Isaiah 26:3 - Hawaii Pidgin Bible

³ Da One In Charge, you take kea Whoevas stay shua bout wat dey tink. Az why dey no mo worries Cuz dey trus you.

Isaiah 26:3 ပူးပေါင်းရင်းမြစ်များ

1 Records 5:20

God help dem fight, an give dem da Hagar peopo an all dea frenz, cuz dey wen call out to God wen dey stay fight. He do wat dey tell him fo do, cuz dey trus him.

2 Records 13:18

Dat time, da Israel guys no win. Da Judah guys, dey strong, cuz dey trus Da One In Charge, da God fo dea ancesta guys.

2 Records 16:8

No foget now! Da Sudan guys an da Libya guys was one real big army wit plenny war wagons an plenny guys dat ride horse. But wen you wen trus Da One In Charge, he make you win ova dem.

Songs 119:165

Fo da peopo dat get love an aloha Fo da Rules you teach, Eryting go real good fo dem. No mo notting goin jam um up!

Songs 125:1

Da peopo dat trus Da One In Charge, Dey stay solid all da time, Jalike Mount Zion, Dat no move an stay solid.

Songs 9:10

Eh! You Da One In Charge! Da peopo dat know wat kine god you, Dey trus you, Cuz you no bag From da peopo dat aks you fo help um.

Isaiah 12:2

“Fo shua, he da God get me outa trouble. I goin trus him an no stay sked. Cuz Da One In Charge, da One make me strong An give me powa. He come awready, da One get me outa trouble.”

Isaiah 26:12

Da One In Charge, you da One Make eryting come out good fo us guys, Cuz eryting dat us guys stay do, You da one do um fo us guys.

Isaiah 27:5

But even da thorn an sticka kine peopo, Dey can come tight wit me An let me take kea dem too. Dass how dey no need fight wit me no moa, Cuz eryting goin come good wit me an dem.”

Isaiah 31:1

Bummahs! fo da peopo dat tink Da Egypt peopo goin help um erytime! Dey stay shua dey goin come okay If dey buy plenny horse dea. Dey trus da Egypt war wagons cuz dey get plenny, An plenny guys fo ride horse. But dey no go by Da One In Charge, Da Good an Spesho One fo da Israel peopo. Dey no aks him wat fo do!

Isaiah 32:17

An cuz peopo stay do wass right, Dat goin make tings come good fo erybody. An wen dey stay do wass right Dey goin stay quiet an trus God all da time.

Isaiah 32:18

My peopo goin stay inside places Wea eryting come good fo dem. Dey goin live inside places Wea dey can stay shua notting bad goin happen, Places wea dey goin res An no need worry bout notting.

Isaiah 42:19

Wen I talk bout somebody dat no can see, Who you tink I stay talking bout? I stay talking bout my peopo dat work fo me! Wen I talk bout somebody dat no can hear, Dey da ones I stay sen fo tell my message! Da ones dat get one deal wit me, Fo me make eryting come good fo dem, Dey no see dat. Dey suppose to work fo me, But dey no see notting.

Isaiah 42:6

“Me, Da One In Charge, I da One Do right wen I call you. I goin hold yoa hand fo make you stay strong. I goin take kea you. I goin make you fo be da one Fo make one deal fo all da peopos, An fo be jalike one light Fo all da nations.

Isaiah 48:2

You guys tell dat you come From Jerusalem, da town dat stay spesho fo God, An dat you guys trus da God fo da Israel peopo— His name, Da One In Charge, Da God Ova All Da Armies.

Isaiah 49:8

Dis anodda message from Da One In Charge fo his worka guy: “Wen da right time come, I goin tell you wat you like know. Wen da time come Fo me get da peopo outa trouble, I goin help you an take kea you. I goin make you da one Fo show da deal I get wit my peopo, Az fo real. I goin make da land fo dem use um one mo time, Da fields wea nobody work um long time, I goin give um back to da ohanas dat own um.

Isaiah 50:1

Dis one spesho message from Da One In Charge: “You guys tink yoa muddah get one divorce paypa Dat I wen make Fo tell dat I wen dump her an sen her away, o wat?! No mo da kine paypa cuz I neva do dat! You tink I owe somebody money An I sell you guys to dem fo pay dem, An az why now you dea slave?! I neva do dat too! Fo shua, I wen sell you guys, But ony cuz you wen do bad kine stuff! I wen sen away you guys muddah But ony cuz you guys go agains me!

Isaiah 50:10

If one a you guys feel sked Wen he go in front Da One In Charge, An he lissen wat I tell, Cuz I da guy dat work fo Da One In Charge, Den, wen dat kine guy walk inside one dark kine place Wea no mo light, He goin trus Da One In Charge, Cuz he know wat kine god him, An he goin let his God take kea him.

Isaiah 66:12

Dis wat Da One In Charge tell, “You know wat?! I goin make eryting come out good fo da Jerusalem peopo, Jalike one big riva Wit watta all da time! I goin bring plenny rich kine stuff from plenny countries, Jalike wen da watta fill up one stream An den go all ova da place! An da Jerusalem peopo goin be Jalike da muddah fo all you guys, An you guys goin be jalike one bebe dat stay breas feed, An da muddah carry um all ova in her arm, An bounce um on top her knee.

Jeremiah 39:18

Fo shua, I goin get you outa dea. You no goin mahke from da war. Da prize you goin get from da war, goin be dis—you goin stay alive cuz you trus me!’ Az wat Da One In Charge tell.”

Daniel 3:17

If yoa guys throw us guys inside da real hot fire, da God we work fo can get us outa dea, an he goin get us guys outa yoa powa, King Nebukadnezzar.

Daniel 3:28

Den King Nebukadnezzar tell, “Erybody gotta tell good tings bout da God dat Shadrak, Meshak, an Abednego pray to. Dat God wen sen his angel messenja guy fo get his worka guys outa da real hot oven fire place. Dey trus dea god, no matta dey go agains wat I tell dem fo do. Dey no sked mahke, an dey no goin work fo anodda god o go down in front anodda god. Dey like ony work fo an go down in front dea own god.

Daniel 6:23

Den da king come real, real good inside. He tell his guys fo bring Daniel outa da big hole. Wen dey bring Daniel outa da hole, dey no find cuts on top him notting cuz he trus his God.

Micah 5:5

He goin be da one make eryting come okay. Bumbye, wen da Assyria guys Goin come inside oua land fo fight, An come ova oua strong wall. Den us guys goin put up seven o eight leada guys Fo take kea us an stay in charge, Jalike da sheep guys take kea dea sheeps.

John 14:27

“Wen I go way, I goin make you guys so notting bodda you inside. Ony me can give you dat. All da stuff in da world no can make um so notting bodda you. Ony me can make um so notting bodda you! No come all bus up inside! An no come sked!

John 16:33

“I tell you guys all dis stuff fo notting bodda you, cuz you guys stay tight wit me. Da peopo inside da world goin make you guys suffa. But come strong! I da winna ova all da powa inside da whole world!”

Rome 5:1

Cuz us guys trus God, az why God tell us guys we get um right wit him. Us pono wit him, cuz a wat Jesus wen do, Da One In Charge a us guys.

Philippi 4:7

Den, God goin make you guys come so notting bodda you. Dat goin be mo betta den anybody can figga. God goin take kea you, how you feel an how you tink, cuz you guys stay tight wit his Spesho Guy Jesus Christ.