Isaiah 5:13 - Hawaii Pidgin Bible

¹³ Dass why my peopo goin come prisonas An go anodda land, Cuz dey donno notting. Dea importan peopo goin mahke Cuz dey no mo food fo eat, Da odda peopo goin mahke Cuz dey no mo notting fo drink.

Isaiah 5:13 ပူးပေါင်းရင်းမြစ်များ

2 Kings 17:6

Wen Hoshea stay king fo nine year, da Assyria king take ova Samaria town, an make da Israel peopo go Assyria side fo live. He make some a dem live Halah side, some a dem by da Habor Riva dat go by Gozan, an da res inside da towns wea da Mede peopo live.

Smart Guys 10:21

Da peopo dat stay do wass right, Wat dey tell, az jalike food fo da inside fo plenny peopo. Da stupid head kine peopo wit attitude, Dey goin get cut off from God foeva, Cuz dey no tink strait.

Isaiah 1:3

Da cows know who own um, An da donkeys know wea dea owna give um food. But da Israel peopo, dey donno me. Even my peopo no undastan notting bout me.”

Isaiah 1:7

You guys land, nobody can live dea. Yoa big towns stay all burn up. You see da odda peopo take away All yoa food from yoa fields an eat um. An peopo from odda places take um ova.

Isaiah 23:9

Was Da One In Charge, Da God Ova All Da Armies! He da One plan um Fo shame all da awesome peopo dat get big head, An make erybody in da world lose face Dat wen get respeck befo time.

Isaiah 27:11

Da Israel peopo, dey jalike small branches From da trees dat come dry an dey broke. Da wahines come pick um up fo make fire. Az cuz da Israel peopo, dey not da kine peopo Dat undastan stuff, Dass why God dat wen make dem No feel pity fo dem. He no like do notting fo dem.

Isaiah 3:1

Den Isaiah tell, “Look! Da Boss, Da One In Charge, Da God Ova All Da Armies, He goin take away all da stuff From da peopo inside Jerusalem an Judah, All da stuff dey need fo take kea dem, All da food fo eat an da watta fo drink.

Isaiah 3:3

All da army captains, All da odda kine importan peopo, All da akamai guys dat tell da peopo wat fo do, All da guys dat get da smarts fo make real nice tings wit dea hands, An all da guys dat undastan how fo make magic.

Isaiah 44:19

Nobody stop fo tink. Nobody know o undastan. Dey no tell, ‘Wassup?! Half dat wood, I use um awready fo make fire. I even bake my bread on top da charcoal, An cook my meat an eat um. So, wot?! If I make one god from da odda half, Az pilau, dat! No good if I go down fo pray In front one piece wood!’

Isaiah 49:21

Den you Jerusalem peopo Goin tink, “Eh! Who give me all dese kids?! Da Babylon guys wen take away my kids, An I ol, an no can born kids no moa. I was one prisona, An dey throw me outa my house. So! Who raise dese kids? No mo nobody hea wit me. So wea dese guys come from?”

Isaiah 65:13

Az why Da One In Charge a me tell dis: “You know wat? My worka guys goin eat, But you guys goin stay hungry. My worka guys goin drink, But you guys goin stay thirsty. My worka guys goin stay good inside an dance an sing, But you guys goin come shame.

Jeremiah 14:18

If I go out da country side, I see da guys dat da army guys wen kill wit swords. If I go aroun inside Jerusalem town, I see all da peopo dat stay sick Cuz no mo food. Da guys dat talk fo God an da pries guys Stay go all ova da land fo do dea work, But dey donno wat dey stay do!’ ”

Jeremiah 14:3

Dea alii guys sen dea worka guys fo go carry watta. Dey go da watta storage places, But no mo watta ova dea. Dey come back wit empty watta jars. Dey shame an dey lose face, Az why dey cova dea head.

Jeremiah 8:7

Even da stork bird Know wen az time fo fly away. An da dove, an da small swallow, an da heron bird, Dey all know wen az time fo go away. But my peopo donno wat stay right fo do No matta Me, Da One In Charge tell um wat dey gotta do.”

Sad Song 4:9

Mo betta mahke from war, Den mahke cuz no mo notting fo eat. Dey stay wasted cuz dey real hungry Cuz no mo notting fo eat from da fields.

Ezekiel 7:12

Now, da time come awready! Da guy dat buy stuff betta not throw party cuz he get um cheap, an da guy dat sell stuff betta not ack jalike he stay sad inside cuz he pay too much. Cuz I stay huhu, an I goin give all dem guys lickins.

Hosea 4:6

My peopo stay coming wipe out Cuz dey donno me. An cuz you pries guys no like know me, Az why I no like let you guys be my pries guys. You guys foget da teaching Dat come from me, yoa God, Da One In Charge, Az why I goin foget yoa kids.

Amos 8:13

“Dat time, even da good looking young girls an da young guys goin pass out cuz dey so thirsty fo hear wat Da One In Charge tell.

Luke 19:44

Dey goin wipe out you guys, you an yoa kids inside dea. Dey not goin let one stone stay on top da odda. Cuz you guys neva like know wen God goin show up.”

Rome 1:28

Cuz dey tink, “Mo betta we no stay tight wit God fo real kine!” Az why God let um ack how dey like ack. An dey ony tink fo do no good kine stuffs. Dass how dey ack.

2 Peter 3:5

But you know, get one ting dem buggahs make deaf ear bout: Long time befo time, wen eryting wen start, God wen command an get da sky. Den God wen start wit da watta fo make da land an da watta diffren kine. He make da land come up from da watta.