Jeremiah 17:7 - Hawaii Pidgin Bible

⁷ “But fo da guys dat trus me, Da One In Charge, An stay shua I goin do wat I tell um I goin do, I goin do good kine stuff fo dem.

Jeremiah 17:7 ပူးပေါင်းရင်းမြစ်များ

Songs 125:1

Da peopo dat trus Da One In Charge, Dey stay solid all da time, Jalike Mount Zion, Dat no move an stay solid.

Songs 146:5

Whoevas get da God Dat Jacob wen pray to fo help dem, Dey can stay good inside. Dey stay shua dat bumbye Da One In Charge goin do Good tings fo dem, Cuz he da God fo dem.

Songs 2:12

Go down in front da king An show respeck. Cuz if you guys no like do dis, Watch out! Cuz if you make him come huhu Even litto bit, Right den an dea, you guys Goin come wipe out, Cuz he come huhu real quick! But all da peopo dat let God Take kea dem, Dey stay good inside.

Songs 20:8

All dem odda guys, dey go down on dea knees an come wipe out, But us guys, we help each odda fo stan up, cuz us da winnas!

Songs 34:8

Go check out Da One In Charge! You, find out fo real kine How good he stay! Anybody dat let Da One In Charge Hide dem from trouble, Dey stay good inside!

Songs 40:4

Da peopo dat trus Da One In Charge, Dey stay good inside. Dey no need aks fo help From da peopo dat ack big head, O dat lissen to da bulaia guys.

Songs 71:5

You my boss, an I stay shua Dat bumbye you goin do Good tings fo me. Eh! You Da One In Charge! From da time I was one young boy, I still stay trus you.

Songs 84:12

Eh! You Da One In Charge! You da Boss Ova All Da Armies! Erybody dat stay trus you, Dey stay good inside!

Smart Guys 16:20

Anybody lissen real good To da guys dat know wat fo do erytime, Dey goin come out okay. Anybody stay trus Da One In Charge, Dey can stay good inside.

Isaiah 30:18

Dass how come Da One In Charge stay wait, Cuz he stay ready fo do good tings fo you guys. He goin stan up Fo show you guys pity an love. Cuz Da One In Charge, he da kine god Dat judge da right way erytime. An all da peopo dat stay wait fo him, Dey can stay good inside.

Isaiah 61:3

Da One In Charge sen me fo help da peopo Mount Zion side Dat stay sad inside. He tell me fo give dem One nice haku lei fo put on top dea head, An take away da ashes. An make dem stay feel good inside wit perfume Fo dem no stay sad inside no moa. He sen me fo give um one nice robe fo wear Dat make erybody like tell, “Da One In Charge, da greates!” So dea spirit no feel jalike dey lose fight no moa. Dey goin show dat Da One In Charge make dem get um right wit him, Jalike dey strong oak trees dat Da One In Charge wen plant Fo show how awesome he stay.

Jeremiah 39:18

Fo shua, I goin get you outa dea. You no goin mahke from da war. Da prize you goin get from da war, goin be dis—you goin stay alive cuz you trus me!’ Az wat Da One In Charge tell.”

Daniel 3:28

Den King Nebukadnezzar tell, “Erybody gotta tell good tings bout da God dat Shadrak, Meshak, an Abednego pray to. Dat God wen sen his angel messenja guy fo get his worka guys outa da real hot oven fire place. Dey trus dea god, no matta dey go agains wat I tell dem fo do. Dey no sked mahke, an dey no goin work fo anodda god o go down in front anodda god. Dey like ony work fo an go down in front dea own god.

Zefaniah 3:12

But I goin let da peopo stay inside Jerusalem Dat stay suffa, an no mo notting. But dey trus me Da One In Charge, Fo take kea dem.

Efesus 1:12

God do all dat, cuz he like fo us guys dat trus Christ firs, show da oddas how awesome God stay. Den da odda peopo goin tell how awesome he stay too.