Isaiah 10:17 - Hawaii Pidgin Bible

¹⁷ Da God dat give da Israel peopo light, Fo da Assyria peopo, he goin come jalike one fire. Da One dat stay good an spesho fo da Israel peopo Goin burn up da Assyria peopo. In one day, dat fire goin burn up All da Assyria peopo, jalike dey thorns an weeds.

Isaiah 10:17 ပူးပေါင်းရင်းမြစ်များ

Songs 18:8

God come huhu, Jalike smoke come outa his nose. Jalike fire come outa his mout Dat burn up stuff. From him, fire come Jalike kiawe stay burning.

Songs 21:9

Wen you face all dose peopo, You goin wipe um out Jalike you put um inside one deep hole wea get fire. Da One In Charge, he stay huhu wit dem. Dass why he goin wipe um out. Dey goin mahke, jalike da fire eat um up.

Songs 27:1

Da One In Charge, he help me, An he get me outa trouble, Jalike he da light fo me. No need fo me stay sked nobody! Da One In Charge, he goin make shua nobody kill me, Jalike he one strong wall fo me, I no need come sked an shaking.

Songs 50:3

Wen oua God come, He no goin stay quiet. Goin be jalike one fire go in front him An burn up eryting! Goin be jalike get one hurricane Stay aroun him!

Songs 84:11

Cuz oua God, Da One In Charge, He show us guys wea fo go Jalike wen da sun shine. An he proteck us guys Jalike one shield. He like do plenny fo us guys, An he make us come mo awesome. Da One In Charge, He no goin hold back notting good From da peopo dat stay do wass right.

Songs 97:3

Get fire dat go in front him An burn up all da ones aroun him Dat stay agains him.

Isaiah 26:11

Da One In Charge, dat kine peopo no can see notting! Dey donno dat you stay put up yoa hand awready Fo use yoa powa fo punish dem! I like dey come shame wen dey look An see dat you stay go all out fo yoa peopo, An jalike you make da fire burn up an kill Da peopo dat stay agains you.

Isaiah 27:4

I no stay huhu wit my peopo no moa. If get peopo dat ack jalike Thorns an stickas Dat come up inside one grape farm, I goin attack um an burn um all up!

Isaiah 27:7

Da time Da One In Charge wen bus up da Israel peopo, You tink he wack um mo hard, Den wen he bus up da odda peopo Dat wen bus up da Israel peopo? No way! Da time he wen wipe out da Israel peopo, You tink he wipe um out mo plenny, Den wen he wipe out da odda peopo Dat wen wipe out dem? Not even!

Isaiah 30:33

Da place outside Jerusalem Wea da peopo dat donno God Burn up dea kids Fo make one sacrifice fo dea idol kine gods, From long time, jalike dat place stay ready Fo burn up da Assyria king. Somebody wen dig da burning place Real deep an real wide. Get plenny fire An plenny wood all pile up dea. Wen Da One In Charge blow on top um, Make um start fo burn, Jalike one burning sulfur riva Make da wood pile burn.

Isaiah 31:1

Bummahs! fo da peopo dat tink Da Egypt peopo goin help um erytime! Dey stay shua dey goin come okay If dey buy plenny horse dea. Dey trus da Egypt war wagons cuz dey get plenny, An plenny guys fo ride horse. But dey no go by Da One In Charge, Da Good an Spesho One fo da Israel peopo. Dey no aks him wat fo do!

Isaiah 31:9

Da big rock wea da Assyria guys like hide, Dey goin run pass um Cuz dey plenny sked. Wen dea officer guys see Da One In Charge flag fo war, Dey goin come sked an lose fight.” Dis word come strait from Da One In Charge: Wea can see da light from his fire Inside da Temple on top Mount Zion. Can see wea he burn up his rubbish Inside Jerusalem town.

Isaiah 33:12

Da diffren peopos goin burn Jalike wen you pile up coral rock an wood An burn um slow fo make lime fo plasta. An jalike wen you cut down plenny thorn bush An dey burn real fas.

Isaiah 33:14

Inside Jerusalem town, Da peopo dat stay do bad kine stuff, Dey stay sked! Da ones dat tink God notting, Dey no can stop shake no moa! Dey talk: ‘No mo nobody from us guys Can live wit da fire dat goin burn us up! No mo nobody from us guys Can live wea da fire goin burn all da time!’

