Isaiah 17:1 - Hawaii Pidgin Bible

¹ Me, Isaiah, I get heavy kine stuff fo tell bout wat I see goin happen to da Damascus peopo: Look! Damascus no goin be one big town no moa. Da whole place goin come one pile a bus up junks.

Isaiah 17:1 ပူးပေါင်းရင်းမြစ်များ

Start 14:15

Nite time, Abram tell his guys fo split up fo go afta da Babylon guys, fo dem wack um from ery side same time. Abram guys bus up da Babylon guys real good, an chase um all da way Hobah side (dass da odda side a Damascus town).

Start 15:2

Abram tell, “You my Boss, you Da One In Charge. But ony wase time fo you give me plenny stuffs. Cuz bumbye wen I mahke, I no mo kids, an da ony one dat goin get my stuffs goin be one a da worka guys born fo work fo me, da guy Eliezer from Damascus town.

1 Kings 11:24

Wen David wipe out da Zobah army guys, Rezon go get togedda plenny guys fo go by him, an he come da leada man fo one gang dat rip off peopo. Den Rezon an his gang guys go Damascus town an live dea, an take ova Damascus.

2 Kings 16:9

Da Assyria king tell Ahaz, “Shoots!” Den he go attack Damascus town an take um ova. He kill King Rezin an make all da peopo move house Kir side cuz dey his prisonas.

1 Records 18:5

Wen da Aram guys from Damascus come fo help Hadadezer da Zobah king, David kill twenny-two tousan a dem.

2 Records 28:23

He make sacrifice to da Damascus gods, no matta da Damascus guys wen win ova him. He figga, “Cuz da gods fo da Aram kings wen help dem, I goin make sacrifice fo dose gods, fo dem help me too!” But az was da ting dat make Ahaz an his Judah peopo come weak.

2 Records 28:5

Az why his God, Da One In Charge, give him an his guys to da Aram king. Da Aram guys win ova Ahaz army. Dey grab plenny Judah peopo an make dem come prisonas, an take dem Damascus side. An da Israel king grab Ahaz an his guys too, an kill plenny a dem.

Isaiah 10:9

Us guys awready win an take ova Kalno an Karkemish, Hamat an Arpa, Samaria an Damascus!

Isaiah 13:1

Me, Isaiah, Amoz boy, I get heavy kine stuff fo tell bout wat I see goin happen to Babylon:

Isaiah 15:1

Me Isaiah, I get heavy kine stuff fo tell bout wat I see goin happen to da Moab peopo: Ony one nite, Ar town goin come wipe out! Dass how da Moab land goin come all bus up. Ony one nite, Kir town goin come wipe out too! Dass how da Moab land goin come all bus up.

Isaiah 19:1

Me, Isaiah, I get heavy kine stuff fo tell bout wat I see goin happen to da Egypt peopo: Da One In Charge stay come Egypt side, Jalike he stay ride on top one cloud. Da idol kine gods da Egypt peopo pray to Stay shake in front him. Da Egypt peopo stay plenny sked An no can tink good.

Isaiah 25:2

I goin tell dat you da greates, Cuz get big towns dat you bus up An make um come one pile a rubbish. Get strong towns wea da army guys no can come inside, You make um all fall down. Da place inside odda countries Wea da peopo build palace, No even get one mo town dea now. No way dey goin build um up one mo time.

Isaiah 37:26

“ ‘Eh Sennakerib, you neva hear, o wat? From long time me, Da One In Charge, wen start fo make all dis happen, Befo time, I wen make da plan dat way awready, An now I stay make um happen— Fo you bus up da towns dat get strong wall An make um come uku pile a rocks,

Isaiah 7:16

But befo he come dat big, da land dat you worry bout wea da two kings stay goin come all bus up, an no mo notting goin stay dea.

Isaiah 7:8

Da main town inside Aram, dass Damascus. Da main guy inside Damascus, dass King Rezin. Befo 65 year pau, Da Israel peopo goin come real bus up, Dey no even goin be one peopo no moa.

Isaiah 8:4

Az cuz befo dis small boy learn how fo tell ‘Daddy’ o ‘Mama,’ da Assyria army guys goin steal all da rich kine stuffs inside Damascus town an Samaria town. Dey goin bring um to da king fo Assyria.”

Jeremiah 49:2

But Da One In Charge tell: “Az why da time goin come Wen I goin make erybody hear Da trumpet blow fo war Agains Rabbah town, Da main town fo da Ammon guys! Rabbah goin come one big pile a dirt Cuz all da houses goin come bus up. All da towns aroun Rabbah goin burn down. Den da Israel guys goin kick out Da Ammon guys dat wen kick dem out befo time.” Dass wat Da One In Charge tell.

Micah 1:6

Da One In Charge tell: “Az why I goin bus up Samaria, An make um come one big pile rocks in da countryside, Goin come one flat place fo plant grapes. Da stones dey use fo build, I goin roll um all down da valley. An I goin leave ony litto bit dirt wea dey wen build house.

Micah 3:12

Fo shua, cuz a you guys, Da peopo dat stay agains us goin plow Mount Zion jalike az one field. Jerusalem town goin come all bus up. Da hill wea da Temple Fo God stay, Goin get ony bushes all ova.”

Zekariah 9:1

Dis message from Da One In Charge tell bout da Hadrak an Damascus peopo an dea land: Cuz all da peopos inside da world, Jalike all da Israel ohanas, stay look to Da One In Charge.

Jesus Guys 9:2

an tell um fo write lettas to da Jew churches Damascus side, fo find some guys o wahines ova dea dat stick wit da message bout Jesus, fo put dem inside da prison Jerusalem side.

Rules Secon Time 13:16

Bring all dea stuffs an put um all inside da middo a da town. Den burn up da whole town an all da stuffs. Az goin be jalike one sacrifice dass ony fo yoa God, Da One In Charge. Da town goin stay one rubbish pile foeva. Nobody goin build dea one mo time.