Isaiah 57:13 - Hawaii Pidgin Bible

¹³ Wen you guys yell fo help, Let da idol kine gods dat you guys wen bring togedda, Get you guys outa trouble! Da wind goin blow all dem away. Ony litto bit wind An dey gone! But whoeva trus me fo hide dem Fo dem no get hurt, Dey goin live inside da Israel land, An dey goin pray to me On top Mount Zion, dat stay spesho fo me.”

Isaiah 57:13 ပူးပေါင်းရင်းမြစ်များ

2 Kings 3:13

Elisha tell da Israel king, “Mo betta you go by da guys dat talk fo da gods yoa faddah an muddah wen pray to! How come you tink me an you stay pono?!” Da Israel king tell um, “No ways! Cuz Da One In Charge was da one wen call us three kings togedda, an he da One goin let da Moab king catch us guys!”

Job 21:18

You tink dey stay jalike da junk kine stuff from da wheat Dat blow away? Not!

Songs 1:4

Da guys dat broke da Rules from God, Dey not like God peopo. Dey jalike da junks from da wheat Dat da wind blow all ova da place.

Songs 118:8

Mo betta, I go hide by Da One In Charge, Fo him take kea me, Den trus odda peopo fo take kea me.

Songs 125:1

Da peopo dat trus Da One In Charge, Dey stay solid all da time, Jalike Mount Zion, Dat no move an stay solid.

Songs 37:11

But da peopo dat no get big head An no need be da numba one guy, Dey da ones goin get da land Dat Da One In Charge wen promise dem, An dey goin stay good inside Cuz eryting go good fo dem.

Songs 37:22

Da peopo dat Da One In Charge Do good tings fo, Dey da ones dat goin get da land Cuz dey his kids. Da peopo Da One In Charge Put kahuna on top dem, Dey goin get cut off from him.

Songs 37:29

Da peopo dat do da right ting, Dey goin get da land An dey goin stay live dea foeva.

Songs 37:3

Trus Da One In Charge an do good tings. Live on top yoa land An take kea da land.

Songs 37:34

Wen you stay wait Fo Da One In Charge do stuff fo you, Make shua you do eryting How he like. He goin make you come importan Fo you take ova da land. An wen he cut off da peopo Dat do bad tings, You goin see um happen.

Songs 37:9

Da guys dat do bad kine stuff, God goin cut um off from him. But da peopo dat wait Fo Da One In Charge fo take kea dem, Dey da ones goin get da land Da One In Charge wen promise dem.

Songs 58:9

I like fo God wipe out dat kine peopo Mo fas den can make One pot come hot Wen you burn kiawe wood wit thorns, O burn da dry wood, O even da wood you jus wen cut.

Songs 84:12

Eh! You Da One In Charge! You da Boss Ova All Da Armies! Erybody dat stay trus you, Dey stay good inside!

Smart Guys 28:25

Da greedy guys, Dey da ones make erybody like fight. But da guys dat stay trus Da One In Charge, He goin make eryting come real good fo dem.

Isaiah 11:9

All ova da mountain dat stay spesho fo me, Nobody goin hurt o wipe out nobody. Cuz all ova da world, erybody goin know me, Da One In Charge, Jalike all ova da ocean, da watta stay cova eryting.

Isaiah 14:32

Wen da messenja guys from dat army aks you If you guys goin give up, Tell um, “No way! Was Da One In Charge Dat put his big town Jerusalem hea. Fo da peopo dat need help, Dey can go inside Jerusalem An nobody goin hurt um dea.”

Isaiah 25:4

I goin tell dat you da greates, Da One In Charge, Cuz you give place Fo da peopo dat no mo notting, fo hide. You, one place fo da peopo Dat need res an help wen dey get trouble. One place fo go inside From da big rain an da hot sun, Cuz wen da mean guys go afta peopo, Feel jalike wen da hard, cold rain Hit agains one wall,

Isaiah 40:24

Dey jalike plants Dat somebody stick inside da groun, O throw da seed, An den dey start fo grow one root inside da groun. Right den an dea, dey pau, Jalike God blow on top um An dey come all dry, An den one storm come An blow um away, Jalike da junk kine stuff from da wheat.

Isaiah 41:16

Jalike wen you throw da junks up in da air, An da wind blow um, Den one strong wind blow um all away. But you guys goin stay real good inside Cuz you stay tight wit Da One In Charge, An you goin talk plenny bout how awesome Da One In Charge stay, Da Good An Spesho God fo da Israel peopo.

Isaiah 45:20

“Go come togedda, an come nea me, All you prisona guys From all da diffren countries. Da peopo dat carry dea idol kine gods hea an dea wit dem, Dat somebody wen make from wood, Dey donno notting! Dey pray to da kine gods Dat no can get dem outa trouble.

