Hosea 14:1 - Hawaii Pidgin Bible

¹ Hosea tell: “You Israel peopo, come back by oua God, Da One In Charge. All da bad kine stuff you guys wen do, Az wat wen bring you guys down!

Hosea 14:1 ပူးပေါင်းရင်းမြစ်များ

2 Kings 8:12

Hazael aks, “Boss, how come you stay cry?” Elisha tell, “Cuz I know fo shua, bumbye you goin do bad tings fo hurt da Israel peopo. You goin burn down dea big towns dat get strong wall, kill dea young guys wit swords, smash dea small kids on top da groun, an rip open da stomach a dea hapai wahines.”

Isaiah 19:22

He goin punish da Egypt peopo wit one bad kine sick, but den he goin make um come good. Cuz dey goin change dea mind an come tight wit Da One In Charge, an he goin lissen wen dey pray to him, an make um come good.

Jeremiah 2:19

Da bad kine stuff you guys do, Dass wat goin punish you guys. Da way you guys make deaf ear to me, Dat show proof awready dat you guys stay wrong. Try tink hard, an you goin know Dat eryting come real bad fo you guys, Jalike you haunas! Az cuz you guys bag from me, yoa God, Da One In Charge, An no show respeck fo me.” Dass da message from Da One In Charge, da God Ova All Da Armies.

Jeremiah 4:1

Dis, da message from Da One In Charge: “You Israel peopo, If you guys come back, Den come back by me! “You guys gotta throw way yoa pilau idol kine gods, Fo me no see um no moa. An you guys gotta no go all ova da place no moa, From one bulaia kine god to anodda.

Sad Song 5:16

Da lei fall off oua head, cuz we wen come all bum out! Bummahs fo us guys! Us wen do bad kine stuff!

Ezekiel 16:46

Yoa older sistah, her Samaria town. She live north side from you wit her girls. An yoa younga sistah live south side from wea you live wit her girls. She Sodom town.

Ezekiel 33:11

“Tell um, ‘Fo shua az me Da One In Charge, da Boss, tell dis. I stay alive! An fo shua, no ways I stay good inside wen one bad kine guy mahke. Mo betta dey no do no moa da bad kine stuff dey wen do. Den dey goin stay alive fo real kine! No do da bad kine stuff no moa! Run away from all dat! How come you ack jalike you like mahke, you Israel peopo?!’

Ezekiel 33:14

Maybe I tell one bad kine guy, ‘You goin mahke inside fo shua!’ But den he turn his life aroun from da bad kine stuff he wen do befo time, an now he do da good an right kine stuff.

Hosea 10:12

Do da right tings! Dass da kine seed you guys gotta plant fo ony you! An you stay tight wit me! Dass jalike da kine fruit you guys gotta pick! Broke up da hard dirt inside you dat you neva plow yet! Cuz stay time now fo come tight wit me, Da One In Charge, Till I come teach you guys how fo do wass right, Jalike da rain make da groun come sof fo good stuff grow.

Hosea 12:6

You guys, gotta go back by yoa God. Stay tight wit him, an do da right kine tings. Erytime trus yoa God an wait fo him.

Hosea 12:8

Az why da Israel peopo talk big. Dey tell, “Fo shua, I rich! But fo all da tings I wen get from my work, No can find notting bad dat I wen do!”

Hosea 13:9

“You Israel peopo, somebody goin wipe you out Cuz you stay agains me, An I da ony One can help you guys.

Hosea 4:8

“Wen da peopo do bad tings, Dey go bring animals fo sacrifice. Ony den, da pries guys get plenny fo eat. So fo dem, az good wen peopo do wass wrong!

Hosea 5:5

“Da Israel peopo get big head, Dat show dat dey get da blame. Da Efraim peopo an da odda Israel peopo, Jalike dey trip an fall down wen dey do bad kine stuff. An da Judah peopo trip an fall down wit dem.

Hosea 6:1

Da Israel peopo tell, “Go come, we go back by Da One In Charge. He wen rip us up, But he goin make us come good. He wen wack us guys, But he goin put one bandage on us.

Hosea 9:13

I wen pick da Efraim peopo, Fo make um come good looking an rich Jalike da Tyre peopo was befo time, Jalike I plant dem inside one nice place wit plenny grass. But now, da Efraim peopo gotta bring out dea kids Fo da ones dat stay agains kill um.”

Hosea 9:7

Da time fo punish you stay come. Az da time fo pay you back, cuz you wen make lidat. Make shua da Israel peopo know dat! You guys do plenny bad kine stuff, An you guys hate me plenny. Az why you guys tink da guys dat talk fo God Do bad kine stuff an no bodda dem, An you tink da guys dat lissen God Spirit, pupule.

Amos 1:13

You betta lissen! Dis wat Da One In Charge tell: “Ova an ova, da Ammon peopo wen go agains me. Az why, no way I goin let um go an no punish dem! Gilead side, dey even wen rip open da hapai wahines Jus fo dem take ova mo plenny land.