Isaiah 60:14 - Hawaii Pidgin Bible

¹⁴ Get peopo befo time Dat wen make any kine to you guys, Dea kids goin come by you guys An go down in front you guys. Erybody dat wen ack jalike dey tink you no good, Dey goin go down on top da groun by yoa feets. Dey goin call yoa town, ‘Da One In Charge Town, Zion Town, Da Town Fo Da One Dat Stay Good An Spesho fo da Israel peopo.’

Isaiah 60:14 ပူးပေါင်းရင်းမြစ်များ

Start 27:29

Plenny odda peopos goin work fo you, Odda nations goin go down in front you fo show respeck. Go come da boss fo all yoa braddah guys. Da odda boys yoa muddah wen born goin go down in front you fo show respeck. Da ones dat tell dey like bad tings happen to you, God goin make bad tings happen fo dem! Da ones dat tell dey like good tings happen fo you, God goin make good tings happen to dem!”

Start 42:6

Dat time, Joseph was da guy in charge a all da land, Egypt side. Was him dat stay sell da food to all da peopo inside dat land. Joseph braddah guys go by him, an dey go down in front him, an put dea face on top da groun fo show um respeck.

Songs 46:4

Da peopo stay live inside da big town Wea get one riva. Dass wea da God Dass Mo Importan Den All Da Odda Gods Get his spesho place. Da peopo ova dea, dey feel real good Cuz a da watta from da riva.

Songs 48:2

Look awesome up dea, Mount Zion, Mo awesome den Mount Zafon, Da mountain fo da odda gods. Erybody inside da whole world Stay good inside Cuz Jerusalem stay da town Wea God da big King stay.

Songs 87:3

You peopo dat live Jerusalem town, Da same town wea God live, Erybody tell awesome tings Bout yoa town. (Time out fo da music.)

Smart Guys 14:19

Da bad kine peopo go By da good kine peopo, O wait outside da house A da peopo dat do da right ting Fo tell um dey need help.

Isaiah 1:26

Den I goin bring good kine judge guys fo you guys, jalike befo time. An akamai kine peopo dat can tell you guys wat fo do, Jalike you guys wen get da firs time. Afta dat, peopo goin call you guys ‘Da big town wea erybody do da right ting,’ An ‘Da town wea you can trus da peopo.’ ”

Isaiah 45:14

Dis, anodda message from Da One In Charge: “Da stuff dey make inside Egypt an Sudan, An da tall Yemen peopo, Dey goin come ova yoa side, An goin come yoa guys. Dey goin walk behind you An come by you wit chains on top dea legs. Dey goin go down in front you. Dey goin beg you an tell, ‘Fo shua God stay wit you. No mo anodda one dass God.’

Isaiah 45:23

I wen make one strong promise, An I goin make shua da ting happen. Me, I make dat promise Cuz I do da right ting erytime, An wat I stay promise, nobody can change um. Erybody goin go down on top dea knees Fo show dey get respeck fo me. Erybody goin make one strong promise An aks me fo make shua dey do um.

Isaiah 49:23

You Jerusalem guys, You goin get king guys fo take kea yoa kids An be jalike dea hanai faddahs, An da alii wahines goin be Jalike da muddahs fo breas feed yoa kids. Dey all goin go down Wit dea face on top da groun Fo show respeck fo you Jerusalem guys, Jalike dey stay eating da dirt on top yoa feet. Den, you guys goin know dass me, Da One In Charge. Da peopo dat wait fo me, fo see wat I goin do, No way dey goin come shame!”

Isaiah 62:12

Dose peopo he goin bring, Odda peopo goin call dem “Da Peopo Dat Stay Spesho Fo Da One In Charge, Da Peopo Dat Da One In Charge Pay Da Price Fo Get Um Outa Trouble.” An peopo goin call Jerusalem, “Da Town Da One In Charge Wen Look Fo, Da Town Da One In Charge No Goin Leave.”

Jeremiah 16:19

Me, Jeremiah, I pray lidis: “Eh, you Da One In Charge. You da One make me strong! You give me one strong place fo hide! I can run away dea wen get trouble! All da nations all ova da world goin come by you From da mos far places inside da world. Dey goin tell, ‘Fo shua, oua ancesta guys ony get bulaia kine gods, Idol kine gods dat good fo notting. Da idol kine gods neva help dem.’

Ezekiel 36:15

Wen da odda nations laugh at you guys fo make you come shame, I no goin make you guys lissen dem no moa. I no goin make you get da blame no mo from da odda peopos. I no goin make yoa nation jam up one mo time. Az wat me Da One In Charge, da Boss, tell.”

Ezekiel 39:7

“I goin make shua my Israel peopo know who me, dat I stay good an spesho. I no goin let nobody give me one pilau name no moa. All da nations goin know me, Da One In Charge, da Good An Spesho One fo da Israel peopo!

Joel 3:8

I goin let peopo sell yoa boys an girls to da Judah peopo, an dey goin sell dem to da Sabean peopo, dat stay one far place.” Az wat Da One In Charge tell.

Zefaniah 3:19

Wat I goin do dat time, I goin do wat I gotta do To all da peopo dat put presha on top you guys. I goin help da ones dat no can walk good, An bring togedda da ones dat stay scatta. Right now, dose peopo get shame. But I goin make peopo all ova da world Talk good bout dem, an show respeck fo dem!

Zekariah 8:23

An one mo ting: Dis wat Da One In Charge, Da God Ova All Da Armies, tell: “Dat time, fo ery Jew guy, goin get like ten odda guys from odda languages an peopos goin grab hold a his robe, an tell um, ‘Eh! Us guys like go wit you! Cuz us guys wen hear dat God stay wit you!’ ”

Hebrews 12:22

But you guys, wen God make da New Deal fo us guys come tight wit him, az jalike da time yoa ancesta guys go by him on top Zion Hill wea he stay. An Zion Hill, jalike da big town inside da sky wea da God Dat Stay Alive live, dass jalike Jerusalem Town. An jalike you guys go by da uku pile a angel guys dat come togedda fo party.

Jesus Show 14:1

Den I look, an jalike one dream, right dea in front me I see da One dat was jalike God Bebe Sheep. He stay stan on top Mount Zion, an wit him was 144,000 peopo dat get God Bebe Sheep name an his Faddah name on top dea forehead.

Jesus Show 3:12

Whoeva fight an win, I goin make dem strong Jalike da main pos inside da temple fo my God. Dey no goin eva leave da temple one mo time! I goin write my God name on top dem, An da name fo God big town, da new Jerusalem. Dat place goin come down from da sky wea God stay. An I goin write my new name on top dem.

Jesus Show 3:9

Get peopo dat come togedda inside one church, an tell dey God peopo. But fo real, dey Satan peopo. Dey ony bulai. I goin make dem come an go down in front you guys feet. An dey goin find out dat I get love an aloha fo you guys.