Isaiah 42:13 - Hawaii Pidgin Bible

¹³ Da One In Charge, he goin out fo fight Jalike one strong army guy. Jalike one army guy he stay ready fo fight, An he yell. He stay huhu, an he yell fo start fo fight Da guys dat stay agains him, An he goin be da winna ova dem!

Isaiah 42:13 ပူးပေါင်းရင်းမြစ်များ

Songs 118:16

Da One In Charge, he put up His right hand fo show he da winna! Da One In Charge, He get plenny powa fo shua! Dass why us guys win!”

Songs 78:65

But den, jalike da Boss Up Dea Wen wake up afta he sleep, Jalike one army guy drink wine, But den he wake up ready fo fight.

Isaiah 26:11

Da One In Charge, dat kine peopo no can see notting! Dey donno dat you stay put up yoa hand awready Fo use yoa powa fo punish dem! I like dey come shame wen dey look An see dat you stay go all out fo yoa peopo, An jalike you make da fire burn up an kill Da peopo dat stay agains you.

Isaiah 31:4

Dis da ting Da One In Charge tell me: “Jalike how da lion make noise Wen he catch one sheep, An jalike peopo call plenny sheep guys Fo come help dem catch da lion, But da lion, he no sked dem. He no kea dat dey stay yell, No bodda him dey make big noise. Same ting, wen Da One In Charge, Da God Ova All Da Armies, come, He goin come down an fight, An no sked, jalike da lion, On top da hill wea da Temple stay.

Isaiah 37:32

Cuz da res a da peopo from Jerusalem goin come. Goin get peopo dat da Assyria guys leave behind wea da Temple stay. Da One In Charge, Da God Ova All Da Armies, He goin do um, cuz az wat he fo real kine like do.

Isaiah 63:15

Da One In Charge! Look down from da sky From da place you live up dea, Yoa Good An Spesho Place, Dat show how awesome you stay! Look down fo see wat stay happen! Befo time you wen go all out fo us guys. But now, you no give a rip! Befo time, you wen use yoa powa fo help us guys. But now, you no do notting. You wen feel plenny love an pity fo me befo time, But now, you stay hold back from me!

Isaiah 66:14

“Wen you guys see all dis, Yoa heart goin feel jalike stay jump Cuz you stay real good inside! An yoa body goin feel real good Jalike wen da new grass come up. Da peopo dat work fo Da One In Charge, Dey goin know wat kine powa he get. But da peopo dat stay agains Da One In Charge, Dey goin find out how feel Wen he had it wit wat dey do.

Isaiah 9:7

He goin come da leada Fo da govmen, An he goin make eryting come So notting bodda nobody, An fo shua he goin do dat. He goin be da king on top da throne Jalike King David, his ancesta guy. He goin judge erybody da right way, An he goin do da right ting erytime. From da time he come da king, He goin make shua he stay king foeva. All dis goin happen Cuz Da One In Charge, Da Boss Ova All Da Armies, Goin make shua dis goin happen.

Jeremiah 25:30

“You, Jeremiah, go talk fo me to all da diffren peopos. Tell all dis stuff agains dem, an tell dem: “ ‘Jalike one lion dat stay ready fo hunt, Da One In Charge goin make big noise from da sky. He goin make thunda From da place dat stay spesho fo him. He goin make one big noise fo make da sheeps come sked his peopo. An he goin yell plenny, Jalike da guys dat step grapes fo make wine. He goin yell agains all da peopo dat live on top da earth.

Hosea 11:10

“Bumbye da Israel peopo goin come follow me, Da One In Charge. I goin make one loud noise jalike one lion. Wen I make dat loud noise, My peopo goin come from da islans on da west side, sked an shaking!

Joel 3:16

Da One In Charge goin make one big noise From his temple on top Mount Zion. His voice goin soun real loud from Jerusalem. Da earth an da sky goin shake. But Da One In Charge goin be jalike one place fo hide fo his peopo, Jalike one strong place wea da Israel peopo can hide.

Amos 1:2

Dis wat Amos tell: “Da One In Charge Up Dea Inside Da Sky, He make one big noise from Zion Hill! He talk strong from Jerusalem town, jalike thunda! Wen he do dat, da places wea da sheep guys go fo find grass, No mo grass, notting! An da trees on top Mount Carmel all dry up too.”

Nahum 1:2

Da One In Charge, da Boss, He one jealous God. He no like fo peopo pray to odda gods. He pay back peopo fo wat dey do. He stay real huhu. Fo shua, he pay back da peopo dat stay agains him. He had it wit wat da peopo do dat go agains him.

Zefaniah 1:18

Dea silva an gold no can get dem outa trouble dat day Wen Da One In Charge go wild wit dem. He goin be jealous, jalike one fire Dat goin burn up all da peopo inside da world. Cuz az fo real, dat he goin bring one skery end Fo all da peopo dat live on top da earth!”

Zefaniah 3:8

Da One In Charge tell: “Az why wait fo me, Fo da day I goin stan up fo poin finga da Jerusalem peopo. Cuz I make up my mind awready Fo bring togedda all da peopos an dea kings. An I goin make dem know dat I stay real huhu wit dem. I goin burn up all da peopo inside da world, Cuz I go all out fo no let um go down in front odda gods!