James 3:13 - Hawaii Pidgin Bible

¹³ You tink get somebody dat smart an know wat fo do erytime? Kay den. Da guy betta do da right ting erytime, fo him show proof dat he get da smarts from God fo know wat fo do, an he no need be da numba one guy.

James 3:13 ပူးပေါင်းရင်းမြစ်များ

Job 28:28

An he tell da peopo, ‘You know wat?! If you get choke respeck an stay sked a da Boss Up Dea, Den you goin know wat fo do erytime! An if you stay away from da bad kine stuff, Dat goin show you undastan plenny!’ ”

Songs 107:43

Da peopo dat know wat fo do erytime Good dey stay do all dis stuff, An tink plenny bout how God stay tight wit his peopo!

Songs 122:8

Cuz I love my ohana guys an frenz Dat live Jerusalem, I tell, “I like eryting come good Fo all you Jerusalem peopo.”

Songs 149:4

Do dat, cuz Da One In Charge Feel real good bout his peopo, Da ones dat know dey no need Go firs erytime. Da One In Charge make dem da winnas, An make um come awesome.

Songs 25:9

Da peopo dat no tink Dey gotta be numba one erytime, He show dem how fo go da right way. He teach dem his way fo do tings.

Songs 45:4

You da winna erytime! Az why you get respeck! Az why wen you ride on top yoa horse Cuz you da leada guy, You fight fo show Dat peopo can trus you. An you show dat you no mo big head Wen you do wass right. I like fo you use yoa strong powa Fo do awesome kine tings.

Teacha 8:1

So, wat you tink?! Get guys dat know fo real kine wat fo do erytime?! You figga get guys dat know wat tings mean, o wat?! One guy dat know wat fo do erytime, his face goin show dat, Cuz no goin look jalike he huhu.

Teacha 8:5

Whoeva do wat da king tell um fo do, no mo notting bad goin happen to dem. Da guy dat know wat fo do erytime, he goin know wat he gotta do an wat time fo do um.

Isaiah 29:19

Da peopo dat no need be numba one all da time Dey stay feel good inside one mo time Cuz dey stay tight wit Da One In Charge. Da peopo dat no mo notting goin dance an sing Cuz dey stay tight Wit da God fo da Israel peopo, Da One dat stay good an spesho.

Isaiah 60:6

Goin get real plenny camels all ova yoa land. Young camels from da Midian an Efah peopos, Dey all goin come from Yemen An bring gold an incense, Fo tell erybody dat Da One In Charge stay good.

Isaiah 61:1

Da Spirit from my Boss, Da One In Charge, He stay in charge a me, Cuz he wen put oil on top my head Fo show he pick me. He sen me fo tell good kine stuff To da peopo dat odda peopo tink not importan, An fo help da peopo dat feel all bum out Fo dem feel good inside one mo time, Fo tell da ones da army guys wen take to dea country, Dey can go home now, An fo tell all da prisona guys, Da prison stay open now fo dem go.

Jeremiah 9:12

Nobody stay smart enuff fo undastan all dis! No mo nobody dat Da One In Charge wen teach fo da guy tell wat all dis mean! How come da land stay all wasted an burn up jalike da boonies fo no mo nobody go thru dea?!

Jeremiah 9:23

Dis wat Da One In Charge tell: “Da guy dat know wat fo do erytime No good fo him talk big dat he know wat fo do. Da guy dat know how fo fight No good fo him talk big dat he know how fo fight. Da rich guy, no good if him talk big bout how rich him.

Daniel 2:21

He change wass goin happen, Now an bumbye. He make some kings come solid, An throw out some odda kings. Da guys dat know wat fo do erytime, He make um know even mo betta wat fo do. Fo da guys dat undastan stuff, He make um know even mo plenny.

Zefaniah 2:3

All you peopo inside da land dat no mo big head, Dat do wateva Da One In Charge tell you fo do, Try know Da One In Charge mo betta! Try do da right kine stuff. Try no ack big head. Maybe he goin let you guys stay hide, Da time wen he goin show he stay real huhu.

Census 12:3

(You gotta know dat dis Moses guy erytime make um so he come las, mo den all da odda peopo on top da earth.)

Matthew 11:29

Jalike da cows get yoke on top dem fo pull dea load, you guys put my yoke on top you. Learn fo do wat I stay teach you. I stay gentle kine an I like take kea odda peopo befo I take kea me, fo notting bodda you guys.

Matthew 21:5

“Go tell Zion town, Eh, look! Yoa King stay come by you, He make nice kine to erybody, He stay ride on top one donkey, Even one real young donkey.”

Matthew 5:5

“Da peopo dat no need make odda guys tink dey importan erytime, Dey can stay good inside Cuz God goin give um da whole world.

Matthew 7:24

“So you know, whoeva hear wat I tell um fo do, an go do um, he jalike one smart guy dat make one plan, den he build his house on top solid rock.

1 Corint 6:5

An now, I like tell someting dat goin make you guys come shame: No even get one smart guy ova dea dat can figga out da small kine stuff dat oua braddahs an sistahs get wit each odda, o wat?

2 Corint 10:1

Dis yoa braddah Paul stay talking. You guys tink I shame fo talk strait wen I stay wit you guys? But I no shame fo talk strait wen I stay one far place. Eh, I stay tell you guys fo lissen me, cuz Christ get one good heart fo you guys, an he give you guys chance.

