Isaiah 24:23 - Hawaii Pidgin Bible

²³ “Den da bright moon no need shine Cuz no need da light. An da hot sun no need shine Cuz no need um fo stay warm. Az cuz dat time, Da One In Charge, Da God Ova All Da Armies, He goin be da king On top Zion hill wea da Temple stay Inside Jerusalem town. In front da older guys dat lead his peopo He goin show how awesome he stay.”

Isaiah 24:23 ပူးပေါင်းရင်းမြစ်များ

Songs 97:1

Da One In Charge, he da king! I like erybody inside da world Stay good inside cuz a dat! I even like all da islans Go dance an sing!

Outa Egypt 15:21

Miriam, she give um dis song fo sing back to her: “I sing fo Da One In Charge! He awesome fo real kine! Da horses an da guys dat ride um, God throw um all inside da Red Sea!”

Isaiah 12:6

Yell loud! Yell cuz you guys feel good inside, All you peopo dat live inside Jerusalem town! Cuz da Good An Spesho God fo da Israel peopo Stay wit all you guys, Az why you know he da greates!”

Isaiah 13:10

Da stars in da sky an da kine pichas dey make Dey no goin get light dey make. Da sun goin come up dark. Da moon no goin get light.

Isaiah 30:26

Da moon goin shine strong, Jalike da sun. An da light from da sun goin come Seven time mo bright den befo, Jalike you get all da light from seven days, In one day! Az how goin happen Afta Da One In Charge wack his peopo. Den, Da One In Charge goin fix um Ery place da bone stay broke, An he goin bandage Da cut he wen give dem.

Isaiah 33:17

Bumbye, you goin see da king, An he goin look real good! An you goin see one land dat stay real big!

Isaiah 33:22

Da One In Charge, he oua Judge. Da One In Charge, he da One give us guys oua rules. Da One In Charge, he da king fo us guys. He da One goin get us outa trouble.

Isaiah 52:7

Real nice! Wen we see da messenja guy feet Stay coming ova da mountains Fo tell us good kine stuff! He make shua erybody hear, “Eryting goin come good now! Good tings goin happen! Da One In Charge goin get us outa trouble.” He tell God peopo, Jerusalem town, “Yoa God, he da king now!”

Isaiah 60:1

Da One In Charge tell: “You Jerusalem peopo, Stan up! Shine jalike one light! Cuz now, you get awesome light from me, Da One In Charge. I stay awesome, An I jalike da bright light Dat make you peopo come awesome too, Jalike wen da sun come up an shine light fo you.

Isaiah 60:19

You guys no goin get da sun fo light day time. Da moon no goin shine fo make um bright fo you guys. Me, Da One In Charge, I goin be da light fo you guys foeva. I yoa God, an I goin make awesome kine fo you guys.

Isaiah 60:20

Da sun no goin go down fo you guys no moa. Da moon no goin go dark fo you guys no moa. Me, Da One In Charge, I goin come da light fo you guys foeva. An you guys no goin come sad no moa.

Ezekiel 48:35

“Fo go aroun da big town goin be six mile. An from dat time, da name fo da big town goin be Da One In Charge Stay Hea.”

Daniel 7:18

But da ones dat stay spesho fo da God Dass Mo Importan Den All Da Odda Gods, goin be dem get da right fo be da king guys, an dey goin keep dat right foeva an eva.’

Daniel 7:27

Den, da God Dass Mo Importan Den All Da Odda Gods goin give da peopo dat stay spesho fo him da powa fo come da nex king an da powa fo stay in charge a da peopo. An da God Dass Mo Importan Den All Da Odda Gods goin give his kings powa ova da odda kings all ova da world. Dey goin stay in charge foeva. All da countries on top da earth goin work fo God peopo, an all da odda peopos goin lissen dem.’

Joel 2:31

Da sun goin come dark, An da moon goin come red jalike blood. Dat goin happen befo da big an skery time Wen Da One In Charge come fo take ova.

Joel 3:15

Da sun an da moon goin come dark, An da stars no goin shine.

Obadiah 1:21

Da guys dat get oua peopo outa trouble, Dey goin go on top Mount Zion, Fo ovathrow da govmen fo da Esau mountains. An Da One In Charge, he goin be da king!

Micah 4:7

Me, Da One In Charge, I goin make Da peopo dat no can walk good Come one new nation. Da peopo da odda guys wen push away, I goin make dem come real strong. I goin be dea king dat live Mount Zion From dat time an foeva.”

Zekariah 14:6

Dat time, no goin get clear sunlight. But no goin stay cold an dark.

Zekariah 14:7

Goin be one diffren kine day. Dat time, no goin get day time o nite time. Ony Da One In Charge know how dat goin happen. Still yet, wen time fo come dark, still goin get light.

Zekariah 9:9

Stay good inside, my Zion peopo! Yell, my Jerusalem peopo! Look! Yoa king stay come by you! He erytime do da right ting. He get you guys outa trouble! He make nice kine to erybody, An stay ride on top one donkey, even one young donkey.

Matthew 24:29

“Right afta dat time fo suffa plenny, dis wat goin happen: “ ‘Da sun goin come black. Da moon no goin shine. Da stars goin fall down from da sky. An all da spirits inside da sky dat get plenny powa, Dey goin come all hamajang.’

Matthew 6:10

We like you come da King fo erybody. We like erybody make how you like, Ova hea inside da world, Jalike erybody up dea inside da sky Make how you like.

Matthew 6:13

Show us guys how fo no do bad kine stuff Wen somebody give us chance fo do um, But get us outa trouble from da Bad Guy. [Cuz you oua King, You get da real powa, An you stay awesome foeva. Dass it!]’ ”

Hebrews 12:22

But you guys, wen God make da New Deal fo us guys come tight wit him, az jalike da time yoa ancesta guys go by him on top Zion Hill wea he stay. An Zion Hill, jalike da big town inside da sky wea da God Dat Stay Alive live, dass jalike Jerusalem Town. An jalike you guys go by da uku pile a angel guys dat come togedda fo party.

Jesus Show 11:15

Den da numba seven angel guy blow his trumpet. Had real loud voices come from da sky. Dey tell, “Now da time! God an his Spesho Guy Christ get da powa Fo take ova an be King ova all da peopos inside da world. Dey goin lead da peopo foeva an eva!”

Jesus Show 14:1

Den I look, an jalike one dream, right dea in front me I see da One dat was jalike God Bebe Sheep. He stay stan on top Mount Zion, an wit him was 144,000 peopo dat get God Bebe Sheep name an his Faddah name on top dea forehead.

Jesus Show 19:4

Den da twenny-four older leadas an da four tings dat stay alive an go ery place God go, dey go down an show love an respeck fo God, da One dat sit on top his throne. Dey tell, “Fo shua, God, he da greates! Hallelujah!”

Jesus Show 19:6

Den I hear someting dat soun like get plenny peopo making big noise, jalike big watta pounding, an jalike loud thunda. Dey tell, “God, he da greates! Hallelujah! Cuz he Da One Dat Stay In Charge, An he da King ova erybody! He Da God Dat Get All Da Powa!

Jesus Show 21:23

Da town no need da sun o da moon fo shine on top um, cuz God stay awesome, an God light shine on top um, an God Bebe Sheep Guy jalike da lamp.

Jesus Show 22:5

No goin get nite time no moa. Dey no goin need da light from da lamp o da light from da sun, cuz God, Da One In Charge, he goin give dem light. An dey goin be in charge a da world wit God da King foeva.