Isaiah 14:29 - Hawaii Pidgin Bible

²⁹ Eh! All you Filisha peopo! You betta not stay good inside cuz you tink lidis, “Da king fo da Assyria peopo dat wen bus us guys up, He mahke, an now dey no mo powa!” But da king guys dat goin come Afta da Assyria king mahke Goin be mo worse den him! Cuz jalike you kill one snake, Anodda snake goin come from da firs one Dat can kill you wit poison. An you kill dat one, An goin get anodda snake come from dat one Dat can fly an catch you an bite you.

Isaiah 14:29 ပူးပေါင်းရင်းမြစ်များ

Isaiah 30:6

I get real bad stuff fo tell bout wat I see goin happen wit da animals da peopo use fo cross da boonies in da Negev, from Judah to Egypt: “Da Judah peopo going thru da Negev land Wea erybody get hard time An suffa plenny. Get plenny lions ova dea. Get all kine snake dat can kill you, An da kine snake dat you no see um an come out bite you An make you feel jalike you stay burning up. Da Judah peopo take dea rich stuffs dea On top donkeys an camels, Fo pay da Egypt peopo fo help dem. But da Egypt peopo no goin do notting good fo dem!

Isaiah 11:8

Da bebe goin tink az good fun fo play On top da hole dat get one snake inside dat can kill um. Da small kids goin put dea hand inside da hole fo try catch um, But da snake no goin like kill nobody.

2 Records 26:6

He go make war agains da Filisha guys, an broke down da town wall fo three towns: Gat, Jabneh, an Ashdod. Den he build da towns one mo time nea Ashdod an odda places wea da Filisha peopo wen stay.

Zefaniah 3:11

Dat time, you guys no goin get shame, Fo all da wrong kine stuff you guys wen do agains me! Cuz den, I goin take away from Jerusalem town All da peopo dat feel good cuz dey get big head. You guys no goin ack high makamaka no moa, On top da hill dat stay spesho fo me.

Micah 7:8

You guys dat stay agains me, No laugh bout me! No matta I fall down, I goin stan up one mo time. No matta jalike I sit inside one dark place, Da One In Charge goin stay jalike one light fo me.

Obadiah 1:12

No good you guys throw party fo laugh at yoa braddah Jacob guys, Wen dey get plenny trouble! No good you guys dance an sing Wen da Judah peopo come wipe out. No good you guys talk big an make fun Da time dey suffa plenny.

Hosea 9:1

You Israel peopo, no yell jalike you stay good inside! No ack jalike da odda peopos wen dey amp out. I tell dat cuz you guys no stay tight wit yoa God. Ery place wea peopo split da wheat from da junks, You guys like get money Cuz you fool aroun wit idol kine gods!

Ezekiel 35:15

Cuz you Edom guys wen dance an sing an stay good inside wen odda guys wase da Israel peopo property, az how I goin make to you guys! You Seir Range peopo, an all you Edom peopo, I goin let odda guys wase you guys land an make eryting dea come skery. Den peopo goin know dass me Da One In Charge do all dat!”

Ezekiel 26:2

“Eh! Fo Real Kine Guy! Da Tyre peopo dance an sing cuz Jerusalem town stay all bus up. Dey tell, ‘Good fo you! Befo time, you Jerusalem peopo no let us guys pass thru yoa country fo us trade wit da odda peopos nea you. But now, yoa town gate all bus up an wide open fo us! Cuz Jerusalem town all wipe out, all yoa trade come ouas. Us guys goin come rich!’ ”

Smart Guys 24:17

Wen somebody dat stay agains you get trouble, No feel good bout dat! Wen da guy no can handle, No feel good bout dat!

2 Records 28:18

Da Filisha guys too, dey go afta some towns inside da low Judah hills an da Negev boonies, an take away prisonas. Dey take ova Bet-Shemesh, Aijalon, Gederot, Soco an da small towns nea dea, Timnah an da small towns nea dea, an Gimzo, an da small towns nea dea, an dey go live inside dose towns.

