Isaiah 30:12 - Hawaii Pidgin Bible

¹² Dass why da One dat stay good an spesho fo da Israel peopo tell dis: “You guys, you ack Jalike dis stuff I stay tell, no good! An you guys stay shua Dat you goin come out okay If you make hard fo peopo An bulai dem! Az how you guys tink.

Isaiah 30:12 ပူးပေါင်းရင်းမြစ်များ

Songs 52:7

“Check out dis guy! He neva like aks God fo take kea him. He tell, ‘Fo shua I can handle!’ Cuz he get plenny money. He tink he strong, cuz he know He can jam up eryting!”

Songs 62:10

No tink you goin come rich Wen you presha out peopo Fo give you money, O wen you bus um up Cuz dey no give you money, O wen you rip off dea stuffs. An if bumbye you get plenny money, No tink dass da mos importan ting.

Smart Guys 24:2

Cuz da bad guys ony like tink How fo hurt somebody. Da way dey talk, Az ony fo make trouble.

Isaiah 26:21

Cuz you know wat?! Da One In Charge stay come out from his place Fo punish da peopo on top da earth Fo all bad kine stuff dey do. Den da earth goin show All da peopo dat wen bleed an mahke dea, Da ones dat wen murda dem No can hide um no moa.

Isaiah 28:15

You Jerusalem guys talk big! You guys tell, “Us guys wen make one deal fo us no mahke. We get promise fo no go da Mahke Peopo Place! Wen da army guys come hea, No matta dey go all ova jalike da big watta, Dey no goin come wea us guys stay. Cuz us guys know how fo bulai dem So dey no goin hurt us. We no goin tell um da trut, An dass how we goin stay outa trouble.”

Isaiah 3:14

Da One In Charge da One goin judge da older leadas An da odda ones dat stay lead his peopo. He tell dem, “You, jalike da guys Dat wen bus up my grape fields. All da stuff you guys wen rip off From da peopo dat no mo notting, All dat stuff you guys take um Inside yoa houses.

Isaiah 3:15

Wat you guys tink Wen you go smash my peopo, aah?! Da peopo dat no mo notting, How come you go rub dea face inside da dirt, aah?!” Da One In Charge, Da God Ova All Da Armies, Dass wat he tell.

Isaiah 30:1

Dis, one message from Da One In Charge: “Bummahs! to da hard head peopo Dat stay go agains me! Dey make one plan an do um, But da plan, not from me. Dey make one deal wit peopo from anodda country, But my Spirit neva tell dem fo do dat. Dey do one bad ting, Den anodda mo worse ting.

Isaiah 30:7

Da Egypt peopo, even if dey try fo kokua da Judah peopo No goin help da Judah peopo notting. Az why I call da Egypt peopo, ‘Da proud fake crocodile Dat ony make plenny noise!’ ”

Isaiah 47:10

You Babylon guys, you stay shua Dat wen you guys do bad kine stuff You stay okay. Cuz you tell, ‘Nobody see me.’ You tink you know plenny stuff An know wat fo do erytime. Inside, you tell, ‘Me, da ony one! No mo nobody jalike me, ony me!’

Isaiah 5:24

“Az why, wen dose peopo make lidat, Dey goin come poho, Jalike one plant wit da root all rotten, An da wind blow away all da flowas jalike dus, Jalike da fire burn up da junks from da wheat, An da dry grass no mo wen stay burn. Az cuz dey no take da Rules Dat Da One In Charge, Da God Ova All Da Armies, teach um, An dey ack jalike wateva Da One In Charge tell dem, Stay no good! No matta he da Good An Spesho God fo da Israel peopo,

Isaiah 5:7

“So, az da story bout dis peopo! Da One In Charge, Da God Ova All Da Armies, His grape field, dass da Israel peopo! An da plantation dat make Da One In Charge feel good inside Wit plenny love an aloha, Dass da peopo from da Judah districk. Da One In Charge wait fo peopo Fo judge da right way, But dey ony stay kill each odda! He wait fo peopo fo do da right ting erytime, But dey ony make each odda yell fo somebody help dem.”

Isaiah 59:13

Us go agains Da One In Charge, An show he no can trus us guys. Us no follow oua God. Us tell “Laytas” to him. Us tell peopo az okay Fo make any kine to odda peopo An go agains odda peopo. Us tink how fo bulai peopo, An teach odda peopo how fo do da same ting.

Isaiah 59:4

No mo nobody fo tell peopo Dey betta do da right ting. Wen peopo talk in front da judge, Nobody tell um da trut. Dey tink az good, Fo tell stuff dat no mean notting, An talk bout wase time kine stuff, An make trouble, An cuz a dat, bad kine stuff happen. Jalike one wahine come hapai, An cuz a dat, she born one bebe.

Isaiah 7:9

Da main town inside Israel, dass Samaria, Da main guy inside Samaria, dass Remaliah boy. If you guys no stay shua bout dis, Az cuz you no stay solid bout um.”

Isaiah 8:6

“Dis Judah peopo tink Dat wat I stay do fo dem, az no good. No matta I do good tings fo dem, Jalike I give um da watta Dat run slow inside da Siloam watta place. But dey ony feel good cuz dey hear Bout wat goin happen To Rezin da king fo Aram, An to Remaliah boy da king fo Israel.

Jeremiah 13:25

Dis wat goin happen to you guys. I wen measure awready wat goin happen, Cuz you guys wen foget me, Da One In Charge. You wen trus da fake idol kine gods.

Amos 2:4

You Judah peopo betta lissen too! Dis wat Da One In Charge tell: “Ova an ova, da Judah peopo wen go agains me. Az why no way I goin let um go an no punish dem! Cuz me, Da One In Charge, I wen give um da Rules, But dem, dey ack jalike da Rules no matta! Dey no like do wat I wen tell dem fo do. Jalike dea ancesta guys, Dey let da fake gods make um go da wrong way.

Luke 10:16

Jesus tell his guys, “Whoeva hear you, dey hear me too. Whoeva tell ‘Laytas’ to you, dey tell ‘Laytas’ to me too. Whoeva tell ‘Laytas’ to me, dey tell ‘Laytas’ to da One dat wen sen me.”

1 Tessalonika 4:8

So den, da guy dat tell “Laytas” to all dis stuff I stay tell you guys, az not jalike he tell “Laytas” to one guy, he tell “Laytas” to God! An God da One put his Spirit in charge a you guys. Dass da Spirit dat make you guys go all out fo God.