Esther 4:3 - Hawaii Pidgin Bible

³ Inside ery districk wea da Jew guys hear wat da king tell da odda peopos fo do, da Jews ack jalike get funeral. Dey no like eat, an dey cry an yell real loud. Plenny Jew guys all ova da place wear burmbag clotheses, an throw ashes up in da air an let um come down on top dea head cuz dey stay plenny sore inside.

Esther 4:3 ပူးပေါင်းရင်းမြစ်များ

Esther 1:1

Dis wat wen happen wen Xerxes was king fo da 127 districks dat get dea local govmen, from India to Sudan.

Esther 3:12

Den April 17, Haman call da king secretaries. Da secretaries write da way da peopo inside ery districk stay write, an use dea alphabets. Dey write um fo ery peopo in dea language. Dey write wat Haman like tell da govnas fo da states, da govnas fo all da districks dat get dea local govmen, an da alii fo ery peopo. Den, fo show dat King Xerxes da one tell um fo write wat Haman tell, den dey stamp ery paypa wit da ring da king use fo offisho work.

Esther 4:16

“Go bring togedda all da Jew guys you can find inside Susa town. No eat food so you can pray fo me. No eat an no drink fo three day, day time o nite time. Me an da wahines dat work fo me, we goin do da same ting, no eat an no drink notting fo three days too, fo us pray. Afta we do dat, I goin go in front da king, no matta I stay broke da rules. An if I mahke, I mahke.”

Esther 4:2

But he ony stay by da king gate, cuz dey no let nobody wit burmbag clotheses go inside dea.

Esther 4:4

Wen da wahines dat work fo Queen Esther, an her guys dat stay in charge a da wahines, tell Esther bout Mordecai, bodda her plenny. She sen clotheses fo him put on, so he no need wear burmbag clotheses, but he no like use um.

Esther 9:31

Az why da Jews can set up da Purim hoolaulea da same time ery year, jalike Mordecai da Jew an Queen Esther tell dem an dea kids dey gotta do, jalike dey wen set up odda times wen dey an dea kids gotta skip food wen dey pray, an aks fo help.

Job 2:8

Job sit down wit ashes all aroun him. He take one piece from one clay pot dat wen broke, an scrape his skin wit um.

Isaiah 22:12

My boss, Da One In Charge, Da God Ova All Da Armies, He goin call you dat time Fo cry an stay sad inside, Fo pull out yoa hair, An put on burmbag kine clotheses, Fo show you stay sad inside.

Isaiah 22:4

Dass why I tell dis, “Go way! No look at me! Let me cry hard! No try make me feel good inside Cuz dey wipe out my peopo! My peopo, dey jalike one wahine, Gone awready, eryting dey get.

Isaiah 58:5

You tink dat wen I like fo you skip food, I ony like fo peopo ack jalike dey notting, An bow down dea head Jalike one reed dat stan up inside da watta, An spread out one burmbag cloth wit ashes on top Fo lay down dea. You guys tink dass all you guys gotta do wen you skip food fo pray?! You tink dat goin make me, Da One In Charge, feel good inside?! No way!

Ezekiel 27:30

Dey goin yell an cry real hard bout you Tyre peopo. Dey goin pick up dirt an throw um on top dea head, An roll on top da ashes fo show how sore dey stay inside.

Daniel 9:3

Az why I no eat so I can pray, an put on burmbag kine clotheses an put ash on top my head cuz I stay real sore inside. I tink ony bout God, my Boss, an I pray. I beg him fo help me.

Jonah 3:6

Den da king fo Nineveh, he hear bout wat Jonah stay tell too. He stan up from his throne, take off his fancy king kine robe, an put on burmbag kine clotheses an go sit down on top da ashes, fo show he stay sorry inside.

Matthew 13:42

Den dey goin throw um inside wea ony get plenny fire. Ova dea dey goin cry real hard an grind dea teet cuz dey so huhu an futless.

Matthew 22:13

So da king tell his worka guys, ‘Eh, tie up dis guy hands an feet, an throw um outside inside da dark. Ova dea goin get peopo dat goin cry real hard an grind dea teet cuz dey so huhu an futless.’

Matthew 25:30

Go throw dis no good worka guy outside in da dark. Ova dea dey goin cry real hard an grind dea teet cuz dey so huhu an futless.”

Joshua 7:6

Joshua rip his clotheses, an go down an put his face on top da groun in front da Box Fo No Foget Da One In Charge. He stay dea till litto mo dark. Da older leadas fo da Israel peopo do da same ting, an throw dirt on top dea head fo show dey stay sad inside.

1 Samuel 11:4

Wen da messenja guys come Gibeah town wea Saul stay, an tell da peopo wat kine deal Nahash stay make, all da Gibeah peopo start fo cry real loud.