Isaiah 57:5 - Hawaii Pidgin Bible

⁵ You guys like fool aroun Unda da kine kapu trees fo da idol kine gods. You guys kill yoa kids fo da god Molek Down by da streams dat no mo watta, Fo make sacrifice unda da cracks in da cliffs.

Isaiah 57:5 ပူးပေါင်းရင်းမြစ်များ

1 Kings 14:23

Dem guys make spesho kine places on top da high part a da hills fo make sacrifice, an dey stan up big stones fo make places fo pray, an put poses fo pray to da wahine god Asherah, on top da high part a ery hill an unda ery big tree dat get plenny leaf.

2 Kings 17:10

Dey put up big kine stone fo dem pray to um. Dey put poses fo da wahine god Asherah on top ery high hill an unda ery big tree dat get plenny leaf.

2 Kings 17:7

All dat wen happen cuz da Israel peopo show mo respeck fo da odda gods, but not fo Da One In Charge. Dey wen do bad kine stuff agains dea God, Da One In Charge, no matta he da One wen bring dem outa Egypt befo time, fo da Egypt king, da Pharaoh guy, no mo powa ova dem no moa.

2 Kings 23:10

Josiah make da place dey call Tofet, dat stay inside da Ben Hinnom Valley, so nobody can use um fo kill dea boy o girl dea, fo make one sacrifice wit fire fo da idol god Molek.

2 Records 28:3

He make sacrifices inside da Ben Hinnom Valley, an put his boys thru da fire fo make one sacrifice. Az was jalike da pilau kine stuff da odda nations do, da peopos Da One In Charge wen push outa da land in front da Israel peopo.

Outa Egypt 32:6

So da nex day, early morning time, da peopo make sacrifices fo da idol god an burn da sacrifices, an dey bring odda kine sacrifices to da idol god fo show dat eryting good wit him an dem. Den dey sit down an party an drink plenny. Den dey start fo fool aroun.

Isaiah 1:29

“Fo shua, you guys goin come shame plenny Cuz you like go down in front da idol kine gods Inside places wea get oak trees an garden.

Jeremiah 17:2

Even dea kids no foget fo pray in front da altars fo odda gods, An in front da tiki poses fo da idol kine wahine god Asherah, An undaneat ery big tree dat get plenny leaf An on top da high hills.

Jeremiah 2:20

“Long time befo time you guys wen no do wat I tell you fo do, Jalike one cow dat broke off da yoke fo pull da wagon, An broke da ropes dat tie um. You guys wen tell, ‘Us no goin work fo you!’ Fo shua, unda da trees wit plenny leaf on top ery big hill, You guys ack jalike da wahines Dat make sex dea fo get money.

Jeremiah 3:13

But one ting I tell you guys gotta do— You gotta tell wat you wen do az wrong, An dat you guys wen go agains me, yoa God, Da One In Charge, An dat you guys fool aroun all ova da place Wit odda peopo gods, Unda all da trees dat get big shade. An wen I talk, you guys no lissen, you make deaf ear! Az wat Da One In Charge tell.’ ”

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 32:35

Dey make sacrifice places fo da god Baal inside da Ben-Hinnom Valley, fo burn up dea boys an girls inside da fire ova dea! Dey do dat fo make sacrifice to da god Molek. I neva tell um fo make lidat, an I neva plan fo dem do dat kine pilau stuff an make da Judah peopo do pilau kine stuff too.

Jeremiah 50:38

I goin make dea watta ditches come dry, Cuz da Babylon peopo get plenny idol kine gods. An dose idol kine gods goin get mad an ack all pupule Cuz dey goin come real sked.

Jeremiah 51:7

Da One In Charge wen use da Babylon peopo Fo punish da whole world! Jalike he stay give um one gold cup Fo make da whole world come piloot. Jalike all da peopos suck up da wine Dat da Babylon guys give um, Az why all da nations come pupule!

Jeremiah 7:31

Dey build sacrifice places jalike da one dey call Tofet, inside da Bet-Hinnom Valley, fo burn up dea boys an girls inside da fire, fo make one sacrifice. I neva tell um fo make lidat, an I neva make plan fo dem do dat!”

Ezekiel 16:20

“ ‘Yoa boys an girls dat you wen born fo me, you wen kill um fo make dem come one sacrifice fo come food fo da idol kine gods eat um up. Was real bad wen you fool aroun, but dis mo worse!

Ezekiel 20:26

I make dem come pilau from all da tings I wen give dem. Az why dey kill dea firs bebe, an burn up da body fo make one sacrifice. Cuz a dat, dey goin tink how horraz dey ack, an know dass me, Da One In Charge, dat do dat to dem.

Ezekiel 20:28

I wen bring dem inside da land dat I wen make one strong promise fo give dem. But den, erytime dey see one high hill o one tree wit plenny leafs, dass wea dey make dea sacrifices dat make me come huhu. Dass wea dey put out dea stuffs dat smell nice an make you feel good. Dey pour out dea drink sacrifice dea too.’

Ezekiel 20:31

Wen you guys give yoa gifs, da one wea you kill yoa bebes an burn up dea body fo make one sacrifice, dat mean, you guys still yet come pilau inside cuz a all yoa idol kine gods! You Israel ohana peopo tink I goin let you guys come in front me fo aks me fo tell you wass goin happen? No way! Fo shua I stay alive, an fo shua, no way I goin let you guys come in front me fo aks me wass goin happen! Az wat me, Da One In Charge, da Boss, tell.

Ezekiel 6:13

An dey goin know az me, Da One In Charge, dat stay do all dis. Dey goin know dis, cuz goin get all da mahke bodies on top da groun nex to da idol kine gods dat stay aroun all dea altars on top all da high hills, an all da mountains, an undaneat ery healthy kine tree, an all da oak trees wit plenny leaf, ery place wea dey burn up da sacrifices fo make nice smell fo make all dea idol kine gods feel good.

Prieses 18:21

“No give any a yoa kids fo make um go thru da fire fo make one sacrifice fo da idol kine god Molek, cuz you guys betta not make my name pilau. Me, Da One In Charge.

Census 25:6

Right den an dea, get one Israel guy dat bring one Midian wahine by his frenz. He do um right in front Moses an all da Israel peopo, wen dey stay cry by da place fo go inside da Tent Fo Da Peopo Meet Wit God.

Rules Secon Time 12:2

Broke down all da sacrifice place on top da high mountains an hills, an unda ery tree dat get plenny green leaf. Dis da kine place wea da peopo dat stay dea, go down in front dea gods. But you guys goin take ova dea land.

Jesus Show 18:3

Da Babylon peopo, jalike dey one wahine, An all da diffren peopos all ova da world, Jalike dey fool aroun wit her. She make um do any kine, Jalike she make um drink too much strong wine Fo make um come real piloot! Da kings inside da world wen fool aroun wit her too. An da trader guys all ova da world Wen come rich from all kine rich stuffs Dat Babylon get from dem fo ony her.”