2 Kings 18:8

He bus up da Filisha guys too, all da way to Gaza an da land aroun dea, dea towns dat get strong wall an small towns wit ony watch towa too.

Joshua 13:3

from da Shihor Gulch da east side a Egypt, to da Ekron land da north side. Az all da Canaan land (dass wea da five Filisha kings stay, inside Gaza, Ashdod, Ashkelon, Gat, Ekron, an da Avva peopo land).

Census 21:8

Da One In Charge tell Moses, “Make one ting dat look jalike one poison kine snake, an put um on top one high pos. Wen da snakes bite somebody, da peopo can look da snake statue on top da pos, an goin stay alive.”

Isaiah 2:6

Cuz Da One In Charge, you wen leave yoa peopo awready, Da Jacob ohana peopo. Dey lissen da odda peopo from da east side, Babylon side, So now dey even go call da spirit from da mahke peopo Fo come tell um wat goin happen bumbye, Jalike da Filisha peopo stay do. Yoa peopo stay make one deal wit da odda peopos Dat donno you.

Isaiah 11:14

Togedda dey goin rush da Filisha peopo on da west side, All da way to da sea, An steal stuff from peopo on da east side. Dey goin take ova da Edom peopo an da Moab peopo An da Ammon peopo gotta do wat dey tell um fo do.

Isaiah 14:31

Yell, all you peopo inside da town gates! Cry plenny, you peopo inside da big towns! All you Filisha peopo, You real sked, you stay shake! Cuz one strong army come from da north side! Dey burn down da towns. Can see da smoke! Da army guys, dey all stay togedda, Dey no even lose one army guy.

Jeremiah 47:1

Dis anodda message from Da One In Charge fo Jeremiah, da guy dat talk fo Da One In Charge, bout da Filisha peopo. Dis message come befo da Egypt king guy Pharaoh attack Gaza town.

Sad Song 2:17

Da One In Charge do wat he wen plan fo do. He do wat he promise fo do long time befo time. He win ova you guys, an he no mo pity fo you! He let da peopo dat stay agains you guys laugh cuz you guys suffa, Same time he make dem come strong.

Ezekiel 25:15

“Dis wat Da One In Charge, da Boss, tell: ‘Da stuff da Filisha peopo wen do, dey do um cuz dey like pay back da Judah peopo from long time befo time. Da Filisha guys pay back da Judah guys cuz dey tink da Judah peopo no good. Az why da Filisha guys like wipe um out foeva.

Joel 3:4

“You Tyre an Sidon peopo, an all you Filisha districks, how come you guys stay agains me Da One In Charge? You guys figga you stay pay me back cuz a someting I wen do, o wat?! Cuz if you guys stay pay me back, I goin turn aroun right den an dea, an pay you guys back an make you come shame fo all da tings you guys wen do.

Amos 1:6

You betta lissen! Dis wat Da One In Charge tell: “Ova an ova, da Gaza peopo wen go agains me. Az why, no way I goin let um go an no punish dem! Dey wen make one whole nation dea prisonas An sell um to da Edom peopo fo come dea slaves.

Amos 1:8

I goin wipe out da leada fo Ashdod town An da guy in charge a Ashkelon town. I goin go agains da peopo dat live Ekron town. Da odda Filisha guys, dey goin come wipe out too!” Dass wat Da One In Charge tell.

Zefaniah 2:4

No mo nobody goin stay inside Gaza town. An Ashkelon goin stay all bus up. Befo noon time dey goin throw erybody outa Ashdod. Dey goin pull up da Ekron peopo like weeds.

Zefaniah 2:5

Az why hard! You guys dat live by da shore! You Keret peopo, You Canaan peopo, wea da Filisha peopo stay, Da One In Charge grumble bout all you guys. He tell, “I goin wipe you out! No mo nobody goin stay dea!”

Zekariah 9:5

Da Ashkelon peopo goin see wat wen happen to Tyre, an come sked. Da Gaza peopo goin squirm an worry real bad. Da Ekron peopo goin come bum out, An no trus nobody. Da king fo Gaza goin mahke. No goin get nobody inside Ashkelon.