Isaiah 54:8 - Hawaii Pidgin Bible

⁸ I wen get real mad, Jalike one flash flood, Cuz I no like wat you guys stay do dat time. I turn my face away so you no can see um Fo short time. But I get love an pity fo you guys, An I goin stay tight wit you foeva.” Dass wat Da One In Charge tell, Da One dat pay da price Fo get you guys outa trouble.

Isaiah 54:8 ပူးပေါင်းရင်းမြစ်များ

Songs 103:17

But Da One In Charge, He stay tight wit his peopo From long time befo time, An till long time from now, Da ones dat get choke respeck fo him. Da peopo dat stick wit da deal God wen make, An no foget fo do Da tings he wen tell um fo do, He goin do wass right fo dem An fo dea kids an grankids too!

Songs 103:4

He da One dat buy back yoa life Fo you stay inside his ohana An no mahke an go Inside da Deep Dark Hole. He da One dat stay tight wit you Cuz you stay his guy, Jalike he put one crown on top yoa head Wit love an aloha.

Songs 13:1

Eh! You Da One In Charge! You goin bag from me foeva, o wat?! You goin stay huhu an look da odda way?!

Songs 27:9

No hide from me! No come huhu an tell me fo go way, Cuz I yoa worka guy, An you, you da One dat erytime help me. Eh God! You da One dat erytime get me outa trouble! No bag from me, no leave me hea lidis!

Songs 30:5

Ony fo short time, he come huhu But all yoa life, he do good stuff fo you All nite, you feel jalike you goin cry, But den morning time come, An you like yell Cuz you stay feel real good inside.

Isaiah 14:1

Da One In Charge goin show pity fo da Jacob ohana, An he goin pick da Israel peopo one mo time Fo be his peopo. He goin let dem res on top dea land. Even peopo from anodda place goin come by da Jacob ohana peopo, An goin stay tight wit dem.

Isaiah 26:20

My peopo, go inside yoa room An shut da door. Hide inside dea fo litto bit Till Da One In Charge pau come huhu.

Isaiah 40:27

“You Israel peopo dat come from Jacob, How come you guys tell, ‘Da One In Charge no can see wat stay happen to me! My God no give a rip bout my rights!’

Isaiah 45:15

“Fo shua, you one god dat go hide. You da God fo us Israel peopo. Da One dat stay get us outa trouble.

Isaiah 47:6

I wen stay huhu wit my peopo. An make to my peopo Jalike dey no stay spesho fo me. I wen give my peopo to you Babylon guys, An you neva even give dem chance. You even make da ol peopo suffa plenny, An make dem carry one heavy load.

Isaiah 48:17

Dis one spesho message from Da One In Charge. Him, da One dat pay da price Fo get you guys outa trouble. He God, da Spesho One fo da Israel peopo. Dis wat Da One In Charge tell: “Me, Da One In Charge, yoa God. I da One stay teach you guys Wass da bestes kine stuff fo you. I stay show you guys da way fo go.

Isaiah 49:10

Dey no goin come hungry o thirsty. Da hot an dry sun no goin burn dem. Me, Da One In Charge, da One dat get love an aloha fo dem, I goin give dem chance, An show dem wea fo go, An bring dem wea get pukas fo watta.

Isaiah 49:13

“Erybody inside da sky, Yell cuz you stay feel good inside! An you peopo all ova da world, You stay feel good inside too! Erybody inside da mountains, Yell an sing! Cuz Da One In Charge give good kine words Weneva his peopo stay feel sore inside, An he show love an pity Fo da peopo dat stay suffa.”

Isaiah 49:26

I goin make da guys dat give you guys hard time Eat dea peopo. Dey goin come piloot Cuz dey drink dea blood jalike az was wine. Den da peopo from all ova da world goin know Dat me Da One In Charge, da One dat get you guys outa trouble. I pay da price fo do dat. I da Strong God, da One Jacob wen pray to.”

Isaiah 54:10

No matta no mo da mountain An da hills shake, Da way I stay tight wit you guys, Dat no goin change, An da deal I wen make wit you guys Fo make shua eryting stay good fo you, Dat goin still stay solid.” Dass wat Da One In Charge tell. He get love an pity fo you guys.

Isaiah 54:5

Az cuz fo my peopo, You jalike da wahine dat get husban now— Cuz jalike I yoa husban, Da One wen make you! Me, Da One In Charge, Da God Ova All Da Armies, Dass my name! I da One dat pay da price Fo get you outa trouble, I Da Good An Spesho God Fo da Israel peopo! Da God Fo Da Whole World, Dass wat dey call me!

