Isaiah 45:17 - Hawaii Pidgin Bible

¹⁷ But you Israel peopo, you goin get outa trouble Cuz you stay tight wit Da One In Charge. An da way he get you outa trouble, goin be foeva! You no goin get shame, An nobody goin make you come shame no moa, foeva!”

Isaiah 45:17 ပူးပေါင်းရင်းမြစ်များ

Songs 103:17

But Da One In Charge, He stay tight wit his peopo From long time befo time, An till long time from now, Da ones dat get choke respeck fo him. Da peopo dat stick wit da deal God wen make, An no foget fo do Da tings he wen tell um fo do, He goin do wass right fo dem An fo dea kids an grankids too!

Songs 25:3

Same ting fo all da peopo dat stay wait fo you Cuz dey shua you goin help um. No let dem come shame too! But da back stabbas Dat do um cuz dey like do um, Make dem come shame!

Isaiah 12:2

“Fo shua, he da God get me outa trouble. I goin trus him an no stay sked. Cuz Da One In Charge, da One make me strong An give me powa. He come awready, da One get me outa trouble.”

Isaiah 26:4

Trus Da One In Charge foeva an eva, Cuz if you stay tight wit oua God, Dass Da One In Charge a us, Jalike you get one strong an solid rock dat stay foeva.

Isaiah 29:22

Da One In Charge, da One dat wen get Abraham outa trouble, tell dis bout da Jacob peopo, “Now, da Jacob peopo No goin come shame no moa. Dey no need get sked.

Isaiah 33:6

All da time you stay alive, Da One In Charge goin be jalike one solid foundation fo you. He goin do plenny good tings fo you— Get you outa trouble, Help you know wat fo do erytime, Help you know how fo do stuff. Wen you Jerusalem peopo get respeck Fo Da One In Charge fo real kine, Goin be jalike az rich kine stuff he give you.

Isaiah 45:25

But wen all da peopo Dat come from oua ancesta Israel Stay tight wit Da One In Charge, Den dey goin get um right wit him. An dey goin tell good stuff bout him.”

Isaiah 49:23

You Jerusalem guys, You goin get king guys fo take kea yoa kids An be jalike dea hanai faddahs, An da alii wahines goin be Jalike da muddahs fo breas feed yoa kids. Dey all goin go down Wit dea face on top da groun Fo show respeck fo you Jerusalem guys, Jalike dey stay eating da dirt on top yoa feet. Den, you guys goin know dass me, Da One In Charge. Da peopo dat wait fo me, fo see wat I goin do, No way dey goin come shame!”

Isaiah 50:7

Da One In Charge a me, He da One help me. Dass how come I no come shame Cuz a wat dey do. Dass why I stick wit wat I goin do, An I no goin change my mind. I stay shua dat I no goin come shame.

Isaiah 51:6

Look up to da sky. Look down at da earth. Da sky goin go way, jalike smoke. Da earth goin come boros, jalike da boros clotheses. All da peopo on top da earth goin mahke, jalike small bugs. But I goin get my peopo outa trouble all da time. I still yet goin do wass right fo da peopo, all da time.

Isaiah 51:8

Cuz dose odda peopo no goin stay long time, Dey goin be jalike clotheses da bugs goin eat. Dey goin be jalike wool kine cloth dat da moth worm goin eat. But I stay do da right ting all da time. I get my peopo outa trouble, Dem, an dea kids an grankids, foeva.’ ”

Isaiah 54:4

“Eh my peopo! No sked, cuz you no goin come shame no moa. Cuz nobody goin make you come shame. Jalike da wahine dat no mo her kids, But now she get um, She foget her was shame Befo time wen her was young. Jalike she goin foget How bad peopo wen make her feel Wen her no mo husban.

Isaiah 54:8

I wen get real mad, Jalike one flash flood, Cuz I no like wat you guys stay do dat time. I turn my face away so you no can see um Fo short time. But I get love an pity fo you guys, An I goin stay tight wit you foeva.” Dass wat Da One In Charge tell, Da One dat pay da price Fo get you guys outa trouble.

Isaiah 60:19

You guys no goin get da sun fo light day time. Da moon no goin shine fo make um bright fo you guys. Me, Da One In Charge, I goin be da light fo you guys foeva. I yoa God, an I goin make awesome kine fo you guys.

Jeremiah 31:3

From long time befo time, Me, Da One In Charge, I wen show up fo dem see me. I tell: “I get plenny love an aloha fo you guys fo long time. Dass why fo long time I stay tight wit you guys.

Jeremiah 33:16

“Dat time, da Judah peopo no goin be slaves no moa. Da Jerusalem peopo goin make house An no need worry somebody goin hurt um. Dey goin give Jerusalem town one name dat mean, ‘Da One In Charge, da one dat do right fo us guys erytime.’

Hosea 1:7

Mo betta, I goin show pity fo da Judah ohana, an I goin get dem outa trouble. But I no goin do dat wit bows an arrows, o swords, o war, o wit da guys dat ride da horses. I dea God, Da One In Charge, so I no goin need all dat fo me get um outa trouble.”

Jonah 2:9

But me, I like make one sacrifice fo you bumbye, An sing an tell you dat you da greates! Da ting I wen promise you dat I goin do, I goin do um! Cuz you Da One In Charge, An you da One wen get me outa trouble!”

Zefaniah 3:11

Dat time, you guys no goin get shame, Fo all da wrong kine stuff you guys wen do agains me! Cuz den, I goin take away from Jerusalem town All da peopo dat feel good cuz dey get big head. You guys no goin ack high makamaka no moa, On top da hill dat stay spesho fo me.

John 10:28

I goin make dem alive to da max foeva, an no come cut off from God. An nobody can grab dem away from me.

John 5:24

“Dass right! An I tell you guys dis: Whoeva hear wat I tell, an trus God dat wen sen me, dey get da real kine life dat goin stay to da max foeva! God no goin punish dem. Dey no stay mahke inside no moa. Dey stay alive now fo real kine.

John 6:40

Jalike I wen tell: dis wat my Faddah like, da One dat sen me: Erybody dat see me his Boy, an trus me, dey goin get da real kine life dat goin stay to da max foeva! An I goin make dem come back alive wen da world goin come pau.”

Rome 10:11

Jalike da Bible tell, “Whoeva trus God, no way dey come shame, cuz God goin do eryting wat he tell.”

Rome 11:26

Dass how God goin take all da Israel peopo outa da bad kine stuff dey stay in, jalike God tell inside da Bible befo time: “Goin get one guy dat goin take us outa da bad kine stuff, He goin come from Jerusalem, Zion side. He goin make da peopo dat come from Jacob tink diffren kine, Dem guys, dey ack jalike God no matta, Bumbye, dey no goin tink lidat no moa.

Rome 8:1

So den, God no goin punish da peopo dat stay tight wit Jesus Christ!

2 Tessalonika 2:16

Da One In Charge a us guys, Jesus Christ, an God oua Faddah too, dey get love an aloha fo all us guys. God get one good heart, an he no stop give us guys good kine words an help us wait till da good tings happen.

Hebrews 5:9

Christ wen come perfeck, an now he da One dat take all da peopo dat lissen him outa da bad kine stuff dey stay do. An he help um stay perfeck lidat foeva.

1 Peter 2:6

Cuz inside da Bible, God tell, “Eh, try look. I put down da corna block inside Zion, Dass da one I wen pick. Dat stone real importan fo me. Anybody dat goin trus him plenny, Dey no need worry notting.”

1 John 4:15

Whoeva tell, “I stay shua dat Jesus, he God Boy,” God stay tight wit dem, an dey stay tight wit God too.