Efesus 2:4 - Hawaii Pidgin Bible

⁴ But you know wat? God give us choke plenny chance erytime! He get choke plenny love an aloha fo us guys!

Efesus 2:4 ပူးပေါင်းရင်းမြစ်များ

Nehemiah 9:17

“Dey tell, ‘No way us guys goin lissen wat God tell!’ Dey no even tink bout da awesome kine tings you do Right dea in front dem. Dey even come mo hard head fo go agains you, An pick one leada guy fo bring dem back Egypt side Fo come slave guys one mo time. “But you, you one God dat no bodda you Fo let da peopo go Fo da bad kine tings dey do. You get one big heart fo do good tings fo peopo. You get pity fo peopo. You take long time befo you get huhu. You erytime stay tight wit yoa peopo. Dass why you neva leave yoa peopo dat time,

Songs 145:8

Da One In Charge, he real good Fo give peopo chance. He get choke pity fo dem. He no come huhu real fas. He stay tight wit his peopo foeva.

Songs 51:1

Eh God! Give me chance, Da way erytime you stay tight Wit yoa peopo. Cuz you stay get plenny pity fo dem, Az why you gotta hemo da shame I get Cuz I wen go agains you.

Songs 86:15

But you my Boss. An you da kine God dat pity erybody An you erytime like give dem chance. You no come huhu real fas, You erytime stay tight wit yoa peopo, An dey know dey can trus you.

Songs 86:5

You my Boss, an you get one good heart. You stay ready erytime fo let me go Fo da bad tings I wen do, You stay tight wit yoa peopo all da time, Wit da ones dat stay yell Fo you help um.

Outa Egypt 33:19

An Da One In Charge, tell, “I goin show you eryting bout how good I stay. I goin let you hear wat my name ‘Da One In Charge’ mean. I goin do plenny good tings fo whoeva I like do um fo, an I goin show plenny pity fo whoeva I get pity fo.

Isaiah 63:7

“I goin make shua nobody foget, An tell all dat Da One In Charge do Cuz he stay tight wit us guys, An I goin tell all da good tings Bout Da One In Charge Cuz he do good tings fo us guys. He give us Israel ohana peopo Plenny good kine stuffs. He show love an pity fo us guys, An he stay tight wit us guys foeva.

Jeremiah 31:3

From long time befo time, Me, Da One In Charge, I wen show up fo dem see me. I tell: “I get plenny love an aloha fo you guys fo long time. Dass why fo long time I stay tight wit you guys.

Daniel 9:9

God, you da Boss. You da One show pity an let us go, no matta us wen go agains you.

Jonah 4:2

Jonah pray to Da One In Charge lidis: “Bummahs! You Da One In Charge! You know, all dis happen jalike I wen tell wen I stay my country! Dass why I wen run away fas fo go Tarshish side, you know. Fo shua you da kine God dat like do good tings fo peopo an show pity fo dem. Take long time befo you come huhu. You stay tight wit yoa peopo long time an give um chance. Dass why you change yoa mind an no punish da bad kine stuff peopo do.

Luke 1:78

Oua God give chance cuz he get one big heart. Dass why one new day goin come up fo us guys from God in da sky.

Rome 10:12

Da Jew guys an all da odda peopos, dey all same same. No mo diffrence. Cuz get Da One Dat Stay In Charge, an he Da One In Charge fo erybody. He goin do plenny fo erybody dat aks him fo kokua dem.

Rome 2:4

God get plenny good heart fo you, an he stay hang in dea an wait fo you. An den, you make jalike dass notting? You no tink he like you come sorry an no do da bad kine stuff no moa, o wat?!

Rome 5:8

But God show how plenny love an aloha he get fo us, cuz same time we do bad kine stuff, Christ still yet wen mahke fo us.

Rome 9:23

He wen do dat cuz he like show dat he goin give chance to some peopo. Dey da ones dat he make one plan from befo time fo dem come awesome. He like make shua erybody know dat he stay awesome to da max.

Efesus 1:7

No matta us guys broke da Rules from God, still yet Christ da One dat wen go bleed an mahke fo us. Christ cut us loose from da powa da bad kine stuff get ova us. He hemo oua shame cuz he like do plenny good kine stuff fo us, an cuz we stay tight wit him.

Efesus 2:7

God do all dat fo show proof foeva an eva dat he wen go all out fo do plenny good stuff fo kokua us cuz we stay tight wit Jesus Christ.

Efesus 3:8

All da odda peopo dat stay spesho fo God stay mo importan den me. Still yet, God wen pick me fo do dis job. Dis da job fo tell all da diffren kine peopos dass not Jew guys all da unreal an awesome kine stuffs bout Christ. Dat awesome kine stuff mo awesome den anybody can figga. Dis job, jalike one spesho gif God give me fo do.

2 Tessalonika 2:13

Eh my braddahs an sistahs! Good us erytime tell God “Mahalo plenny” wen we tink bout you guys. Da One In Charge get plenny love an aloha fo you guys, you know! From da start, God wen pick you guys fo take you outa da bad kine stuff you wen do befo time. Dat mean, God Spirit goin make you guys be good an spesho fo him, an help you guys stay trus da stuff dat stay true.

1 Timoty 1:14

Da One In Charge a us guys, he wen do choke plenny good tings fo me. Now I stay tight wit Jesus Christ. Az why I can trus him, an I can show love an aloha jalike him.

2 Timoty 1:9

Eh! God wen take us outa da bad kine stuff we do. He wen pick us fo go all out fo him. He neva do dat cuz a wat us guys wen do, But he wen do dat cuz he wen make one plan fo do dat, An he like do good tings fo us guys. He wen do all dat fo us befo da world wen start, Cuz he know us goin stay tight Wit his Spesho Guy Jesus Christ.

1 Peter 1:3

I like erybody tell how good God oua Faddah stay, an how good his Boy Jesus Christ, Da One In Charge, too. God, his Faddah, he give us guys plenny chance. Wen Jesus Christ wen mahke, he come back alive! So den, Christ wen give us one new kine life, jalike we wen born one mo time. Us guys stay trus Christ cuz we know fo shua wat he goin do fo us bumbye.