Isaiah 28:1 - Hawaii Pidgin Bible

¹ Bummahs! Samaria town, Efraim side, Look jalike get one nice haku lei On top a da Samaria hill, Ova one valley wea eryting grow good! But dat lei, jalike da good looking flowas Stay come all dry up now. Az cuz da Efraim peopo get big head An dey stay piloot all da time! Plenny rich stuff come from dat valley, But da peopo from dea ony drink up da wine, Till dey no can even stan up!

Isaiah 28:1 ပူးပေါင်းရင်းမြစ်များ

2 Kings 15:29

Wen Pekah stay king Israel side, da Assyria king Tiglat-Pileser come back attack one mo time. He take ova five town: Ijon, Abel Bet-Maakah, Janoah, Kedesh, an Hazor. He take da Gilead an Galilee lands too, an all da Naftali land, an make da peopo dea give up dea land an go Assyria side.

2 Records 28:6

Ony take one day fo da Israel king Pekah, Remaliah boy, an his guys fo kill 120,000 Judah army guys, an all a dem, guys dat know how fo fight real good. All dat happen, cuz da Judah peopo wen bag from Da One In Charge, da God fo dea ancesta guys.

Smart Guys 23:29

Who yell “Bummahs”?! Who get sore head?! Who like beef all da time?! Who grumble?! Who get cut an donno how come?! Who get red eye?!

Isaiah 28:7

But nowdays, even dose guys Fall down cuz dey drink too much wine An no can walk good cuz a da beer! Even da pries guys an da guys dat talk fo God, Dey fall down cuz a da beer An no can figga right cuz a da wine. Wen God like show um someting jalike one dream, Dey no undastan um an dey tell um az wrong Wen dey gotta judge wass right an wass wrong, Dey no can do um, cuz dey stay jam up.

Isaiah 5:11

“Bummahs! to da guys Dat get up early in da morning Fo go all out fo da booze, Dey stay up late nite time, Till jalike dey stay on fire from da wine.

Isaiah 5:22

“Bummahs! fo da guys dat erytime like drink wine, An da real smart guys fo mix da booze.

Isaiah 8:4

Az cuz befo dis small boy learn how fo tell ‘Daddy’ o ‘Mama,’ da Assyria army guys goin steal all da rich kine stuffs inside Damascus town an Samaria town. Dey goin bring um to da king fo Assyria.”

Isaiah 9:11

Az why Da One In Charge stay make da peopo dat stay agains King Rezin from Aram Come real strong, so den da Israel peopo no can win ova dem. He stay tell da peopo dat like bus up da Israel peopo Fo go geev um.

Isaiah 9:8

My Boss wen tell me fo grumble bout da Jacob ohana. An wat I tell, goin go agains da whole Jacob ohana.

Isaiah 9:9

All da peopo dea goin know wat God tell, Da Israel peopo, an da peopo inside Samaria town. But dey come high nose, an get big head. Az why dey talk lidis:

Hosea 4:11

wit odda gods. “Dey drink da ol wine an da new wine. Az why my peopo no undastan notting. My peopo aks da idol kine gods dey make from wood Bout wass good fo dem do! Dey tink one stick can tell um Wat goin happen bumbye! Inside, dey ony like fool aroun wit odda gods. Dat make um no lissen me, dea God fo real kine.

Hosea 5:5

“Da Israel peopo get big head, Dat show dat dey get da blame. Da Efraim peopo an da odda Israel peopo, Jalike dey trip an fall down wen dey do bad kine stuff. An da Judah peopo trip an fall down wit dem.

Hosea 5:9

Da Efraim land goin come all wasted Wen I punish dem. I goin tell da Israel ohanas Wat fo shua goin happen.

Hosea 6:10

I wen see real bad tings Da Israel an Efraim ohanas stay do. Ova dea, dey come pilau Cuz dey fool aroun wit odda gods.

Hosea 7:5

“Wen oua king make one holiday party, An da prince guys come hot wit wine, Den dey make deals Wit guys dat ack jalike da prince guys junk.

Prieses 26:19

You guys get big head cuz you strong, but I goin bus you guys up an show dat you not strong. I goin take away da rain from da sky ova you guys jalike az iron, an I goin make da groun unda you guys hard jalike az bronze metal.

Amos 2:12

“But you guys, you wen make da Nazir guys Broke dea rules an drink wine. You wen tell my talka guys, ‘No talk no mo fo God!’

Amos 2:8

You Israel peopo, you even lie down On top da clotheses dat odda peopo wen leave dea Nex to da altar fo make sacrifice, Till da peopo pay wat dey owe. Plus, you Israel peopo, You take da money dat peopo pay fo one fine An use um fo buy wine Fo ony you suck um up, Right dea inside da temple fo yoa god.

Amos 4:1

Amos tell dis too: “Eh! You Samaria wahines! Lissen up! You guys jalike da fat cows from Bashan Dat eat grass on top da hills Samaria side! You wahines give hard time to da peopo dat no mo powa An you make any kine to da peopo dat no mo notting. You guys erytime tell yoa husban, ‘Bring mo booze!’

Amos 6:1

Amos tell dis too: “Bummahs, you guys dat no worry bout notting on top Zion hill, Jerusalem town! An Bummahs, you guys Samaria town dat stay shua notting goin hurt you! Bummahs! You da leada guys fo yoa countries, An da Israel ohana peopo go by you guys fo get help!

Amos 6:4

“Bummahs, you guys! You lay down on yoa punee all day, dat get fancy kine ivory all ova. You guys lay down all day an grind da luau food, From bebe sheeps an cows!

Amos 6:6

You guys drink da wine, Da whole calabash one time! You guys use da real expensive kine perfume oil. But no bodda you dat yoa Israel country an da Joseph ohana, litto mo wipe out. An still yet, you guys make jalike you no kea, an all dat you do no make you guys come sick!

Amos 6:8

“Da Boss, Da One In Charge a me, he wen make one strong promise, An he no need anodda guy fo help him do um, jus him. Dis wat Da One In Charge tell: ‘Watch out! Me, I so mad wit dem Israel guys! Dey tink dea Israel ohana mo betta den anybody! Dey get strong wall, but I goin go agains um! Dea main town, an eryting inside dea, I goin give all a dat To da guys dat stay agains um.’ ” Dass wat Da One In Charge tell. An you know wat?! He da God Ova All Da Armies.