalike da swallow bird o da heron bird. An make sad kine noise jalike one dove. I try fo look up to you in da sky, But my eyes too tired, I can ony look down. I get plenny presha! Help fo take kea me, my Boss!

Jeremiah 11:20

But you, Da One In Charge, da God Ova All Da Armies, you judge peopo da right way. You know how erybody feel an how erybody tink. I wen tell you eryting fo you take kea me cuz you da Judge. Az why I like you pay back da peopo dat stay make one plan fo kill me.

Jeremiah 12:8

Da peopo dat stay mines Come afta me Jalike one lion inside da fores. Jalike da lion stay make big noise at me. Az why I make to dem jalike I hate dem.

Jeremiah 17:10

“Me, Da One In Charge, I da One dat know wat erybody tink. I tes how dey feel inside an wat dey like, So dis wat dey goin get from me fo wat dey do: Good if dey do good kine, O bad if dey do bad kine.

Jeremiah 17:18

“Da guys dat stay come afta me, I like you make dem come shame, But no make me come shame. Bum dem out, but no bum me out. Make bad kine stuff happen to dem, An bus um up, ova an ova!”

1 Peter 2:23

Wen dey tell any kine to him, he neva ansa back. Wen he suffa, he neva tell he goin pay um back. But he let God da Judge take kea all dat cuz he know God do da right ting.

1 Peter 4:19

Wen God peopo suffa, an dey handle um da way he like um fo handle, dey can trus God fo take kea dem. He wen make dem, an he do wat he tell he goin do erytime. An dey still yet goin do good kine stuff, jalike befo time.

Jesus Show 18:20

Den I hear dis: “Eh! All you peopo dat stay wit God inside da sky, Stay good inside bout wat wen happen! God spesho peopo, an da guys dat God wen sen all ova, An da guys dat talk fo God, Stay good inside! Da Babylon peopo wen make any kine to you guys, But God wen come fo judge dem!”

Jesus Show 2:23

Fo shua, I goin kill erybody dat make jalike her. Den all da church peopo goin know dat I da One dat look inside da heart an da head an know wat erybody stay like, an wat dey tink, an I goin pay erybody fo wat dey do, good o bad.

Jesus Show 6:10

Da peopo spirits talk loud, an tell, “Eh, you Da One In Charge! You get all da powa! You spesho, an you tell da trut! How long mo we gotta wait till you come fo judge all da peopo hea on top da earth an punish dem? Cuz dey wen kill all us guys!”

1 Samuel 1:15

Hannah tell um, “Oh, mista, sorry, aah? Az not how stay! I not piloot! I neva drink notting! Me, I jus one wahine dat donno wat fo do! So I stay pray real hard hea in front Da One In Charge. I tell him all my pilikia.