Isaiah 37:23

“ ‘Who you wen make shame, Sennakerib?! Who you talk bad bout, aah?! You wen go talk strong agains me! You tink you mo betta den me, Da Good An Spesho God fo da Israel peopo!

Isaiah 37:36

Den one angel messenja guy from Da One In Charge go out fo fight. He kill 185,000 army guys inside da Assyria camp. Wen da odda peopo ova dea get up early da nex morning, get plenny mahke bodies all ova da place!

Isaiah 47:14

But you know wat?! Dose star watcha guys, Dey jalike one dry wheat stalk Dat da fire burn um up fas. Dey no can even run away from da fire Fo no burn up. Dat kine fire burn out real fas. Dass not da kine fire Dat make you stay warm.

Isaiah 60:19

You guys no goin get da sun fo light day time. Da moon no goin shine fo make um bright fo you guys. Me, Da One In Charge, I goin be da light fo you guys foeva. I yoa God, an I goin make awesome kine fo you guys.

Isaiah 66:24

“An wen peopo go outside Jerusalem, dey goin see all da mahke bodies a da peopo dat wen go agains me. Da worm dat stay eat dem no goin mahke, an da fire dat burn dem no goin pio. Erybody goin feel pilau wen dey see da bodies.”

Isaiah 9:18

Cuz wen somebody do bad kine stuff, Az jalike wen get one big fire. All da thorns an da grass burn, An all da trees burn too, Wit plenny black smoke dat go up in da sky.

Jeremiah 4:4

Cut skin yoa boys fo show dat dey da peopo a Da One In Charge. Make same kine inside you, Fo show dat inside, you da peopo a Da One In Charge, fo real kine! Cuz if you guys not pono inside, Den I talking to you guys from Judah, An you peopo dat live inside Jerusalem town: I tell, I no like show how mad I stay agains you guys, An burn you up jalike wit fire! But if you guys stay do real bad kine stuff still yet, Den no goin get nobody dea fo pio dat fire!”

Jeremiah 7:20

“Az why Da One In Charge a me tell: ‘You know wat I goin do to dis place?! I goin come real huhu, an I had it wit wat dis peopo do. Az why da peopo inside dis place hea, an da animals, da trees, an da stuffs dat grow on top da groun—eryting goin burn, an no mo nobody can pio da fire!’ ”

Nahum 1:10

Jalike he goin make dem come All jam up inside da thorn bushes. Dey goin come piloot from drink dea wine. Dey goin come burn up jalike da dry junks from da wheat.

Zefaniah 1:18

Dea silva an gold no can get dem outa trouble dat day Wen Da One In Charge go wild wit dem. He goin be jealous, jalike one fire Dat goin burn up all da peopo inside da world. Cuz az fo real, dat he goin bring one skery end Fo all da peopo dat live on top da earth!”

Zekariah 12:6

“Dat time I goin make da Judah leada guys come jalike one fire pan wit hot coals dat make one big stack wood burn, an jalike one torch dat burn up da wheat afta dey harves um. Dey goin burn up all da peopo dat stay aroun dem, but da Jerusalem peopo goin stay safe.

Census 16:35

Den fire come from Da One In Charge an burn up da odda 250 guys dat stay burn incense.

Matthew 3:12

Jalike he goin throw all da wheat fo let da wind blow all da no good parts from da wheat, an den he goin put dat wheat inside da storage place. Afta dat, he goin burn all da no good parts inside da fire dat no goin pio eva.”

Rules Secon Time 4:24

Cuz yoa God, Da One In Charge, he stay jalike one fire dat burn up eryting. He no like you guys go down in front da idol kine gods. He one jealous God.”

Hebrews 12:29

You know, jalike da Bible tell, “Oua God, he jalike one fire dat burn up eryting.”

Jesus Show 21:23

Da town no need da sun o da moon fo shine on top um, cuz God stay awesome, an God light shine on top um, an God Bebe Sheep Guy jalike da lamp.

Jesus Show 22:5

No goin get nite time no moa. Dey no goin need da light from da lamp o da light from da sun, cuz God, Da One In Charge, he goin give dem light. An dey goin be in charge a da world wit God da King foeva.