Isaiah 56:7 - Hawaii Pidgin Bible

⁷ Dey da peopo I goin bring Jerusalem side, To da mountain dat stay spesho fo me. I goin make dem feel real good inside Wen dey come inside my house fo pray. Wen dey make burn up kine sacrifice on top my altar, An odda kine sacrifices dey make dea, Dat goin make me feel real good. Cuz peopo goin call my house ‘Da house wea all diffren peopos go fo pray.’ ”

Isaiah 56:7 ပူးပေါင်းရင်းမြစ်များ

1 Kings 8:41

“An bumbye, goin get peopo from odda places, Dat not Israel kine peopo. Dey goin come from odda lands far from hea, Cuz dey like know wat kine god you.

Songs 2:6

“No matta wat you guys tink, I awready wen give My king guy da powa Fo stay in charge fo me! He da king on top Zion Hill, Jerusalem town, On top da mountain Dass spesho fo me!”

Outa Egypt 28:38

Wen Aaron put on da hat, da gold piece goin touch his forehead. Dass cuz maybe bumbye, da Israel peopo no do someting da right way. Den, dey goin bring presents fo God, an dey like make um spesho fo him. Da gold piece goin show dat Aaron erytime take da blame wen someting jam up. Az how Da One In Charge goin like da presents dat da peopo bring fo him.

Isaiah 11:9

All ova da mountain dat stay spesho fo me, Nobody goin hurt o wipe out nobody. Cuz all ova da world, erybody goin know me, Da One In Charge, Jalike all ova da ocean, da watta stay cova eryting.

Isaiah 19:19

An dat time, goin get one altar fo make sacrifice fo Da One In Charge inside da middo a da Egypt land, an one big stan up stone by da Egypt borda, fo no foget Da One In Charge.

Isaiah 19:21

Da One In Charge goin let da Egypt peopo know who him. Wen dat happen, dey goin come tight wit him. Dey goin pray to him an bring animal sacrifices an wheat an barley sacrifices to him. Dey goin make strong promises to him, an dey goin do wat dey wen promise fo do.

Isaiah 25:6

On top dis mountain, Jerusalem side, Da One In Charge, Da God Ova All Da Armies, He goin make one big luau fo all da diffren peopos. Goin get da bestes kine food, All da bestes kine wine, An good kine meat wit plenny good stuff inside da bone, Ol kine wine dat no mo junks awready.

Isaiah 56:5

Fo dose guys dat no can make kids But stay tight wit me, I goin give dem someting Mo betta den get boys an girls. I goin make dem come jalike az my ohana, An give dem one spesho place inside my house. Peopo no goin foget dea name foeva, An nobody goin foget dea name eva.

Isaiah 57:13

Wen you guys yell fo help, Let da idol kine gods dat you guys wen bring togedda, Get you guys outa trouble! Da wind goin blow all dem away. Ony litto bit wind An dey gone! But whoeva trus me fo hide dem Fo dem no get hurt, Dey goin live inside da Israel land, An dey goin pray to me On top Mount Zion, dat stay spesho fo me.”

Isaiah 60:11

Yoa town gates goin stay open all da time. Day time o nite time, dey no goin stay shut, Az fo peopo bring rich kine stuffs fo you guys From all da diffren peopos, thru da gates. Wen dea king guys come by yoa town, You guys goin make parade fo bring um inside.

Isaiah 60:7

All da sheeps from Kedar goin come togedda fo you guys. Da goats from Nebaiot goin be wat you guys need Fo make good kine sacrifice on top my altar. An I goin make my awesome Temple mo nice still yet.

Isaiah 61:10

I stay feel plenny good inside cuz a Da One In Charge. I feel real good cuz a my God. Cuz jalike he give me clotheses fo wear Dat show he da One get me outa trouble, An jalike he give me one nice robe Fo show I get um right wit him. I feel jalike one guy dat goin get married An wear one fancy hat jalike da pries guys, An I feel jalike da lady dat goin marry too, An wear all kine jewelry!

Isaiah 65:11

“But you guys, you go way from me, Da One In Charge! You foget fo pray On top da mountain dat stay spesho fo me! You guys put up one table fo da Good Luck god, An you pour wine wit spice In front Da God Fo Wateva Goin Happen Bumbye!

Isaiah 65:25

Da wolf an da bebe sheep goin eat togedda. Da lion goin eat grass jalike da cow. But dirt still goin be da snake food. Dey no goin hurt o wipe out each odda On all da mountain dat stay spesho fo me.” Dass wat Da One In Charge tell.

