Isaiah 61:2 - Hawaii Pidgin Bible

² Fo tell, “Dis, da year Da One In Charge goin make good to his peopo, An dis da time oua God goin pay back da bad guys.” He sen me fo give good kine words To erybody dat stay sad inside.

Isaiah 61:2 ပူးပေါင်းရင်းမြစ်များ

Isaiah 1:24

Dass why dis wat Da One In Charge, da Boss, tell. He da God Ova All Da Armies, Da Strong One dat help da Israel peopo. Az wat he tell: “I goin fight an win Ova erybody dat go agains me, Fo dem no bodda me no moa! I goin pay back erybody dat stay agains me.

Isaiah 13:6

“You Babylon peopo, Cry an yell cuz you feel sore inside, Cuz Da One In Charge, his day stay come nea! Da God Dat Get All Da Powa, He goin wipe out da bad guys.

Isaiah 2:12

Da One In Charge, he da God Ova All Da Armies. Goin come one day, he goin go Agains erybody dat get big head, An agains all da peopo dat ack high makamaka. God goin bring down da kine peopo dat tink dey importan. He goin make all dat kine peopo come notting.

Isaiah 25:8

Da One In Charge a me stay make peopo So dey no goin mahke no moa, eva. Dey all stay cry now, But he goin wipe off da tears from dea face. Da peopo dat get Da One In Charge fo dea God, Dey all shame now, all ova da world. But he goin take away all dat shame. Dass wat Da One In Charge tell.

Isaiah 34:2

Cuz Da One In Charge, he stay huhu Wit all da peopo inside da diffren countries. He no like wat all dea army guys do. He give up wit dem awready. He goin let odda guys kill dem An wipe all dem out.

Isaiah 34:8

All dat goin happen Cuz Da One In Charge get one time Dat he goin pay back da Edom peopo. He goin do um ova an ova fo one year. Cuz he goin make shua Da odda nations no goin take away da right Fo his peopo live inside Jerusalem town.

Isaiah 35:4

Tell da peopo dat feel sked, “Come strong! An no sked! Fo shua, yoa God goin show up Wen da time come fo pay back Da ones dat stay agains him! He da One goin come, An get you guys outa trouble!”

Isaiah 40:1

Dis wat yoa God tell you guys: “Make my peopo come so notting bodda dem! Help um feel good inside!

Isaiah 49:8

Dis anodda message from Da One In Charge fo his worka guy: “Wen da right time come, I goin tell you wat you like know. Wen da time come Fo me get da peopo outa trouble, I goin help you an take kea you. I goin make you da one Fo show da deal I get wit my peopo, Az fo real. I goin make da land fo dem use um one mo time, Da fields wea nobody work um long time, I goin give um back to da ohanas dat own um.

Isaiah 51:12

Da One In Charge tell, “Me, I da One Dat give you guys good kine words An make you feel good. But how come you sked a peopo Dat ony goin mahke bumbye?! Da peopo dat goin mahke jalike da grass?!

Isaiah 57:18

I see how dey ack, But still yet, no matta dey stay sick inside, I goin make dem come good! I goin make dem An da ones dat stay bum out So dey no stay sad inside no moa.

Isaiah 58:5

You tink dat wen I like fo you skip food, I ony like fo peopo ack jalike dey notting, An bow down dea head Jalike one reed dat stan up inside da watta, An spread out one burmbag cloth wit ashes on top Fo lay down dea. You guys tink dass all you guys gotta do wen you skip food fo pray?! You tink dat goin make me, Da One In Charge, feel good inside?! No way!

Isaiah 60:10

“Peopo from anodda place goin come fix yoa town walls. Dea kings goin help you guys too. Befo time, I wen stay huhu with you guys An wack you guys, But now, I like do good tings fo you guys An show you pity an love.

Isaiah 66:14

“Wen you guys see all dis, Yoa heart goin feel jalike stay jump Cuz you stay real good inside! An yoa body goin feel real good Jalike wen da new grass come up. Da peopo dat work fo Da One In Charge, Dey goin know wat kine powa he get. But da peopo dat stay agains Da One In Charge, Dey goin find out how feel Wen he had it wit wat dey do.

Jeremiah 31:13

Den da young girls goin dance an sing Cuz dey stay good inside. Same ting fo da young guys an da ol guys. Dey goin dance an sing too. I goin change dem from stay sad inside to stay good inside. I goin give dem good kine words, so dey no stay sad no moa.

Jeremiah 46:10

But Da One In Charge a me stay in charge a dat day too! He da God Ova All Da Armies! Dass wen he goin pay back Da peopo dat stay agains him. His sword goin kill peopo Till dey all mahke die dead. Cuz Da One In Charge a me, Da God Ova All Da Armies, Goin make sacrifice In da north country by da Eufrates Riva!

Micah 3:8

Den me Micah tell, “Fo shua, wit da spirit from Da One In Charge, I stay real strong, He help me figga wass right an wass wrong, An make me come strong Fo tell da Jacob an Israel peopo All da bad kine stuff dey stay do.

Matthew 5:4

“Da peopo dat cry inside, Dey can stay good inside Cuz God goin kokua dem.

Luke 4:19

He sen me fo tell peopo da time Wen Da One In Charge Goin do spesho tings fo dem.”

Luke 6:21

You guys dat stay hungry now, You can stay good inside Cuz you goin come full! You guys dat cry now, You can stay good inside Cuz you goin laugh!

2 Corint 6:2

God tell dis inside da Bible, “I wen hear you at da right time. I wen kokua you, da time I like get you outa da bad kine stuff.” Eh, lissen! Now da right time fo God get you outa da bad kine stuff you stay in!

1 Tessalonika 2:16

Dey even wen try fo stop us guys fo us no tell da Good Stuff bout God to da peopo dass not Jew guys. Cuz da Jew guys no like nobody fo trus Christ. Dass how dey erytime go all out fo do bad kine stuff. An now God, he tell “Laytas” to dem cuz a wat dey stay do!