Isaiah 45:22 - Hawaii Pidgin Bible

²² “All you peopo from da mos far places all ova da world, Turn aroun an come by me Fo me get you guys outa trouble, Cuz I God. No mo anodda god, ony me.

Isaiah 45:22 ပူးပေါင်းရင်းမြစ်များ

2 Records 20:12

You oua God, so try punish dem! Cuz us no mo powa fo go agains dis big army dat stay come fo attack us guys. Us guys, we donno wat we gotta do, but we trus you fo help us!”

Songs 22:17

Can even count all my bones. Dem guys dat stay agains me, Dey give me stink eye, an dey laugh at me.

Songs 22:28

Cuz you Da One In Charge! You da king! You da One dat get da right Fo be in charge a all da nations!

Songs 65:5

Wen we yell to you fo help us guys, You stay do real awesome an unreal tings Cuz you da God Dat stay get us outa trouble. Even da peopo dat live Da odda side a da world An inside da far oceans, Dey stay trus you.

Songs 65:6

You da one make da mountains Stay wea dey stay, cuz you strong. Wen you make ready fo fight, You get plenny powa.

Isaiah 30:15

But dis message come from Da One In Charge a me, Da One dat stay good an spesho fo da Israel peopo: “Fo you guys get outa trouble, You gotta come back my side, Fo come so notting bodda you. Fo you guys come strong inside, You gotta stay quiet an trus me.” But you guys still no like lissen!

Isaiah 41:22

Bring yoa idol kine gods in front me Fo dem tell us guys wat goin happen bumbye. Let dem tell us wat tings wen happen befo time, Fo us guys tink bout um An tink wat goin come bumbye cuz a dat. O da idol kine gods tell us wat goin come layta,

Isaiah 43:6

I goin tell da peopo from da north side, ‘Let my peopo come!’ An I goin tell da peopo from da south side, ‘No hold dem back!’ Bring all my boys from far places, An my girls from da mos far place inside da world.

Isaiah 45:21

Eh, you guys dat pray to da wood kine gods! Tell me how come you do dat. Go come ova hea by me Fo us figga out wat you like tell me. So! Who wen let peopo hear all dis From befo time, long time befo time? Az was me, Da One In Charge, I da One wen tell all dis. Cuz no mo anodda god dat stay fo real, I da ony One! I da God dat do da right ting erytime, An get peopo outa trouble. No mo anodda one can do dat, ony me.

Isaiah 45:5

Me, Da One In Charge! No mo anodda One. No mo anodda God, ony me. I goin make you come strong, Cyrus, Ready fo fight, No matta you donno who me.

Isaiah 49:12

Look! Da peopo goin come from far places. Some a dem come from da north, Some from da west, Some from da south side a Egypt.

Isaiah 49:6

So now, dis wat Da One In Charge tell: “But dass ony one small kine job, Fo you bring back by me Da ohanas dat come from Jacob, An da ones from da Israel ohanas Dat I wen take kea. Mo den dat, I goin make you Jalike one light fo da peopo dass not Jew guys Fo you come da one Dat goin get peopo all ova da world outa trouble fo me, Even da peopo from da mos far places inside da world.”

Isaiah 52:10

Da One In Charge goin show how strong him Cuz he good an spesho! An all da peopo inside all da countries, Even da ones inside da mos far places on top da earth, Dey goin see How oua God get his peopo outa trouble!

Isaiah 55:5

An den, I tell dat guy, ‘You goin tell da nations fo come, Dat you donno befoa. An da peopo in da odda countries Dat donno you, Dey goin run to you. Az cuz me Da One In Charge, yoa God, Da Good An Spesho One fo da Israel peopo, Da One make you come awesome.’ ”

Isaiah 55:6

Go all out fo know Da One In Charge Right now, wen he let you guys meet him. Call him fo help you Now, wen he stay nea.

Isaiah 60:3

Da peopos from plenny countries Goin come by you guys fo see da light you get. King guys goin come fo see da light too, Cuz stay bright, Jalike da sun come up fo you.

Isaiah 66:18

“But me, I know Eryting dey do, an eryting dey tink. I ready fo come Fo bring togedda all da diffren peopos An all da diffren languages. Wen dey come, dey goin see How awesome I stay.

Jeremiah 33:16

“Dat time, da Judah peopo no goin be slaves no moa. Da Jerusalem peopo goin make house An no need worry somebody goin hurt um. Dey goin give Jerusalem town one name dat mean, ‘Da One In Charge, da one dat do right fo us guys erytime.’

Hosea 13:4

Da One In Charge tell, “But me Da One In Charge, I yoa God. I wen bring yoa ancesta guys outa Egypt. You guys betta not know any odda god, ony me. Me, da ony One can get you guys outa trouble.

Micah 5:4

Da leada goin stan up an take kea his peopo, Jalike one sheep guy take kea his sheeps. He goin stay strong cuz he stay tight wit Da One In Charge, An cuz he know wat kine god, his God, Da One In Charge. Den da peopo goin live dea, An nobody goin bodda dem. Cuz peopo all ova da world Goin know dat da Israel leada guy real importan.

Micah 7:7

“But me, I watch fo Da One In Charge. I wait fo God cuz he goin get me outa all dis trouble. My God goin lissen me.

Zekariah 12:10

“Me, Da One In Charge, goin make da David ohana an da Jerusalem peopo like do good kine stuff fo odda peopo, an dey goin pray to God fo help dem too. Dey goin look me, da guy dey wen stab. Dey goin stay real sore inside, jalike somebody stay sore cuz dea firs boy dat born wen mahke.

John 6:40

Jalike I wen tell: dis wat my Faddah like, da One dat sen me: Erybody dat see me his Boy, an trus me, dey goin get da real kine life dat goin stay to da max foeva! An I goin make dem come back alive wen da world goin come pau.”

Titus 2:13

Same time us guys stay good inside cuz we wait an trus dat Da One In Charge a us guys, Jesus Christ, goin come back. Goin be awesome! Jesus, he wen take us outa da bad kine stuff we stay do. He God, you know, an he get powa ova eryting!

Hebrews 12:2

Da whole time us guys stay run da race, we look at one guy ony, dass Jesus. He da One dat help us start fo trus God, an da One dat help us fo trus God to da end. Wen he wen suffa on top da cross, he hang in dea. Neva bodda him dat dey make him come shame. He do dat cuz he know dat bumbye he goin come real good inside. An in da end, he sit down in da mos importan place, by God throne, on da right side.

2 Peter 1:1

Aloha! Dis me, Simon Peter. I one worka guy fo Jesus Christ, da Spesho Guy God Wen Sen. He wen sen me all ova da place fo tell peopo bout him. I stay writing dis letta fo you guys dat trus Jesus Christ. God wen let you guys trus Jesus Christ cuz he erytime do da right ting. Dass worth plenny fo you guys, jalike fo us guys. He oua God, an he da One dat take us outa da bad kine stuff we stay do.