Isaiah 56:4 - Hawaii Pidgin Bible

⁴ “Cuz dis wat Da One In Charge tell he goin do Fo da guys dat no can make kids, But still yet dey show respeck fo da Res Day Cuz dey my guys, An dey do wat I like um fo do, Cuz dass wat dey pick fo do, An dey stick wit da same deal Dat I wen make wit my peopo.

Isaiah 56:4 ပူးပေါင်းရင်းမြစ်များ

2 Samuel 23:5

“Fo shua, my ohana goin stay lidat wit God. He wen make one promise fo me dat stay foeva. He make shua ery part okay, an no ways goin change. He goin make me da winna! He goin make eryting happen Dat I like fo happen.

Songs 119:111

Da tings you teach, Dey goin stay wit me all my life, Cuz dey da tings dat make me Stay real good inside.

Songs 25:10

Da way Da One In Charge stay ack all da time, He stay tight wit his peopo, An he da kine god good fo trus. His peopo, dey da ones dat keep da deal He wen make wit dem, An dey stay do Wat he wen tell um fo do.

Isaiah 27:5

But even da thorn an sticka kine peopo, Dey can come tight wit me An let me take kea dem too. Dass how dey no need fight wit me no moa, Cuz eryting goin come good wit me an dem.”

Isaiah 55:3

Go come by me, an lissen real good! Lissen, fo you guys come alive inside. I goin make one deal wit you guys Dat goin stay foeva: Da tings I wen promise King David dat I goin do Wen I tell I goin stay tight wit him foeva, I goin do all dat fo shua, Cuz I do wat I promise fo do!

Isaiah 56:2

Whoeva stay do da right ting erytime, An whoeva go all out fo stay lidat, Dey can feel good inside. Same ting, fo whoeva make da Res Day spesho fo me, An no broke um, An whoeva make shua fo no do notting bad kine, All dem goin feel good inside too.

Isaiah 56:6

Same ting fo da peopo dass not one Jew, But dey come tight wit me, Da One In Charge, Fo be my helpa guys, An get love an aloha fo me Cuz dey know wat kine god me, An come my worka guys. All da ones dat make da Res Day spesho fo me, An no broke da Rules fo da Res Day, An dat stick wit da same deal Dat I wen make wit my peopo,

Isaiah 58:13

“You guys gotta make da Res Day spesho fo me. An no go any place mo far den you suppose to go, An no jus do wateva you like do dat day, Cuz da whole day stay spesho fo me. You guys gotta tell peopo Dat da Res Day make you feel good inside, An dat stay spesho ony fo me, Da One In Charge, Fo show respeck fo me lidat. Dis, how you goin show respeck fo da Res Day: You no goin do stuff yoa way dat day. You no goin look fo ony da kine stuff you like do. You no goin talk any kine wase time stuff,

Jeremiah 50:5

Dey goin aks how fo go Mount Zion. An dey goin go dea. Dey goin go fo make one deal Fo come tight wit Da One In Charge. Dey no goin broke dis deal eva, An dey no goin foget um.

Luke 10:42

But you ony need one ting. Mary wen pick da mo betta ting, an nobody can take dat away from her.”

Hebrews 6:17

Cuz garans God like show his kids dat da plan he make fo dem no goin change eva, he wen make dat strong promise dat fo shua he goin do um.

Joshua 24:15

But if you guys no like work fo Da One In Charge, den today pick wat gods you goin work fo! Goin be da gods yoa ancesta guys wen work fo da odda side a da Eufrates Riva, o da gods fo da Amor peopo wea you live now, o wat?! But me an my ohana, us guys goin work fo Da One In Charge!”