Isaiah 12:1 - Hawaii Pidgin Bible

¹ Dat time, you goin tell, “I goin sing fo tell Da One In Charge he da greates! I goin tell erybody dat you good, Da One In Charge. No matta you was huhu wit me, Now you no stay huhu wit me no moa, An you take away da sore from inside me.

Isaiah 12:1 ပူးပေါင်းရင်းမြစ်များ

Nehemiah 8:10

Nehemiah tell da peopo, “You go now. Go eat fancy kine food an drink sweet kine wine. Sen some food to da peopo dat neva get notting ready fo eat. Cuz dis day, you know, real spesho fo oua Boss! No stay sad inside cuz Da One In Charge make you guys feel good inside, an az why you strong.”

Job 11:16

Fo shua you goin foget all yoa trouble. An tink bout um ony jalike az watta dat flow by you awready.

Job 13:16

An den, da ting dat goin get me outa trouble, Goin be lidis: If get somebody dat ack jalike God no matta Dey no goin try fo go in front him!

Songs 30:5

Ony fo short time, he come huhu But all yoa life, he do good stuff fo you All nite, you feel jalike you goin cry, But den morning time come, An you like yell Cuz you stay feel real good inside.

Songs 71:21

You goin make me come One mo importan guy den befo time. You goin make me Stay good inside, one mo time.

Songs 85:4

Eh! You da God Dat get us guys outa trouble. Cuz a dat, go change yoa mind An help us guys one mo time. No stay sad inside Bout us guys no moa.

Songs 86:17

Do someting fo me fo show You get one good heart fo help me. Den, wen da peopo dat hate me see dat, Dey goin come plenny shame, Cuz you Da One In Charge, you help me, An you make um So notting bodda me.

Songs 9:1

Eh! You Da One In Charge! I goin tell good tings bout you From deep inside me. I like tell all bout all da awesome tings you do.

Isaiah 10:25

But ony litto bit mo time now, Den I no goin stay huhu wit you guys no moa. I goin come huhu wit da Assyria guys An go wipe dem out.”

Isaiah 10:4

Ony one ting you can do—give up! Cuz wat goin happen to you, mo worse den da prisona guys! O you can fall down on top da groun wit da odda mahke bodies, Cuz wat goin happen to you, mo worse den wat happen to da guys dey kill! An Da One In Charge stay huhu wit da Israel peopo still yet, An he stay ready fo bus um up.

Isaiah 11:16

Goin get one big wide easy road Fo God peopo dat still yet stay alive, An dat neva mahke inside Assyria, Jalike da time da Israel peopo come outa Egypt.

Isaiah 14:3

Bumbye, Da One In Charge goin let you res. Den you no goin feel sore no moa, an you no goin come sked an shake cuz you worry, an no goin be no mo da hard slave kine work dey make you do.

Isaiah 2:11

Anybody dat get real high nose, Dey goin come shame. Anybody ack real high makamaka, Dey goin come notting. Dat time, Da One In Charge da ony One Da peopo goin talk good bout.

Isaiah 25:1

Da One In Charge, you my God! I goin tell dat you da greates, I goin tell peopo I know wat good kine god you! Cuz you wen do awesome kine tings Wen you make one plan from long time befo, An us guys can trus you fo dat, An we know you tell da trut.

Isaiah 25:9

Dat time, peopo goin tell, “Eh! Dis, oua God, fo shua! We wen trus him, An he wen get us outa trouble! Dis Da One In Charge, da One we trus. Now, us guys can dance an sing, An stay feel real good inside Cuz he wen do dat.

Isaiah 26:1

Dat time, goin get dis song fo us sing Judah side: Oua big town stay strong fo shua. Da One In Charge Keep us guys outa trouble. Jalike he da strong wall fo us guys An da extra wall outside oua big town.

Isaiah 35:10

Da ones, Da One In Charge wen pay da price fo dem, Dey goin come back to Mount Zion. Dey goin go inside da Temple Fo Da One In Charge, An dey goin dance an sing An feel good inside all da time. All dat goin be jalike one crown on top dea head. Wen dey stay go, dey feel good inside Mo an mo erytime. Befo time, dey feel sore inside plenny. But all dat gone awready!

Isaiah 49:13

“Erybody inside da sky, Yell cuz you stay feel good inside! An you peopo all ova da world, You stay feel good inside too! Erybody inside da mountains, Yell an sing! Cuz Da One In Charge give good kine words Weneva his peopo stay feel sore inside, An he show love an pity Fo da peopo dat stay suffa.”

Isaiah 51:3

“Az cuz Da One In Charge goin help da Jerusalem peopo So dey no stay sad no moa Bout all da stuff stay bus up ova dea. He goin make da boonies come Jalike how he wen make da place Eden side. Da dry up country goin come Jalike one garden fo Da One In Charge. Da peopo ova dea goin feel real good inside, An dance an sing. Dey goin tell Da One In Charge, ‘Mahalo plenny!’ an dey goin sing.