Isaiah 55:3

Go come by me, an lissen real good! Lissen, fo you guys come alive inside. I goin make one deal wit you guys Dat goin stay foeva: Da tings I wen promise King David dat I goin do Wen I tell I goin stay tight wit him foeva, I goin do all dat fo shua, Cuz I do wat I promise fo do!

Isaiah 55:7

Fo da bad kine peopo, Da ones dat stay make trouble, Az good dey bag from da stuff Dey do befo time, An no tink bad kine stuff no moa. Mo betta dey turn back to Da One In Charge, Cuz he goin show pity fo dem. Wen dey turn back to oua God, He goin do plenny fo let dem go Fo wat dey wen do befo time, An hemo dea shame.

Isaiah 60:10

“Peopo from anodda place goin come fix yoa town walls. Dea kings goin help you guys too. Befo time, I wen stay huhu with you guys An wack you guys, But now, I like do good tings fo you guys An show you pity an love.

Isaiah 63:7

“I goin make shua nobody foget, An tell all dat Da One In Charge do Cuz he stay tight wit us guys, An I goin tell all da good tings Bout Da One In Charge Cuz he do good tings fo us guys. He give us Israel ohana peopo Plenny good kine stuffs. He show love an pity fo us guys, An he stay tight wit us guys foeva.

Isaiah 64:7

No mo nobody know wat kine god you, So nobody call you fo help um. No mo nobody try fo hang in dea wit you, Cuz you no like even look at us guys. You make us lose fight, So da bad kine stuff we do, take ova us.

Isaiah 8:17

Az why I goin wait, cuz I stay shua Da One In Charge goin come. Right now, he stay cova his face so da Jacob ohana peopo no can see him. But me, I goin stay wait fo him.

Jeremiah 31:3

From long time befo time, Me, Da One In Charge, I wen show up fo dem see me. I tell: “I get plenny love an aloha fo you guys fo long time. Dass why fo long time I stay tight wit you guys.

Jeremiah 33:26

An jalike I neva broke dat deal, I no goin broke my deal bout da Jacob ohana, o da peopo dat goin come from my worka guy David! Fo shua I goin pick guys dat come from him, fo stay king fo da peopo dat come from Abraham, Isaac, an Jacob. Az cuz I goin bring um back from prison, an I get love an pity fo dem.”

Jeremiah 51:5

Cuz Da One In Charge, da God Ova All Da Armies, He no goin bag from da Israel an Judah peopo, Jalike one husban leave his wife wen he mahke. No matta da Israel an Judah peopo get plenny blame fo wat dey do, Da way Da One In Charge see um, He da Good An Spesho God fo da Israel peopo.

Ezekiel 39:29

I no goin hide from dem no mo cuz I goin give da Israel ohana peopo my Spirit, jalike I pour watta on top dem. Az wat me Da One In Charge, da Boss, tell.”

Habakkuk 3:2

Da One In Charge, I hear wat peopo tell bout you. I get awesome respeck fo you, Fo all da awesome stuff you wen do awready. Try do um one mo time! Dese years right now, Make peopo know wat you wen do. No matta you stay huhu wit us, No foget show us guys pity!

Zekariah 1:15

But I stay real huhu wit da odda peopos dat tink notting bad goin happen to dem. Befo time I stay ony litto bit huhu, but dose guys wen make mo worse tings happen to my peopo.’

Zekariah 1:16

“Az why, dis wat Da One In Charge, Da God Ova All Da Armies, tell, ‘Now I goin go back Jerusalem side an show pity fo da peopo dea. Dey goin build my house ova dea one mo time. An da construction guys goin start fo build up Jerusalem one mo time.’

Zekariah 10:6

“I goin make da Judah ohana come strong. I goin get da Joseph ohana outa trouble. I goin bring dem back Cuz I get love an pity fo dem. Dey goin come jalike I neva leave dem. Cuz me Da One In Charge dea God, An I goin help dem wen dey pray to me.

2 Tessalonika 2:16

Da One In Charge a us guys, Jesus Christ, an God oua Faddah too, dey get love an aloha fo all us guys. God get one good heart, an he no stop give us guys good kine words an help us wait till da good tings happen.

1 Timoty 1:16

But Jesus Christ wen give me chance, no matta I wen do all dat bad kine stuff. Cuz he like use me fo show da odda peopo how he wait fo dem long time too. I jalike da numba one picha fo da peopo dat bumbye goin trus Jesus, an get da real kine life dat goin stay to da max foeva!