Jeremiah 2:8 - Hawaii Pidgin Bible

⁸ Da pries guys neva aks, ‘Wea Da One In Charge stay?’ Da guys dat suppose to know da Rules fo shua, Dey donno me fo real kine. Da guys dat suppose to take kea da peopo, Dey like beef wit me. Da guys dat suppose to talk fo me, Dey talk fo da god Baal. Dey stay tight wit da idol kine gods Dass good fo notting.”

Jeremiah 2:8 ပူးပေါင်းရင်းမြစ်များ

1 Kings 18:22

Den Elijah tell da peopo, “Me, I da ony guy dat talk fo Da One In Charge dat neva mahke. But Baal, he get 450 guys dat talk fo him.

1 Kings 18:29

Aftanoon time, dey do same ting. Dey make jalike da guys dat talk fo Baal suppose to make, spazzing out till evening time, wen time fo make da regula kine sacrifice. But Baal no do notting, nobody tell dem notting, nobody lissen dem.

1 Kings 18:40

Den Elijah tell da peopo, “Grab da guys dat talk fo Baal! No let even one a dem run away!” Da peopo grab dem. Elijah tell da peopo go take um down by da Kishon Stream, an he kill um all dea.

Job 35:10

But wen dey yell lidat, nobody aks, ‘Wea God stay, da One dat make me? Cuz him da One dat gimme songs nite time.

Isaiah 28:7

But nowdays, even dose guys Fall down cuz dey drink too much wine An no can walk good cuz a da beer! Even da pries guys an da guys dat talk fo God, Dey fall down cuz a da beer An no can figga right cuz a da wine. Wen God like show um someting jalike one dream, Dey no undastan um an dey tell um az wrong Wen dey gotta judge wass right an wass wrong, Dey no can do um, cuz dey stay jam up.

Isaiah 29:10

Cuz jalike Da One In Charge wen make you pass out an sleep! You guys dat talk fo him, He shut yoa eyes real good. You guys dat can see wat goin come bumbye, Jalike he wen cova yoa head wit one cloth.

Isaiah 30:5

Erybody dat tell da Pharaoh guy fo help dem Goin come shame. Cuz da Egypt peopo no can do notting good fo dem. Dey no goin help dem, Dey no goin do notting good fo dem. Dey ony goin make da Judah peopo come shame, An make fun a dem!”

Jeremiah 10:21

Da leada guys dat suppose to help da peopo, Dey jalike sheep guys Dat donno notting. Dey no go find out from Da One In Charge wat fo do. Az why dey no ack jalike peopo dat know wat dey stay do. Da peopo dey suppose to lead Go all ova da place, jalike sheeps.

Jeremiah 12:10

“Get plenny leada guys from anodda place Goin wase wat I wen plant. Dey goin walk all ova my field. Dey goin bus up my nice place! (I stay talking bout wat dey goin do to my peopo!)

Jeremiah 16:19

Me, Jeremiah, I pray lidis: “Eh, you Da One In Charge. You da One make me strong! You give me one strong place fo hide! I can run away dea wen get trouble! All da nations all ova da world goin come by you From da mos far places inside da world. Dey goin tell, ‘Fo shua, oua ancesta guys ony get bulaia kine gods, Idol kine gods dat good fo notting. Da idol kine gods neva help dem.’

Jeremiah 18:18

Some peopo tell: “Eh come! We go make one plan fo kill Jeremiah. Dat way, we not goin throw out da rules da pries guys teach, o throw out wat da guys dat know wat fo do erytime tell us fo do, o throw out da tings da guys dat talk fo God tell. So we goin poin finga Jeremiah an tell wat he do wrong. We no goin lissen him notting!”

Jeremiah 2:11

All dose peopos, dey neva dump dea gods dat dey get from befo time. No matta da gods dey get, dey not gods fo real. But my peopo, dey wen bag from me, Da God dat make dem come awesome, Fo go pray to idol kine gods dat good fo notting!