Isaiah 54:7

Da One In Charge tell: “Eh my peopo, Ony short time I wen leave you guys. But I get plenny love an pity fo you guys, An I goin bring you guys back togedda wit me.

Isaiah 54:8

I wen get real mad, Jalike one flash flood, Cuz I no like wat you guys stay do dat time. I turn my face away so you no can see um Fo short time. But I get love an pity fo you guys, An I goin stay tight wit you foeva.” Dass wat Da One In Charge tell, Da One dat pay da price Fo get you guys outa trouble.

Isaiah 54:9

“Fo me, dis jalike da time da guy Noah live An da big watta wipe out eryting. Dat time, I wen make one strong promise Dat da big watta, da Noah time kine, No goin cova da earth one mo time. Same ting dis time, I stay make one strong promise Dat I no goin come huhu wit you guys one mo time. I no goin tell you guys no moa, Dat you stay do wass wrong.

Isaiah 60:10

“Peopo from anodda place goin come fix yoa town walls. Dea kings goin help you guys too. Befo time, I wen stay huhu with you guys An wack you guys, But now, I like do good tings fo you guys An show you pity an love.

Isaiah 61:10

I stay feel plenny good inside cuz a Da One In Charge. I feel real good cuz a my God. Cuz jalike he give me clotheses fo wear Dat show he da One get me outa trouble, An jalike he give me one nice robe Fo show I get um right wit him. I feel jalike one guy dat goin get married An wear one fancy hat jalike da pries guys, An I feel jalike da lady dat goin marry too, An wear all kine jewelry!

Isaiah 64:5

You come fo help da peopo dat do da right ting An stay good inside cuz a dat, An no foget how you make. But fo shua, wen us still do bad kine stuff, You wen stay huhu! Az why us gotta live how you like us live An live lidat foeva! Dass da ony way us goin get outa trouble!

Isaiah 65:18

So now, stay good inside all da time, Wen you tink bout wat I goin make! Cuz I goin make Jerusalem da kine place Dat make you stay good inside wen you dea. An I goin make da Jerusalem peopo da kine peopo Dat make you like dance an sing wen you wit dem.

Isaiah 66:13

Jalike one muddah help her bebe calm down, Even afta he grow up an come big, I goin do da same ting fo help you guys come so notting bodda you. Wen you guys stay Jerusalem town, I goin let you come so notting bodda you!

Jeremiah 30:19

From dea, goin get plenny songs dat tell dat I good. An goin get music fo dance an sing cuz peopo stay good inside. I goin make dem come mo plenny peopo. Dey no goin come litto bit peopo. I goin make peopo show respeck fo dem An no make any kine to dem.

Jeremiah 31:13

Den da young girls goin dance an sing Cuz dey stay good inside. Same ting fo da young guys an da ol guys. Dey goin dance an sing too. I goin change dem from stay sad inside to stay good inside. I goin give dem good kine words, so dey no stay sad no moa.

Hosea 11:8

“You Efraim peopo, no way I goin tell you guys ‘Laytas!’ No way I goin give you Israel peopo to anodda god! No way I goin wipe out you guys jalike I wen wipe out Admah town! O Zeboim town! Now I wen change my mind, Az why now I feel all kine love an pity fo you guys!

Hosea 6:1

Da Israel peopo tell, “Go come, we go back by Da One In Charge. He wen rip us up, But he goin make us come good. He wen wack us guys, But he goin put one bandage on us.

Zekariah 1:16

“Az why, dis wat Da One In Charge, Da God Ova All Da Armies, tell, ‘Now I goin go back Jerusalem side an show pity fo da peopo dea. Dey goin build my house ova dea one mo time. An da construction guys goin start fo build up Jerusalem one mo time.’

Zekariah 14:20

Dat time, dey goin write “Spesho fo Da One In Charge” on top da bells fo da horses. An da pots fo cook inside da Temple Fo Da One In Charge goin be spesho fo God jalike da bowls dat stay spesho fo Da One In Charge in front his altar.

Zekariah 14:9

Erybody goin know Da One In Charge da ony king ova all da world. Dat time he goin be da ony God, an his name, Da One In Charge, goin be da ony name fo pray to.

Zekariah 8:11

But now, I no goin make to da peopo dat still yet stay alive jalike I wen make to dem befo time.” Az wat Da One In Charge, Da God Ova All Da Armies, tell.

Zekariah 8:19

Dis wat he tell: “You Judah guys make four spesho religious ceremonies wen you no eat so you can pray. Az cuz you stay sad inside an no foget how Jerusalem town wen come all bus up. You do um wen da summa start, da middo a summa, da autumn, an da winta time. But from now, you guys goin make da spesho religious ceremonies come real good fo da Judah peopo! You guys goin come real good inside, an dance an sing. But still yet, you guys gotta show love an aloha fo tell da trut, an show love an aloha fo live togedda an no fight!”

Rome 11:15

Wen God tell “Laytas” to wat his peopo do befo time, dat mean dat da odda peopos all ova da world get chance fo come pono wit God. Bumbye, God goin take back his peopo. Goin be jalike dey was mahke befo, but now dey come back alive fo real kine!