Isaiah 24:13 - Hawaii Pidgin Bible

¹³ An dass how goin be, Right dea inside da middo a da land, Wit odda peopos all aroun dea. Ony litto bit peopo goin stay, Jalike wen dey wack da olive tree wit sticks Till ony litto bit olive stay on top, An jalike wen dey harves da grapes An leave litto bit grape Fo da pooa peopo dat no mo notting.

Isaiah 24:13 ပူးပေါင်းရင်းမြစ်များ

Isaiah 1:9

Da One In Charge, Da God Ova All Da Armies, If he neva leave us guys some peopo ova dea still yet, Us guys goin come jalike da Sodom peopo, An da Gomorrah peopo—no mo nobody dea.

Isaiah 17:4

Dat time, eryting dat stay awesome now Bout da Israel ohanas, Dat goin change, an dey no goin stay awesome no moa. Jalike wen one guy had plenny fo eat An now he come skinny.

Isaiah 27:12

Dat time, Da One In Charge goin pick his peopo Jalike wen peopo wack da wheat o barley dey wen harves Fo get da good wheat one side an da junks da odda side. He goin take you Israel peopo, one by one, An bring you togedda, Jerusalem side, Even from da big Eufrates Riva An from da stream dass da borda fo da Egypt land.

Isaiah 6:13

But even if still yet get ten percent a da peopo dat stay on top da land, Da army guys goin come back one mo time An burn eryting. But, jalike da terebint tree an da oak tree still ony get stump Wen somebody cut um down, Da peopo dat still stay dea, Goin come jalike one spesho seed fo God, Jalike da stump dat goin grow one mo time.”

Jeremiah 44:28

But if get anybody dat no mahke cuz a da war, an dey get away an go back inside da Judah land from Egypt, ony goin be litto bit peopo. Den all da Judah peopo dat wen come fo live Egypt side goin know fo shua who stay tell da trut, me o dem.’ ”

Ezekiel 7:16

Erybody dat still stay alive, dey goin run away to da mountains. Dey goin make sad kine noise jalike da valley kine doves cuz all dem wen do wass wrong.

Prieses 19:9

“Wen you harves da food from yoa fields inside da land, no harves um all da way to da edge, o pick up da extra food dat da harvesta guys no pick up.

Micah 2:12

God tell: “Fo shua I goin bring all you Jacob peopo togedda, An bring togedda da Israel peopo dat stay still yet, Goin be jalike plenny sheeps inside one fence, Inside wea get green grass fo dem. Goin get plenny peopo ova dea.

Micah 7:1

Den Micah tell: “Bummahs! I feel jalike one guy dat like go pick up fruits summa time, Afta da harves guys harves um awready. An I no find grapes fo eat, An no mo early figs dat I plenny ono fo eat.

Matthew 24:22

But God goin make dat time mo short fo peopo come out okay. He like help da peopo he wen pick, dass why he goin make dat suffa plenny time mo short.

Jesus Show 3:4

“ ‘But get some peopo ova dea by you guys Sardis side dat stay do wass right an not pilau. Dey da guys dat goin walk aroun wit me an wear clean white kine clotheses, cuz dey get da right fo do dat.’ ”