Isaiah 51:10 - Hawaii Pidgin Bible

¹⁰ You da One wen make da ocean dry up, No matta stay deep, an get plenny watta. Was you wen make one road Inside all da deep place, Fo yoa peopo go ova da odda side Afta you get da ones outa Egypt dat you wen free up.

Isaiah 51:10 ပူးပေါင်းရင်းမြစ်များ

Songs 106:10

Wen da peopo dat hate da Israel guys Like hurt dem, God get um outa trouble. Da ones dat stay agains dem, He neva let dem go afta his peopo.

Songs 106:9

God tell da Red Sea Fo no ack jalike one ocean, An da place come dry. He make da peopo walk On da floor a da ocean Jalike dey walk thru da boonies.

Songs 74:13

Was you wen split Da watta inside da sky From da watta inside da ocean, Cuz you strong! Was you wen smash Da heads a da sea monstas On top da watta.

Songs 77:19

Da way you wen go was right thru da ocean. Yoa road, wea get da big watta, Nobody know az was yoa footprints.

Outa Egypt 14:29

But da Israel peopo, dey walk thru da Red Sea from one side to da odda side, an da groun stay dry, an da watta stay jalike two wall fo dem, right side an lef side.

Outa Egypt 15:13

“You stay wit yoa peopo, An show us wea fo go! You wen pay da price fo get us outa trouble! You strong, dass why you goin help us go Da good an spesho place wea you stay.

Isaiah 11:15

Da One In Charge goin wipe out Da skinny part a da Red Sea, Egypt side. He goin put out his hand ova da Eufrates Riva An bring one real hot strong wind, Fo make um come seven small stream, Fo peopo go walk on top da dry part wit slippas.

Isaiah 11:16

Goin get one big wide easy road Fo God peopo dat still yet stay alive, An dat neva mahke inside Assyria, Jalike da time da Israel peopo come outa Egypt.

Isaiah 35:10

Da ones, Da One In Charge wen pay da price fo dem, Dey goin come back to Mount Zion. Dey goin go inside da Temple Fo Da One In Charge, An dey goin dance an sing An feel good inside all da time. All dat goin be jalike one crown on top dea head. Wen dey stay go, dey feel good inside Mo an mo erytime. Befo time, dey feel sore inside plenny. But all dat gone awready!

Isaiah 35:8

Dat place, one build up road goin stay ova dea. Peopo goin call um “Da Road Fo Go By Da God Dat Stay Good An Spesho.” Goin be fo da peopo dat stay tight wit God. Da peopo dat do bad kine stuff dat make um so dey no can pray, Dey no can go on dat road. But anybody dat go dat way, Even da stupid ones, Dey no goin get lost.

Isaiah 35:9

No mo lion o wild kine animal dat like eat you Goin come nea dea. Ony da peopo dat God wen get um outa trouble, Dey da ony ones goin use dat road.

Isaiah 42:15

I goin bus up da mountains an hills, An make eryting dat grow on top dem come all dry. I goin make da rivas come down low Fo dem get islans in da middo. I goin dry up all da ponds.

Isaiah 43:16

Dis one message from Da One In Charge, Da One wen make one road in da middo da Red Sea, One place fo da Israel peopo go Inside da danger watta.

Isaiah 50:2

Wen I wen come fo help you guys, how come no mo nobody stay hea? Wen I wen call, how come nobody ansa me? You tink I no mo powa Fo get you guys outa trouble, o wat? Tink bout dis: I ony need fo tell da watta, ‘Go! No stay!’ An I make da ocean watta come dry, An I can make da rivas come one desert. Dea fish mahke, An come haunas cuz no mo watta.

Isaiah 62:12

Dose peopo he goin bring, Odda peopo goin call dem “Da Peopo Dat Stay Spesho Fo Da One In Charge, Da Peopo Dat Da One In Charge Pay Da Price Fo Get Um Outa Trouble.” An peopo goin call Jerusalem, “Da Town Da One In Charge Wen Look Fo, Da Town Da One In Charge No Goin Leave.”

Isaiah 63:9

Erytime his peopo suffa, he suffa too. He stay right dea wit dem, Jalike he one angel messenja guy Fo get dem outa trouble. He pay da price fo get um outa trouble, Cuz he get love an aloha fo dem An he pity dem. Jalike from long time befo time He stay pick dem up an carry um foeva.

Micah 7:15

Den Da One In Charge tell: “I goin show you guys awesome kine stuff I goin do, Jalike da time you guys wen come outa Egypt.

Zekariah 10:11

Dey goin go thru trouble jalike thru one ocean. But I goin make da wild ocean waves come quiet. An da deep places inside da Nile Riva goin come dry. Da Assyria peopo get big head, but I goin bring um down, An da Egypt king goin get wipe out.