Isaiah 10:34 - Hawaii Pidgin Bible

³⁴ He goin chop down da Assyria guys, Jalike wen somebody cut inside da fores wit one ax, Jalike wen da awesome big trees inside Lebanon fall down.

Isaiah 10:34 ပူးပေါင်းရင်းမြစ်များ

Songs 103:20

All you angel messenja guys Dat work fo Da One In Charge, Tell how Da One In Charge da One Dat make you come Wat he like you fo come! Da One In Charge wen make you guys, An make you real strong, An you guys lissen him An go do eryting he tell you fo do.

Isaiah 10:18

Da Assyria king get any kine awesome fores An plenny place fo grow fruit tree. Da One In Charge goin make all dat no goin be no moa, Inside an outside, Jalike wen one sick guy come wipe out.

Isaiah 2:13

No matta da peopo tink dey importan Jalike da tall cedar trees inside Lebanon An da oak trees inside Bashan, Dey goin fall down.

Isaiah 31:8

“God goin use one sword dat peopo neva make Fo kill plenny Assyria guys. He goin use one sword dat neva come from dis world An dat goin wipe um out. Da Assyria army guys goin run away from dat sword. Odda peopo goin take da young guys from Assyria away An make um work fo dem.

Isaiah 33:9

Even da Judah land look jalike stay sad inside An plenny tired. Lebanon side, da trees look jalike dey come shame, An da leaf look jalike stay dry. Sharon side, no mo rain, Stay jalike da dry Arabah valley. Bashan an Carmel side, Da plants leaf, all stay fall down.

Isaiah 37:24

You wen sen guys dat work fo you, Dat wen try make me, da Boss, shame. You wen tell, “Me, Sennakerib, I get plenny war wagon! I can go on top a da high mountains, To da mos far part a da Lebanon mountains, Fo cut down da mos tall cedar trees An da bestes pine trees! Me, I da kine guy can go all da way to da end A da mos high places, Da fores wea da bestes tree grow!

Isaiah 37:36

Den one angel messenja guy from Da One In Charge go out fo fight. He kill 185,000 army guys inside da Assyria camp. Wen da odda peopo ova dea get up early da nex morning, get plenny mahke bodies all ova da place!

Jeremiah 22:7

I goin make guys come fo wipe out da palace. Erybody goin bring dea tools fo work. Dey goin chop up yoa nice cedar wood beams. An throw um inside da fire.

Jeremiah 48:2

No mo nobody goin talk good no mo bout da Moab peopo. Inside Heshbon town get guys dat make plan fo wipe dem out. Dey tell: ‘Go come, fo us go wipe out da whole Moab nation!’ All you Moab guys dat live in Madmenah town goin mahke. You no can run away from da war dat goin come!

Ezekiel 31:3

You know bout Assyria, aah? Befo time, jalike dey was one cedar tree Lebanon side. Get nice looking branches Dat make shade ova all da odda fores trees. Da Assyria tree real tall, mo high den da odda trees Dat grow togedda wit um.

Daniel 4:23

“Den, King Nebukadnezzar, you wen see one angel messenja guy dat stay spesho fo God come down from da sky. He tell, ‘Cut down da tree an broke um up! Leave da stump an da roots inside da groun. Tie da stump wit iron an bronze strap an let um stay dea inside da grass field. Let him come wet wit da dew from da sky. Let him live jalike da wild animals till seven year pass!’

Nahum 1:12

Dis wat Da One In Charge tell: “No matta da Assyria guys plenny peopo An get plenny frenz, I goin cut um down. No matta I wen punish you Judah peopo, I no goin do dat one mo time.

2 Tessalonika 1:7

An God goin take away da presha, an same ting fo us guys too. All dat goin happen bumbye, wen God let peopo see Da One In Charge, Jesus, stay coming from up dea inside da sky wit his angel guys dat get plenny powa.

2 Peter 2:11

Da angel guys, dey mo strong den da teacha guys dat bulai! No matta da angel guys get mo plenny powa, dey no talk bad bout da awesome guys in front Da One In Charge, an dey no poin finga.

Jesus Show 10:1

Den, jalike one dream, I see anodda angel guy dat get plenny powa, coming down from da sky. He get one cloud fo his clotheses, an one rainbow aroun his head. His face jalike da sun, an his legs jalike fire.

Jesus Show 18:21

Den one strong angel guy pick up one mangus stone, dass big jalike one millstone. He throw um inside da ocean. Den he tell, “Dass how Babylon, da big town, goin come wipe out real fas! An nobody goin eva see um no moa!