Isaiah 59:6 - Hawaii Pidgin Bible

⁶ Da spida webs dey make, No good fo make clotheses. Nobody can cova dem wit dat. Da kine tings dey do, ony bad kine. Dey like fight an hurt peopo.

Isaiah 59:6 ပူးပေါင်းရင်းမြစ်များ

Start 6:11

Dat time, da way God see um, eryting dat stay alive come poho. Da peopo all ova da world, dey ony like bus up each odda.

Job 16:17

But I neva bus up nobody. An wen I pray, I stay clean inside.

Songs 55:11

Inside dea, get peopo Dat stay bus up eryting. Wea peopo come togedda, Dey put presha on odda peopo An bulai dem, an no stop.

Songs 58:2

Fo shua, inside yoa head, You tink how fo do bad kine tings. Dat make you guys ready Fo bus up peopo all ova da world.

Isaiah 30:1

Dis, one message from Da One In Charge: “Bummahs! to da hard head peopo Dat stay go agains me! Dey make one plan an do um, But da plan, not from me. Dey make one deal wit peopo from anodda country, But my Spirit neva tell dem fo do dat. Dey do one bad ting, Den anodda mo worse ting.

Isaiah 5:7

“So, az da story bout dis peopo! Da One In Charge, Da God Ova All Da Armies, His grape field, dass da Israel peopo! An da plantation dat make Da One In Charge feel good inside Wit plenny love an aloha, Dass da peopo from da Judah districk. Da One In Charge wait fo peopo Fo judge da right way, But dey ony stay kill each odda! He wait fo peopo fo do da right ting erytime, But dey ony make each odda yell fo somebody help dem.”

Isaiah 57:12

Me, I goin tell erybody Bout all da kine stuff you guys do, Cuz you guys tink you do da right ting. But all dat stuff no goin help you guys notting.

Isaiah 58:4

Wen you guys skip food, You guys ony make argue an like beef! You no stay pray! You guys wack each odda wit yoa fis Fo do someting bad! If you guys skip food da way you stay do today, No tink you goin make me lissen you, Up hea inside da sky, Cuz I not!

Isaiah 64:6

All us guys wen come Jalike somebody dat do pilau kine stuff An no can come in front you, Da One In Charge, cuz a dat. All da tings we do fo show we stay do da right ting, Jalike pilau an dirty kine rags. We all lose fight, jalike one dry up leaf. An da bad kine stuff we do, wipe us out Jalike wen da wind blow away da leaf.

Jeremiah 6:7

Jalike plenny watta come outa one spring, Az how plenny bad kine stuff come outa da Jerusalem peopo. I ony hear Who get hurt o who get wipe out. Dass all I hear! I see dat all da time Da peopo dea stay sick an hurt.

Ezekiel 18:12

He do bad kine tings to da peopo dat no mo notting, az da ones dat need help. He rip off peopo too. Wen he loan money an keep someting da odda guy own fo make shua da guy pay um back, den wen da odda guy pay wat he owe, dis guy no give back da ting right den an dea. He trus da idol kine gods. He do pilau kine stuff.

Ezekiel 7:11

Da guys dat like bus up erybody, now dey come jalike one stick fo wack da bad kine peopo! Dass why nobody stay—No mo big noise from da crowd, no mo peopo dat make high makamaka!

Ezekiel 7:23

“Go get chains ready fo take prisona guys away from da land cuz all ova da land get judges dat like set up peopo fo mahke. Inside da town, peopo goin bus up each odda all da time.

Ezekiel 9:9

Da One In Charge tell me, “Da Israel peopo an da Judah peopo do real plenny bad kine stuff. Get plenny peopo dat wen bleed an mahke all ova Israel an Judah. An da judges all ova Jerusalem town no judge da right way, so dey let da killa guys go erytime. Da Israel peopo an da Judah peopo tell, ‘Da One In Charge wen bag from dis land. Da One In Charge, he no see wass happening!’

Amos 3:10

You betta lissen! Da One In Charge, he tell dis: “My peopo, dey donno notting how fo do da right ting! Dey pile up dea palaces wit stuffs dey get From peopo dey wen bus up.”

Amos 6:3

“Bummahs, you guys! You tink goin be long time Befo bad tings goin happen to you guys! But da way you guys ack, you ony make shua Dat da guys dat like bus you up Goin take ova you mo fas!

Micah 2:8

But right now, my peopo go agains me. You guys rip off da rich kine clotheses From da peopo dat come by hea an no mo worry. Jalike wen guys come home from fight one war.

Micah 6:12

All da rich guys from Jerusalem ony like bus up peopo. Da peopo dat live ova dea stay bulai erytime. Erytime dey talk, dey make scam.

Zefaniah 1:9

Dat time, I goin punish Erybody dat jump ova da flat stone Unda da door a da temple Fo show respeck fo dea gods. Dose guys bulai peopo an bus um up, Fo dem fill up dea bosses house Wit stuff dey get From rip off peopo.”

Zefaniah 3:1

Bummahs, fo Jerusalem town! Da peopo dea put presha on top odda peopo! Dey go agains me! Dey make um come pilau!

Malakai 2:16

Da One In Charge, da God fo da Israel peopo, tell: “I hate wen you divorce yoa wife, an wen you bus up peopo an make jalike you neva do notting bad!” Dass wat Da One In Charge, Da God Ova All Da Armies tell. So, you guys make shua you stay okay inside, an no bulai!