Isaiah 1:2 - Hawaii Pidgin Bible

² Lissen, erybody in da world an inside da sky, Cuz me, Da One In Charge, da Good Boss, stay tell you dis: “I wen take kea da Israel peopo Jalike dey my kids, an help um grow up. But still yet, dey go agains me.

Isaiah 1:2 ပူးပေါင်းရင်းမြစ်များ

2 Kings 21:22

He tell “Laytas” to Da One In Charge, da God fo his ancesta guys, an no live how Da One In Charge tell um fo live.

Songs 49:1

Hear dis, all you peopos! Try lissen up, all you peopo Dat live all ova da world!

Songs 50:4

He tell da sky an da earth, “Eh, come watch dis! I goin judge my peopo!

Isaiah 30:1

Dis, one message from Da One In Charge: “Bummahs! to da hard head peopo Dat stay go agains me! Dey make one plan an do um, But da plan, not from me. Dey make one deal wit peopo from anodda country, But my Spirit neva tell dem fo do dat. Dey do one bad ting, Den anodda mo worse ting.

Isaiah 30:9

Go do dat cuz dis peopo Dey hard head. Dey ony like go agains Da One In Charge. Dey jalike kids dat stay bulai erybody. Da One In Charge stay teach dem plenny, But dey no like lissen.

Isaiah 31:6

You Israel peopo, go back by Da One In Charge! You wen go agains him, an dass real bad.

Isaiah 34:1

Go come nea by me ova hea, you peopo Inside da diffren countries Fo lissen wat I tell. I like all da peopos all ova da world, An eryting dat stay hea An grow hea inside da world fo lissen.

Isaiah 63:16

But you, you oua Faddah! Cuz no matta Abraham an Israel Dey donno notting bout us guys, You Da One In Charge, you oua Faddah! You da One wen do wat you gotta do Fo get us guys outa trouble from befo time. Cuz dass wat kine god you, An dass yoa name, Get Us Outa Trouble!

Isaiah 65:2

“All day, I put out my hand To da peopo dat stay go agains me. Dey do stuff dass no good. Dey like do ony wat dey like do, An dass wat dey goin do.

Jeremiah 13:15

Lissen up, you Judah peopo! No ack high makamaka! Do wat Da One In Charge tell you fo do!

Jeremiah 22:29

Lissen up! Even da Judah land Gotta lissen up good, wat Da One In Charge tell!”

Jeremiah 3:22

Da One In Charge tell: “Go come back, you peopo Dat nobody can trus. I goin make you guys come good one mo time, So bumbye you no bag from me. “Mo betta you tell: ‘Az right, us guys da one! Us guys like come by you now, Cuz you oua God, dass Da One In Charge a us.

Jeremiah 31:9

Dey goin cry all da way hea, An wen I lead dem, dey goin pray plenny. I goin bring dem by da streams dat get plenny watta inside dat time, On top one easy fo go road Wea nobody goin trip an fall down. Cuz I da faddah fo da Israel peopo, An da Efraim ohana, dey jalike my numba one boy.

Jeremiah 6:19

Lissen, all you peopo on top da earth! Dis wat I stay do: I stay make bad kine stuff happen to dis peopo. Da same ting dey make plan fo do, goin happen to dem, Cuz dey no bodda fo lissen wat I tell dem. Dey hate my rules.

Ezekiel 24:3

Go talk to dis ohana dat go agains me, an give um one picha bout wat stay happen, from Da One In Charge, da Boss: Put one cooking pot on top da fire an pour watta inside um.

Ezekiel 36:4

Az why you Israel mountains gotta lissen up wat Da One In Charge, da Boss, tell! He stay talk to da mountains an hills, da gulches, da valleys, da places dat stay skery cuz dey all wipe out. He stay talk to da towns dat erybody bag from too. Da odda peopos aroun you guys wen rip off dose towns an make fun of um.

Amos 3:1

Eh! Lissen up, you Israel peopo! I stay talking fo God, cuz Da One In Charge stay tell dis to you guys, da whole ohana dat he wen bring hea from Egypt side.

Micah 1:1

Wen Jotam, den Ahaz, an den Hezekiah stay king Judah side, Micah from Moreshet town talk fo Da One In Charge. Dis wat Da One In Charge show Micah bout Samaria an Jerusalem:

Micah 1:2

All you peopos, lissen dis! Erybody on top da earth, lissen good: Da One In Charge a me stay inside Da Temple dat stay spesho fo him, He poin finga you guys.

Micah 3:8

Den me Micah tell, “Fo shua, wit da spirit from Da One In Charge, I stay real strong, He help me figga wass right an wass wrong, An make me come strong Fo tell da Jacob an Israel peopo All da bad kine stuff dey stay do.

Malakai 1:6

Da One In Charge tell, “Eh, you pries guys dat talk bad bout me! Da boys, dey suppose to get respeck fo dea faddah guys, aah? An da worka guys, dey suppose to get respeck fo dea boss guys. So den! I da faddah fo you guys, but you guys no mo respeck fo me. I da boss fo you guys, but you not sked fo no do wat I tell you fo do. Me, Da One In Charge, Da God Ova All Da Armies, an dass wat I stay tell you guys.” But you pries guys tell, “Tell us, how us guys talk bad bout you?!”

Jesus Guys 4:20

Cuz us guys, no way us can no talk bout da tings we wen see an hear.”

Rules Secon Time 1:31

An inside da boonies, you guys wen see God, Da One In Charge, take kea you guys, jalike one faddah carry his boy inside his arms. He bring you guys all da way to dis place.

Rules Secon Time 30:19

“Today in front all da powas inside da sky an hea in da world, I like dem see dat you get one chance fo pick da way you like live: you can pick fo stay alive, o fo mahke. You can pick fo get good kine stuff come to you guys, o pick fo get real bad kine stuff come to you guys. So pick now fo stay alive! Den you an yoa kids goin stay alive.

Rules Secon Time 32:1

Lissen, peopo on top da earth an in da sky, Lissen wat I goin tell.

Rules Secon Time 4:26

Jalike I goin call da sky an da earth fo see wat you guys do today, fo dem grumble bout you guys if you no do wat I stay tell you guys. Cuz if you guys no do um, you goin mahke real fas inside da land wea you guys stay cross da Jordan Riva fo take charge. Den you guys no goin live ova dea long time, but you guys goin be wipe out fo shua.