Hosea 4:13 - Hawaii Pidgin Bible

¹³ Dey make sacrifice on top da mountains. Dey burn incense on top da hills, Unda da oak tree, da poplar tree, an da terebint tree, Dey do um wea get good shade. “Az how come yoa girls come hoaz, An az why yoa daughtah-in-laws go fool aroun Behind dea husban back.

Hosea 4:13 ပူးပေါင်းရင်းမြစ်များ

2 Kings 17:7

All dat wen happen cuz da Israel peopo show mo respeck fo da odda gods, but not fo Da One In Charge. Dey wen do bad kine stuff agains dea God, Da One In Charge, no matta he da One wen bring dem outa Egypt befo time, fo da Egypt king, da Pharaoh guy, no mo powa ova dem no moa.

2 Kings 23:7

An he broke down da houses inside da open lanai aroun da Temple Fo Da One In Charge. Get guys dat live dea an work fo da idol kine gods, an da wahines pay fo fool aroun wit dem. Az da same houses wea get wahines dat weave stuff fo da wahine god Asherah, all a dem inside da open lanai fo da Temple.

Isaiah 1:29

“Fo shua, you guys goin come shame plenny Cuz you like go down in front da idol kine gods Inside places wea get oak trees an garden.

Isaiah 57:5

You guys like fool aroun Unda da kine kapu trees fo da idol kine gods. You guys kill yoa kids fo da god Molek Down by da streams dat no mo watta, Fo make sacrifice unda da cracks in da cliffs.

Isaiah 57:7

You guys, jalike one wahine Dat put her bed on top one real high mountain. An den she go up dea fo make sacrifice an make sex. An you guys, you do da same ting too.

Jeremiah 2:20

“Long time befo time you guys wen no do wat I tell you fo do, Jalike one cow dat broke off da yoke fo pull da wagon, An broke da ropes dat tie um. You guys wen tell, ‘Us no goin work fo you!’ Fo shua, unda da trees wit plenny leaf on top ery big hill, You guys ack jalike da wahines Dat make sex dea fo get money.

Jeremiah 3:13

But one ting I tell you guys gotta do— You gotta tell wat you wen do az wrong, An dat you guys wen go agains me, yoa God, Da One In Charge, An dat you guys fool aroun all ova da place Wit odda peopo gods, Unda all da trees dat get big shade. An wen I talk, you guys no lissen, you make deaf ear! Az wat Da One In Charge tell.’ ”

Jeremiah 3:6

Da time Josiah stay king, Da One In Charge tell me, “You see wat da Israel peopo wen do? Dey ack jalike one wahine dat no stay tight wit her husban. Dey go up on top all da high hills an unda ery tree dat get big shade, an go fool aroun dea in front da odda gods, jalike da hoaz.

Jeremiah 44:8

How come you guys make me come real huhu wit yoa idol kine gods dat you guys make wit yoa hands, aah? Cuz you guys burn incense fo da odda gods inside Egypt wea you guys live now! You guys come wipe out. You goin make all da odda peopos on top da earth like put kahuna on top you. Dey goin poin finga you cuz a all da bad stuff you do.

Ezekiel 16:16

You use some a da nice clotheses I wen give you fo make fancy kine sacrifice places fo da idol kine gods. You lay on top da clotheses fo go make sex. Unreals, all dis kine stuff happen!

Ezekiel 16:25

At da end a ery street, you make one sacrifice place fo da odda gods an come pilau cuz a dat. Dis make you come ugly, no matta befo time you look nice. You open up yoa legs fo all dem dat pass by dea, an you fool aroun mo an moa.

Ezekiel 6:13

An dey goin know az me, Da One In Charge, dat stay do all dis. Dey goin know dis, cuz goin get all da mahke bodies on top da groun nex to da idol kine gods dat stay aroun all dea altars on top all da high hills, an all da mountains, an undaneat ery healthy kine tree, an all da oak trees wit plenny leaf, ery place wea dey burn up da sacrifices fo make nice smell fo make all dea idol kine gods feel good.

Hosea 10:8

Da sacrifice places on top da hills nea Bet-Aven— Dat mean “house wea peopo do wass wrong”— Dey goin come wipe out. Az wea da Israel peopo stay do da real bad kine stuff. Thorns an da kine weed dat make yoa skin itchy Goin grow ova dea an cova dea altars. Den da peopo goin tell da mountains, “Proteck us!” An tell da hills, “Fall down on top us!”

Hosea 11:2

But no matta how plenny I wen call dem, Dey go da odda way, mo far away. Dey wen make sacrifice fo da Baal gods, An dey burn incense fo da idol kine gods.

Hosea 2:13

I goin punish her fo all da times She go burn incense fo da Baal idols. She put on plenny rings an jewelry. She go wit da guys dat make sex wit her, But she foget bout me.” Az wat Da One In Charge tell.

Amos 7:17

But cuz you stay talk lidat, dis wat Da One In Charge tell: “Yoa wife, she goin come one hoa Right hea inside yoa home town. Da ones dat stay agains you Goin kill yoa boys an yoa girls wit swords. Yoa land, odda peopo goin measure um fo broke um up an sell um. An you, you goin mahke inside anodda land dat stay pilau, Cuz you Israel peopo goin come prisonas Far away from yoa land.”