Jeremiah 7:11

Da way you guys ack, you guys tink dis Temple dat get my name, fo show erybody wat kine god me, az one hangout fo crooks fo you guys hang out dea! But watch out! Me, I spock wat you stay doing!’ ” Az da message from Da One In Charge.

Ezekiel 20:40

Me, Da One In Charge, da Boss, tell dis too: Ony get one place wea all da Israel ohana peopo come togedda fo do stuff fo me. Az on top da main Israel mountain, da one dat get da Temple on top fo show I good an spesho. Cuz on top my spesho mountain, ova dea inside da Israel land, all da Israel peopo goin work fo me. Dass da place wea I goin tell dat dey my peopo. Ova dea I goin tell you guys fo make sacrifices an give nice gifs, an make sacrifices dat goin be spesho fo me.

Ezekiel 47:22

All dis land goin come da property fo you guys, an fo da peopo from anodda place dat live wit you guys an get kids. You goin treat dem jalike dey kamaainas, jalike dey da Israel peopo dat wen born inside dis land an get property.

Joel 3:17

Da One In Charge tell, “Den you guys goin know Dat I yoa God, Da One In Charge. I live on top Mount Zion, da hill dat stay spesho fo me. All Jerusalem goin be spesho fo me. Da odda peopos no goin take ova Jerusalem eva one mo time.

Zekariah 8:3

Dis wat Da One In Charge tell: “I goin go back Mount Zion, an live inside Jerusalem town. Den dey goin call Jerusalem, ‘Da big town wea erybody tell da trut.’ An da mountain dat I own, me, Da One In Charge, Da God Ova All Da Armies, dey goin call um ‘Da Mountain Dat Stay Spesho Fo Da One In Charge.’ ”

Malakai 1:11

“All ova, from wea da sun come up to wea da sun go down, all da peopos know I get one importan name. Dey bring stuff fo make sacrifice cuz dey know wat kine god me, an dey bring incense an da kine gifs dat no mo notting wrong wit dem. Dass cuz da diffren peopos dat know who me, dey know I importan.” Dass wat Da One In Charge, Da God Ova All Da Armies tell.

Matthew 21:13

He tell all dose peopo, “Da Bible tell, ‘My temple goin be one house fo pray inside.’ But you guys stay make um jalike one hangout fo crooks!”

Mark 11:17

He teach um, “Da Bible tell, ‘My temple goin be one house fo all da peopos all ova da world fo pray inside.’ But you guys stay make um jalike one hangout fo crooks!”

Luke 19:46

He tell, “Da Bible tell, ‘My Temple goin be one house fo pray inside.’ But you guys stay make um jalike one hangout fo crooks!”

Rome 12:1

My braddahs an sistahs, so den, wat? God, he give you guys plenny chance. Az why I like tell you dis: Let God stay in charge a you, jalike you give God one sacrifice dat stay alive. You guys know wat God like fo you guys do? He like you guys go all out fo him. Wen you make lidat, az good you know, cuz dass how you show God love an respeck.

1 Timoty 2:8

I like da peopo all ova da place fo pray. Wen dey pray, dey gotta be good an spesho fo God, an no make argue o stay mad at da odda guy. Den az okay fo dem put dea hands in da air fo pray.

Hebrews 12:22

But you guys, wen God make da New Deal fo us guys come tight wit him, az jalike da time yoa ancesta guys go by him on top Zion Hill wea he stay. An Zion Hill, jalike da big town inside da sky wea da God Dat Stay Alive live, dass jalike Jerusalem Town. An jalike you guys go by da uku pile a angel guys dat come togedda fo party.

Hebrews 13:15

Us guys, oua ancesta guys wen make sacrifice fo show dey like tell plenny good tings bout God. Az why same ting, us guys goin tell erybody dat us God guys cuz we know who him! Dass why us guys can tell plenny good tings all da time bout how God stay. An we can do all dat cuz a Jesus.

1 Peter 2:5

Eh, you guys, come tight wit Christ fo God use you guys too, jalike you guys da stones fo make one place fo God Spirit. An you guys stay alive fo real kine too, jalike Christ. All you guys goin be jalike pries guys dat stay spesho fo God. Jalike you guys goin give sacrifices to God, da kine sacrifices God like, cuz Jesus Christ wen mahke fo all you guys.