Isaiah 66:24 - Hawaii Pidgin Bible

²⁴ “An wen peopo go outside Jerusalem, dey goin see all da mahke bodies a da peopo dat wen go agains me. Da worm dat stay eat dem no goin mahke, an da fire dat burn dem no goin pio. Erybody goin feel pilau wen dey see da bodies.”

Isaiah 66:24 ပူးပေါင်းရင်းမြစ်များ

Songs 110:6

He goin punish da diffren peopos. He goin leave dea mahke bodies All ova da place. He goin smash da main leada guys All ova da world.

Isaiah 1:28

But da peopo dat go agains me An da ones dat stay do bad kine stuff, I goin bus up all dem. Me, Da One In Charge, an I goin wipe all dem out!

Isaiah 1:31

Even da strong guys Goin burn up jalike one dry leaf. Eryting dey wen work fo make, Goin come jalike one spark. All da stuff dey make, An da guys dat make um, Goin burn up same time, An no mo nobody can pio da fire.”

Isaiah 14:11

You guys wen ack high makamaka, Peopo play music fo you, But now, you guys come down to Da Mahke Peopo Place. Da bed you goin get down hea Get worms fo mattress an blanket.

Isaiah 24:20

Da earth move dis way an dat way Jalike one guy dat drink plenny An jalike one shack ready fo fall down. Da peopo all ova da world stay go agains God, Dass someting real bad fo dem Dat make um fall down, An dey no can get up no moa.

Isaiah 26:11

Da One In Charge, dat kine peopo no can see notting! Dey donno dat you stay put up yoa hand awready Fo use yoa powa fo punish dem! I like dey come shame wen dey look An see dat you stay go all out fo yoa peopo, An jalike you make da fire burn up an kill Da peopo dat stay agains you.

Isaiah 34:10

Da fire goin go day time an nite time, Da smoke from da tar stay going up all da time. From one faddah to anodda faddah, Edom goin stay wit notting ova dea. No mo nobody goin go thru dea eva one mo time.

Isaiah 34:3

Da peopo goin throw da guys dey kill outside da town, Cuz dea mahke bodies goin be haunas. Da mountains goin get blood soak inside da groun.

Isaiah 48:22

“Da One In Charge tell dis: ‘Da peopo dat do bad kine stuff, Dey no goin res!’ ”

Isaiah 5:25

Dass why Da One In Charge stay come huhu Agains his peopo. He put up his hand An stay ready fo wack dem down. Dass why da mountains stay shake, An da peopo body dat mahke Lay all ova outside jalike opala. “But no matta God wack his peopo lidat, He still yet stay huhu An he stay ready fo wack um one mo time.

Isaiah 51:8

Cuz dose odda peopo no goin stay long time, Dey goin be jalike clotheses da bugs goin eat. Dey goin be jalike wool kine cloth dat da moth worm goin eat. But I stay do da right ting all da time. I get my peopo outa trouble, Dem, an dea kids an grankids, foeva.’ ”

Isaiah 65:15

Da Israel peopo I goin pick, Da ony time dey goin use you odda Israel guys name Goin be fo put kahuna on top somebody. But me, Da One In Charge, da Boss, I goin kill you odda Israel guys, An give one diffren name fo my worka guys.

Isaiah 66:16

Da One In Charge goin use da fire an his sword Fo punish all da peopo jalike one judge. Da One In Charge goin wipe out plenny peopo.

Daniel 12:2

Plenny peopo dat stay mahke, jalike dey stay sleep unda da groun, dey goin come alive one mo time, jalike dey wake up. Some a dem goin come alive fo get da kine life dat stay foeva. Odda peopo goin come alive fo come shame foeva, an odda peopo goin feel pilau wen dey even tink bout dem.

Zekariah 14:12

Da One In Charge goin wack all da peopos dat wen fight Jerusalem wit one real bad kine sick. Dea skin goin come rotten wen dey still yet stay stan on top dea feets. Dea eyes goin come rotten inside dea face, an dea tongue goin come rotten inside dea mout.

Matthew 3:12

Jalike he goin throw all da wheat fo let da wind blow all da no good parts from da wheat, an den he goin put dat wheat inside da storage place. Afta dat, he goin burn all da no good parts inside da fire dat no goin pio eva.”

Jesus Show 21:8

But da peopo dat no do notting cuz dey sked, da peopo dat no trus God, dat ack pilau kine, dat murda oddas, dat fool aroun somebody, dat do bad kahuna kine stuff, dat go down an pray to da idol kine gods, an erybody dat bulai somebody, dey goin go inside da lava lake dat stay burn wit sulfur. Dass wen dey mahke da secon time.