Jeremiah 2:6

Dey neva even tink fo aks, ‘Wea Da One In Charge stay, Da One dat wen bring us guys hea outa Egypt? He da One wen bring us guys thru da boonies Wea up country eryting dry, An get plenny gulch wea no mo watta, An get real dark kine place wea can mahke. Wea no mo nobody go thru dea, An no mo nobody live ova dea.’

Jeremiah 4:22

Da One In Charge tell, “My peopo, dey do bad kine stuff an no bodda dem. Dey donno who me. Dey jalike kids dat no tink. Dey no undastan notting. But dey real smart fo do bad kine stuff, Dey donno how fo do good kine stuff!”

Jeremiah 5:31

Da guys dat tell dey talk fo God, Wateva dey tell, dey bulai. Da pries guys make da kine rules dey like. An my peopo like fo eryting stay lidat. But how you guys goin handle Wat goin happen cuz a dat, aah?”

Jeremiah 7:8

But you know wat?! You guys still stay trus da tings peopo tell you dat no stay true! No goin help you guys notting!

Jeremiah 9:14

But da way dey live, dey ony hard head fo wateva dey like do. Dey pray to da Baal kine idol gods, jalike dea ancesta guys wen teach um.

Ezekiel 22:26

Da pries guys ova dea bus up da rules I teach an make da tings dat stay spesho fo me come pilau. Da stuff dass spesho fo me an da stuff dat no stay spesho fo me, dey no teach dass diffren. Dey teach dat no mo diffrence wit da pilau kine stuff dat make peopo so dey no can come in front me, an da stuff dat make peopo fo dem come in front me. Dey make jalike dey donno dat my Res Days stay spesho fo me. Az why dey make da peopo tink I no good an spesho.

Ezekiel 34:2

“Eh! Fo Real Kine Guy! Go talk fo me agains da sheep guys inside Israel. Talk fo me, an tell um dis: ‘Dis wat Da One In Charge, da Boss, tell: Ahanas you Israel sheep guys! Bad tings goin happen to you! Az cuz you guys feed ony you! Eh you sheep guys! You suppose to feed da sheeps an da goats!

Hosea 4:6

My peopo stay coming wipe out Cuz dey donno me. An cuz you pries guys no like know me, Az why I no like let you guys be my pries guys. You guys foget da teaching Dat come from me, yoa God, Da One In Charge, Az why I goin foget yoa kids.

Habakkuk 2:18

“Peopo carve tiki kine gods, But da idols no can do notting fo dem! One metal kine god ony can bulai! Da guy dat make um trus da ting he wen make! He make idol kine gods dat no can even talk.

Matthew 16:26

Poho fo one guy get eryting inside dis world, but da guy end up cut off from God foeva, an no mo da real kine life inside. You tink you rich enuff fo buy back yoa life?

Luke 11:52

“Wassamatta you teachas dat teach da Rules From God?! You guys goin get it! You guys donno wat God tell, an you no let da peopo dat like know wat he tell find out. Jalike you guys take away da key fo open da door fo peopo know wat God stay tell!”

John 16:3

Dey goin make lidat to you guys cuz dey donno my Faddah an dey donno me.

John 8:55

But you guys donno him. I know him. If I tell dat I donno him, den I bulai, jalike you guys. But I know him, an I do wat he tell me fo do.

2 Corint 4:2

Dis wat we do: we tell erybody we no goin do da bad kine stuff some odda peopo do. Dey do um wen nobody see um do, an dey no shame. We no try bulai nobody. We no try teach fake kine stuff bout wat God tell. We teach da true stuff fo erybody see wat kine guys us, how God see us.

Rules Secon Time 33:10

Da Levi guys teach yoa rules to da odda Jacob peopo, (Az da Israel peopo), An dey teach how you make diffren kine To da good peopo an da bad peopo. Da Levi guys burn incense in front you, An make burn up kine sacrifices on top yoa altar.

1 Samuel 12:21

Mo betta hang in dea wit Da One In Charge. No go wit da idol kine gods cuz dey no mo notting inside! Dey no can do notting good fo you guys. Dey no can get you guys outa trouble cuz dey notting.

1 Samuel 2:12

Eli boys, cuz dey no mo respeck fo Da One In Charge, dey pilau kine guys an dey do bad kine stuff.