Isaiah 60:11 - Hawaii Pidgin Bible

¹¹ Yoa town gates goin stay open all da time. Day time o nite time, dey no goin stay shut, Az fo peopo bring rich kine stuffs fo you guys From all da diffren peopos, thru da gates. Wen dea king guys come by yoa town, You guys goin make parade fo bring um inside.

Isaiah 60:11 ပူးပေါင်းရင်းမြစ်များ

Nehemiah 13:19

Da day befo da Res Day, da time wen start fo come dark litto bit, I tell um fo shut da Jerusalem town gates. I tell um, “You betta not open da gates till da Res Day pau.” I put some a my worka guys in charge a da gates fo nobody bring even one load inside on da Res Day.

Songs 149:8

Dass dea job, Fo catch da odda peopos king guys, An tie um up wit chains, An put iron kine leg chains On top all da leada guys Dat da odda peopos get respeck fo.

Isaiah 24:21

“Dat time, Da One In Charge goin punish All da bad angel army guys inside da sky dat get powa dea. An da kings on top da earth dat get powa dea.

Isaiah 26:2

Open da town gates An let oua peopo go inside, Da ones dat do da right kine stuff An do wateva dey make one promise fo do.

Isaiah 49:23

You Jerusalem guys, You goin get king guys fo take kea yoa kids An be jalike dea hanai faddahs, An da alii wahines goin be Jalike da muddahs fo breas feed yoa kids. Dey all goin go down Wit dea face on top da groun Fo show respeck fo you Jerusalem guys, Jalike dey stay eating da dirt on top yoa feet. Den, you guys goin know dass me, Da One In Charge. Da peopo dat wait fo me, fo see wat I goin do, No way dey goin come shame!”

Isaiah 56:7

Dey da peopo I goin bring Jerusalem side, To da mountain dat stay spesho fo me. I goin make dem feel real good inside Wen dey come inside my house fo pray. Wen dey make burn up kine sacrifice on top my altar, An odda kine sacrifices dey make dea, Dat goin make me feel real good. Cuz peopo goin call my house ‘Da house wea all diffren peopos go fo pray.’ ”

Isaiah 60:18

No goin get noise inside yoa land no mo From peopo dat stay hurt each odda. Nobody goin wipe out stuff O broke up stuff inside yoa land. But wen you guys build one town wall, You goin give um da name ‘God get us outa trouble.’ An wen you guys put up one town gate, You goin give um da name ‘Da One In Charge stay good.’

Isaiah 60:5

Wen you guys see all dat, You goin smile plenny! You goin shake cuz you feel real good inside, An yoa heart goin beat mo fas. All da kine stuffs da trader guys bring From da odda side a da ocean, Goin be fo you, an not fo odda peopo. An rich kine stuffs goin come fo you guys From all da diffren peopos.

Isaiah 61:6

But you guys, peopo goin call you “Prieses fo Da One In Charge.” Dey goin call you guys “Helpa guys fo oua God.” You guys goin get plenny food From da odda countries, An talk big cuz a da awesome tings dey get An you goin get um too.

Isaiah 62:10

Go, pass thru da town gates. Make one place fo my peopo come back! Build up da big road. Take away da stones. Hold up one flag So da diffren peopos know wea fo go!