Isaiah 49:8

Dis anodda message from Da One In Charge fo his worka guy: “Wen da right time come, I goin tell you wat you like know. Wen da time come Fo me get da peopo outa trouble, I goin help you an take kea you. I goin make you da one Fo show da deal I get wit my peopo, Az fo real. I goin make da land fo dem use um one mo time, Da fields wea nobody work um long time, I goin give um back to da ohanas dat own um.

Isaiah 56:7

Dey da peopo I goin bring Jerusalem side, To da mountain dat stay spesho fo me. I goin make dem feel real good inside Wen dey come inside my house fo pray. Wen dey make burn up kine sacrifice on top my altar, An odda kine sacrifices dey make dea, Dat goin make me feel real good. Cuz peopo goin call my house ‘Da house wea all diffren peopos go fo pray.’ ”

Isaiah 60:21

“Dat time, all yoa peopo goin do da right tings. Dey goin own da land foeva, Jalike I plant one young plant An put um dea. Me, I do all dat Fo peopo see dat I awesome.

Isaiah 65:11

“But you guys, you go way from me, Da One In Charge! You foget fo pray On top da mountain dat stay spesho fo me! You guys put up one table fo da Good Luck god, An you pour wine wit spice In front Da God Fo Wateva Goin Happen Bumbye!

Isaiah 65:25

Da wolf an da bebe sheep goin eat togedda. Da lion goin eat grass jalike da cow. But dirt still goin be da snake food. Dey no goin hurt o wipe out each odda On all da mountain dat stay spesho fo me.” Dass wat Da One In Charge tell.

Isaiah 65:9

I goin make da Jacob ohana get mo plenny kids. I goin make one guy from da Judah ohana Own my mountains, Cuz he wen get um from his ancesta guys. Da peopo I pick goin own da mountains Dat come from dea ancesta guys. My worka guys goin go dea Fo live.

Isaiah 66:20

Da peopo I sen, goin bring all yoa braddah guys from all da countries to Jerusalem, da mountain dat stay spesho fo me. Wen all dem come, dat goin be jalike one wheat sacrifice fo tell me, ‘Eh! You Da One In Charge, mahalo plenny!’ Dey goin come on top horses, in war wagons an wagons wit cloth on top, an on top mules an camels.” Az wat Da One In Charge tell. “Dey goin bring dem jalike da Israel peopo bring dea wheat in clean baskets fo make sacrifice inside da Temple Fo Da One In Charge.

Jeremiah 2:28

So, now! Wea da gods stay, Dat you guys wen make fo you?! Let um come, if dey can get you guys outa trouble. Cuz you Judah guys get plenny gods, aah? Jalike you get one god fo ery town!”

Jeremiah 22:20

Eh, you Jerusalem peopo! All da ones dat can help you fight Stay all bus up awready! No matta you guys go up on top da Lebanon mountains an yell, O go make dem hear yoa voice Bashan side, O yell from da Moab mountains, Dey no can help you you know!”

Jeremiah 22:22

I goin make all yoa leada guys come prisonas Jalike one strong wind blow um away. All da ones dat can help you fight Goin come prisonas an go one far place. Den, you goin get plenny shame an lose face, Cuz a all da bad kine stuff you wen do.

Jeremiah 30:14

All da nations dass was yoa frenz foget you awready. Dey no give a rip bout you. I wen wack you jalike I one guy dat stay agains you. I wen punish you jalike I one mean guy. Cuz you get da blame fo plenny tings, All da bad kine stuff you wen do.

Ezekiel 20:40

Me, Da One In Charge, da Boss, tell dis too: Ony get one place wea all da Israel ohana peopo come togedda fo do stuff fo me. Az on top da main Israel mountain, da one dat get da Temple on top fo show I good an spesho. Cuz on top my spesho mountain, ova dea inside da Israel land, all da Israel peopo goin work fo me. Dass da place wea I goin tell dat dey my peopo. Ova dea I goin tell you guys fo make sacrifices an give nice gifs, an make sacrifices dat goin be spesho fo me.

Hosea 13:3

Az why dey goin disappea fas, Jalike da clouds, morning time. Jalike da dew dat come out early an den go way. Jalike da junk kine stuff dat da wind blow way from da wheat an barley. Jalike da smoke dat go outa one window.

Joel 3:17

Da One In Charge tell, “Den you guys goin know Dat I yoa God, Da One In Charge. I live on top Mount Zion, da hill dat stay spesho fo me. All Jerusalem goin be spesho fo me. Da odda peopos no goin take ova Jerusalem eva one mo time.

Zekariah 7:13

Den Da One In Charge, Da God Ova All Da Armies, tell, “I wen call dem, but dey no lissen. So wen dey goin call me, I no goin lissen!

Local Leadas 10:14

Go yell fo help to da gods you guys wen pick! Let dem get you guys outa trouble!”