2 Corint 8:24

Az why, show all dem guys dat goin carry da money how plenny love an aloha you guys get fo dem. An show um how come we talk so good bout you guys. Den da church peopo all ova da place goin know fo shua dat you guys get love an aloha fo dem.

Galatia 5:23

He help us make nice to peopo an do um wit one good heart. He help us fo hold back wen we gotta hold back. No mo rules dat tell you dat you no can do all dat kine stuff I wen jus tell you.

Galatia 6:1

Eh, my braddahs an sistahs, you guys dat stay tight wit God Spirit, if you see somebody stay do bad kine stuff, go help bring um back! Make nice to dem, an do um wit one good heart. Tink bout you too, an watch out, so you no goin get presha fo do da same kine bad kine stuff.

Galatia 6:4

Erybody gotta tink real good bout how dey ack an wat dey do fo see if wat dey do stay pono. Den dey can feel good cuz az wat ony dey do. No good dey look how dey do stuff by how odda guys do stuff.

Efesus 4:2

Put odda guys firs befo you erytime. Make nice to dem. Hang in dea wit each odda. No get huhu wit each odda cuz you guys get plenny love an aloha fo each odda.

Philippi 1:27

Main ting, do eryting da right way, jalike da Good Kine Stuff Bout Christ tell you suppose to do. Den no matta I go see you guys, o I stay far away an ony goin hear wat you guys stay do, I goin know dis: you guys stay solid cuz you stay tight wit da one Spirit. You guys all get da same heart fo go all out an work togedda, so da odda peopo goin trus da Good Kine Stuff Bout Christ too.

Colosse 3:12

God wen pick you guys, cuz he get plenny love an aloha fo all you guys. Fo show dat you guys stay spesho fo him, put on dis, jalike you put on yoa clotheses: Show love an pity fo odda peopo an make nice to dem. No get big head. Make shua you not da numba one guy. An hang in dea wit odda peopo fo long time.

1 Timoty 4:12

No let nobody give you attitude jus cuz you mo young den dem, but make good fo da peopo dat trus God fo show dem how fo ack—how you talk, how you ack, how you get love an aloha fo da peopo, how you trus God, an how clean you stay inside.

1 Timoty 6:11

Eh Timoty, you God guy. Run away from all da bad kine stuff you do. Go all out fo do da right ting, fo do wat God like, fo trus God, fo get love an aloha fo erybody, fo hang in dea, an fo make nice to peopo.

2 Timoty 2:25

Wen peopo go agains him, he gotta teach um da true stuff, an teach um nice kine. Den maybe God goin make dem change dea mind fo dem know da trut.

Titus 3:2

Tell dem no talk bad bout nobody, an no beef. Dey gotta make frenz wit erybody. Dey gotta tink bout how da odda guy feel. Dey gotta let da odda peopo go firs.

Hebrews 13:5

Try live so you no mo plenny love fo money. Stay good inside bout da stuff you get awready. Cuz God da One tell, “No way I eva goin leave you! No way I goin bag from you!”

James 1:21

So den, clean up yoa life! Throw out all da bad kine stuff dat stay all ova da place! No get big head. Mo betta lissen wat God tell. He wen put da tings he tell inside you guys head awready, an dass strong enuff fo get you guys outa da bad kine stuff you stay in.

James 2:18

But somebody goin tell: “You trus God, but I do plenny good tings.” I goin tell dat guy: “Eh! How come you tink lidat? You no can show proof dat you trus God, if you ony talk, but you no stay do good tings. Ony get one way you goin know dat I stay trus God—wen I stay do good tings! Den you goin know fo shua dat I trus God.”

James 3:1

Eh, my braddahs an sistahs! You guys tink you like teach, aah? Kay den, but you know, not erybody suppose to teach. Cuz God goin judge all us teacha guys mo hard den he goin judge all da odda peopo.

James 3:17

But da peopo dat get da kine smarts from God in da sky, main ting, dea spirit stay all clean inside. An notting bodda dem. Dey make good to erybody an make frenz wit erybody. Dey get pity fo you an give you chance. Erytime dey make good tings happen. Dey no make good ony to dea frenz. Dey ony tell wat dey mean an no ack.

1 Peter 1:15

God, he stay good an spesho. He wen tell you guys fo come his guys. Az why you guys gotta be good an spesho erytime, jalike him.

1 Peter 2:12

Make shua you guys do da right tings in front da peopo dat donno God, so dat no matta dey poin finga you guys now, dey goin ony see da good kine stuff you guys do. Den wen Christ come back, dey goin tell how awesome God stay.

1 Peter 2:9

But you guys da one God wen pick. You da pries guys fo da King. You guys da peopo dat stay spesho fo God. God tell, “Dey mines!” bout you guys, fo you guys tell erybody all da good stuff God wen do. He tell you guys fo come outa da bad kine stuff an stick wit da good kine stuff he like us fo do. Jalike you wen go outa da dark an come inside da awesome light.

1 Peter 3:4

Wat mo importan, yoa good looks gotta come from da inside, an dis stuff goin las foeva, jalike wen you do eryting nice kine, an no make one big deal about notting. God tell, “Dat kine worth plenny to me.”