Jeremiah 14:7 - Hawaii Pidgin Bible

⁷ Den dis how us guys pray: “I know us guys wen do wass wrong, An az why all dis stuff happen. You Da One In Charge. Try do someting fo show wat kine god you, Cuz us guys wen run away from you An do plenny bad kine stuff agains you.

Jeremiah 14:7 ပူးပေါင်းရင်းမြစ်များ

Ezra 9:15

You Da One In Charge. You da God fo da Israel peopo. You do wass right erytime. Some a us guys come back hea now, afta we get outa trouble Babylon side. Us guys wen jam up real plenny ova hea. We no can even stan in front you cuz a da shame we get fo wat we wen do!”

Songs 115:1

Eh! You Da One In Charge! No need fo somebody Tell good tings bout us guys. Mo betta, peopo tell good tings Bout wat kine god you! Cuz you da One dat do Awesome kine stuff! Cuz you stay tight wit yoa peopo, An you da kine God Dat us guys can trus.

Songs 25:11

Eh! You Da One In Charge! Cuz you like erybody know Wat kine god you, Az why you let me go From all da bad kine stuff I wen do, An you hemo my shame too. Eh, get real plenny bad tings dat I wen do, you know!

Songs 79:9

You da God dat stay get us outa trouble, So help us! Den peopo goin know wat kine god you An how awesome you stay. Get us outa trouble, an let us go. An hemo da shame fo da bad tings Us guys wen do! Den peopo goin know Wat kine god you.

Isaiah 48:11

I do all dis cuz a who me, Cuz no way I goin let peopo ack Like I not good an spesho. I da Awesome One, An I no goin let nobody tink Dat anodda god can do wat I do.”

Isaiah 59:12

Da One In Charge, da way you see um, Plenny time us guys go agains you. An all da bad kine stuff us wen do, Dat stay agains us in front da judge. Cuz us guys stay go agains you, An da blame fo dat stay wit us foeva. An us know awready, az true Dat cuz a da tings us wen do, God gotta punish us.

Jeremiah 10:19

Da Jerusalem peopo yell: “Bummahs! I stay sore big time! Wea dey wen wack me stay mo worse. But I tink, ‘Fo shua, dass how sick I stay, An I gotta try handle.’

Jeremiah 2:19

Da bad kine stuff you guys do, Dass wat goin punish you guys. Da way you guys make deaf ear to me, Dat show proof awready dat you guys stay wrong. Try tink hard, an you goin know Dat eryting come real bad fo you guys, Jalike you haunas! Az cuz you guys bag from me, yoa God, Da One In Charge, An no show respeck fo me.” Dass da message from Da One In Charge, da God Ova All Da Armies.

Jeremiah 3:25

Us no goin show face cuz we get plenny shame. Us goin come bum out cuz no mo nobody get respeck fo us! Us an oua ancesta guys, all us wen do bad kine stuff Agains oua God, dass Da One In Charge a us. We do all dat from small kid time till now. We neva lissen wat oua God, dass Da One In Charge a us, tell us!’ ”

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 5:25

But cuz you guys stay do wass wrong, Da time fo rain an da time fo harves food no goin come. An cuz you guys stay do bad kine stuff, Da good kine stuff no goin happen fo you guys.

Jeremiah 5:6

Az why da lions from da fores Goin attack dem. Da wild dogs from da up country boonies goin wipe um out. Da leopards goin wait fo dem nea da towns Fo jump whoeva go outside. Dis goin happen cuz dey go agains me ova an ova, An dey go da wrong way plenny times.’ ”

Jeremiah 8:14

Da peopo goin tell, “How come us guys stay sit in dese small towns?! Go come, us go run away togedda To da towns dat get one strong wall. Fo shua us goin mahke ova dea, Cuz oua God, dass Da One In Charge a us, tell we goin mahke. Jalike he give us poison watta fo drink Cuz we wen do bad kine stuff agains him.

Jeremiah 8:5

So! How come dese peopo stay go da wrong road? How come da Jerusalem peopo erytime no come back by me? Dey stay tight wit bulaia kine gods. Da Jerusalem peopo tell, ‘Us guys no goin go back!’

Ezekiel 20:14

But cuz I get one good rep, az why I make shua da odda peopos aroun dem no give me one pilau name. Cuz dose odda peopos see wat I do, da time I bring da Israel peopo outa Egypt.

Ezekiel 20:22

But I neva do all dat cuz I get one good rep. Az why I make shua da odda peopos aroun dem no give me one pilau name cuz a who me. Cuz dey see wat wen happen wen I bring da peopo outa Egypt.

Ezekiel 20:9

But fo keep my good rep, I make shua da odda peopos aroun dem no give me one bad rep. Cuz dose odda peopos see wat I do, da time I let da Israel peopo see me an I bring um outa Egypt.

Hosea 5:5

“Da Israel peopo get big head, Dat show dat dey get da blame. Da Efraim peopo an da odda Israel peopo, Jalike dey trip an fall down wen dey do bad kine stuff. An da Judah peopo trip an fall down wit dem.

Hosea 7:10

Da Israel peopo get big head, Az why erybody know dey lose face. But no matta, still yet dey no come back to me. Dey no look fo me, dea God, Da One In Charge.

Amos 7:2

I figga, ‘Wat goin happen wen dem grasshoppas eat up da green plants all ova da land?’ “Den I tell God, ‘Bummahs, God! Yeah, you da Boss! But I tell you, try hemo oua shame fo da bad kine stuff we wen do, an let us go. Cuz if you no like let us go, no way us Israel peopo goin stay alive. Oua Jacob ohana, no mo powa, you know!’

Micah 7:9

I gotta hang in dea now, Cuz Da One In Charge stay huhu an goin punish me, Cuz I wen do bad kine stuff agains him. But afta dat, he goin talk fo me in front da judge, An make right all da bad kine stuff Dat da guys dat stay agains me wen do. Jalike he goin bring me out wea get light, An I goin see dat he stay do wass right.

Efesus 1:12

God do all dat, cuz he like fo us guys dat trus Christ firs, show da oddas how awesome God stay. Den da odda peopo goin tell how awesome he stay too.

Efesus 1:6

God like his kids fo tell how awesome all da good kine tings he stay do fo us. God do good tings fo us cuz we stay tight wit Christ, an God get plenny love an aloha fo Christ.

Rules Secon Time 32:27

But bodda me plenny, dat maybe Da peopo dat stay agains da Israel peopo Goin talk bad bout dem Cuz dey no undastan, An cuz a dat, dey goin tell, ‘Us guys strong! Az why we wen win ova dem! Da One In Charge neva do all dis!’

Joshua 7:9

Da Canaan peopo an da odda peopo inside da land goin hear bout dis, an dey goin make one circle aroun us an wipe us out. Den us no goin be no moa! Den wat you goin do fo show peopo dat you get powa?”