Jeremiah 15:3 - Hawaii Pidgin Bible

³ Da One In Charge tell: “I goin sen four kine tings fo wipe dem out: guys wit swords fo kill dem, da dogs fo drag da bodies out, da birds inside da sky, an da wild animals inside da fields fo eat um up an wipe um out.

Jeremiah 15:3 ပူးပေါင်းရင်းမြစ်များ

Songs 68:23

Cuz a dat, you my peopo Goin get yoa feets wet Wit da blood from da ones Dat stay agains you, An yoa dogs goin lick up Da blood from dea bodies.”

Isaiah 18:6

Eh, I stay talking bout Assyria, you know! All dea army guys goin mahke an dea bodies stay dea, Jalike God wen prune um. All thru da summa time, da scavenja birds from da mountains goin eat dea bodies, An all thru da winta time, da wild animals goin eat um.

Jeremiah 12:9

Da peopo dat stay mines, Dey come jalike one scavenja dat like eat me. Jalike get wild hyenas, Wit scavenja birds all aroun um. Go bring all da wild kine animals fo eat up my peopo!

Jeremiah 14:12

No matta dey skip food wen dey pray, I no goin lissen wat dey yell to me fo do. No matta dey make burn up kine sacrifices an wheat an barley kine sacrifices, I had it wit wat dey stay do. I goin be da One dat goin wipe dem out cuz a da war, an cuz dey no mo food, an cuz a da real bad kine sick.”

Jeremiah 14:16

An da peopo dat lissen dem, dey goin mahke too inside Jerusalem, cuz dey no mo food, an da army guys goin kill dem wit swords too. Da army guys goin throw out da mahke bodies on top da streets. No goin get nobody fo bury dem, o dea wifes bodies, o dea boys bodies, o dea girls bodies. I goin make all da bad kine stuff dey do happen to dem.

Jeremiah 16:4

“Dey goin mahke cuz a all bad kine sick. No mo nobody goin stay sad inside an cry fo dem. No mo nobody goin bury dem. Dea mahke bodies goin lay on top da groun jalike rubbish. Dey goin mahke from da war, an cuz no mo food. Dea mahke bodies goin come food fo da birds an da wild animals.”

Jeremiah 7:33

Den, da mahke peopo bodies dat no mo room fo bury goin come food fo da birds an da wild animals, an no mo nobody goin make dem sked fo dem run away.

Sad Song 3:11

He block my road an bus me up. He put me wea nobody goin help me.

Ezekiel 14:21

“Cuz dis wat me Da One In Charge, da Boss, tell: Fo shua, goin be mo worse fo da peopo inside Jerusalem wen I sen da four bad kine tings agains dem cuz I da Judge: war, no mo food, wild kine animals, an da real bad kine sick. Den da peopo an dea animals goin mahke.

Ezekiel 33:27

“Dis how I like you talk to dem: ‘Dis wat me Da One In Charge, da Boss, tell: Fo shua I stay alive, an fo shua da peopo dat stay inside da towns dat stay all wipe out, dey goin get kill wit swords. Da peopo dat live in da boonies, I goin give dem to da wild animals fo eat. An da peopo dat live wea get strong wall inside da mountains an da caves, dey goin mahke from da real bad kine sick.

Prieses 26:16

If you guys make lidat, den fo shua I goin do dis to you guys: Right den an dea I goin make you guys come real sked. I goin give you guys da kine sick dat you no goin come good, an wit fever dat goin make you guys eyes come so you no can see, an make you guys weak, an den you goin mahke. You guys goin plant seed fo notting, cuz da peopo dat stay agains you guys goin eat da food dat grow dea.

Prieses 26:22

I goin sen wild kine animals agains you guys. Dey goin kill yoa kids, an wipe out yoa cows. Dey goin make you guys come ony litto bit peopo, den no mo nobody goin walk on top da roads inside yoa land.

Prieses 26:25

An I goin bring army guys wit swords agains you guys. Dass how I goin pay back you guys, cuz you guys broke da deal I wen make wit you guys. Wen you guys go back inside yoa towns, I goin sen bad kine sick on top you guys. An da guys dat stay agains you guys goin take ova.

Amos 5:19

Fo you guys, goin be jalike dis—you go run away from da lion, An anodda kine wild animal goin catch you from da odda side! Den you go inside yoa house, An put yoa hand on top da wall fo res, An da snake bite you!

Rules Secon Time 28:26

Wen you guys mahke, yoa mahke bodies goin come food fo all da birds inside da sky an da animals on top da earth, an no mo nobody goin chase um fo dem go way.

Rules Secon Time 32:24

I goin make dem come skinny Cuz dey no goin get food. Dey goin get one real bad kine sick Dat make dem feel jalike da sick stay eat um up. I goin make um feel real bad Befo I wipe um out! I goin tell da wild animals fo bite dem, An sen da poison kine snake Dat crawl aroun on top da dirt.

Jesus Show 6:8

I look, an eh! Had anodda horse. Look jalike ready-fo-mahke kine color! Da guy dat stay ride on top um get da name Mahke Die Dead, an da boss fo da Mahke Peopo Place follow behind him. Dey get da powa fo wipe out bout one quarta a da peopo inside da world cuz get war, cuz no mo food, cuz erybody sick, an cuz da wild animals kill um.