Isaiah 63:3 - Hawaii Pidgin Bible

³ “He tell: ‘I no smash grapes. I smash da diffren peopos! No mo nobody from dose peopos help me. Ony me! I smash dem cuz I stay huhu wit dem. I real plenny huhu Dat I walk all ova dea bodies. Dea blood shoot out all ova on top my clotheses Jalike juice from da grape, an stain eryting.

Isaiah 63:3 ပူးပေါင်းရင်းမြစ်များ

Start 49:11

Judah get plenny grape farm, So he no lose notting if he tie his young donkey to one grape plant, Da bebe donkey, he tie um to da plant dat get da bestes grape. He no need watta fo make his clotheses come clean, Cuz he rich, an he get plenny wine fo wash um, He can even wash his robe wit da red juice from da grape dat look jalike blood.

2 Kings 9:33

Jehu tell dem, “Throw her down hea.” So dey throw her down, an some a her blood go all ova da wall an da horses. Den Jehu make da horses walk all ova her mahke body.

Job 40:12

Look at all da big head guys an make dem come notting! Throw down da bad guys wea eva dey stay.

Songs 60:12

Cuz us get God oua side, Us goin be da winnas! Him da One goin walk all ova Da ones dat stay agains us!

Isaiah 22:5

“Da One In Charge a me, Da God Ova All Da Armies, One day he goin come. Den, God goin jam up da Jerusalem peopo head Fo dem no tink an donno wat dey stay do. He goin make dem run all ova each odda, Right dea, inside da place wit mountain all aroun Wea can see wat goin come bumbye. Dat time, da army goin broke down da Jerusalem wall. All da way to da mountain goin hear da peopo stay yelling.

Isaiah 25:10

An on top dis same mountain, Jerusalem side, Da One In Charge goin use his powa dea. “But da Moab peopo, Odda peopo goin walk all ova dem, Jalike wen dey make someting fo burn fire, Firs dey throw da doodoo from da animals An straw from da wheat, an watta inside one hole, Den dey step um down good fo mix da mud.

Isaiah 28:3

Dat town look jalike get one nice haku lei on top um. Proud, da piloot guys from Efraim tink bout um. Da ones dat stay agains Samaria goin bus up da town Jalike dey step an smash da nice haku lei.

Isaiah 59:17

Fo make ready fo fight, Da One In Charge put on his body armor. Az how come nobody can hurt him. Dat mean, he stay do da right ting erytime. He put on his helmet. Dat mean, he know how Fo get his peopo outa trouble. Da shirt he put ova da body armor, Az jalike fo show da bad guys How he goin pay um back Fo eryting dey wen do. Da fancy kine robe he wear, Az jalike fo show Dat he goin go all out fo do all dis.

Isaiah 63:6

I walk all ova da diffren peopos fo punish dem Jalike dey da grapes, cuz I stay huhu. I make da peopos stagga jalike dey piloot, Cuz I stay huhu still yet, An I make dea blood pour out all ova da groun.’ ”

Sad Song 1:15

“Da Boss laugh at all da strong leadas aroun me. He call one army fo fight me, Fo smash my young guys. Da Boss walk all ova da Judah peopo, Jalike he step da grapes fo make wine.

Joel 3:13

Swing da sickle cuz da food stay ready fo harves. Go come an step da grapes fo press out da juice, Cuz da place stay full a grapes, An da wine barrels stay full. Dey stay full wit all da bad kine stuff da peopos stay do.”

Micah 7:10

Den da peopo from odda lands dat stay agains me goin see dat, An dey goin come plenny shame in front erybody. Cuz dey wen make fun a me an tell, ‘Eh! Yoa God, Da One In Charge, wea he stay?!’ But I goin see dem lose face! Dey goin come jalike da mud dat get on top da streets, Wen peopo walk all ova um.

Zekariah 10:5

Togedda dey goin be strong jalike army guys Dat step all ova da ones dey fight in da mud. Cuz Da One In Charge stay wit dem, Dey goin fight an win even ova da guys on top da horses.

Malakai 4:3

Da time wen I goin do all dat, Jalike you guys goin walk all ova da bad kine peopo, Cuz dey goin be jalike da dirt undaneat you guys feets. Dass wat Da One In Charge, Da God Ova All Da Armies tell.