Daniel 4:34 - Hawaii Pidgin Bible

³⁴ “Afta da seven year, me, Nebukadnezzar da King, wen look up to da One inside da sky. Den I start fo tink one mo time. I tell bout da God Dass Mo Importan Den All Da Odda Gods, how he do good tings fo me! “I tell good tings bout da One Dat Stay Live Foeva, An I tell dat he stay awesome, An he goin stay king foeva! He get da right fo stay in charge Ova all da peopo dat live today An ova all da peopo dat goin live bumbye.

Daniel 4:34 ပူးပေါင်းရင်းမြစ်များ

2 Samuel 22:31

“God, he perfeck Da way he do tings. Eryting dat Da One In Charge promise fo do, You can trus he goin do um. Fo all da peopo dat trus Da One In Charge fo take kea dem, He jalike one shield dat no let um get hurt.

1 Records 29:10

David tell Da One In Charge “Mahalo” in front all da peopo dat come togedda dea, cuz Da One In Charge stay do good tings fo dem. David tell, “Eh! You Da One In Charge! Mahalo, cuz you do good tings fo us guys! You da God fo oua ancesta guy Israel. You stay from befo time an foeva.

1 Records 29:13

An now, oua God, us guys like tell you ‘Mahalo plenny!’ We tell erybody dat we know who you, An you da greates, cuz you stay real awesome!

Job 1:21

He tell, “Wen I come outa my muddah belly, I stay naked, no mo notting! Wen I leave dis world, I no goin get notting! Da One In Charge give, An Da One In Charge take away. I goin talk good bout Da One In Charge Cuz I know wat kine god him!”

Songs 10:16

Eh! You Da One In Charge! You da King foeva! All da odda peopos dat donno you, You goin hemo dem from yoa land foeva!

Songs 102:24

I wen tell, “Eh! You da God fo me, An you stay live foeva! I ony live half my life, No make me mahke!

Songs 107:15

Good, dose peopo tell good tings Bout Da One In Charge Cuz he stay tight wit his peopo, An he do awesome kine stuff Fo peopo all ova da world.

Songs 107:22

Good dey make one sacrifice Fo tell God “Mahalo!” An tell da story Bout all da tings God stay do. Good dey yell Cuz dey stay good inside!

Songs 107:31

Good, dose peopo tell good tings Bout Da One In Charge Cuz he stay tight wit his peopo, An he do awesome kine stuff Fo peopo all ova da world.

Songs 107:8

Good, dose peopo tell good tings Bout Da One In Charge, Cuz he stay tight wit his peopo, An cuz he do Awesome kine stuff fo erybody.

Songs 111:7

Eryting Da One In Charge do, You can trus um, An you know he get da right fo do um. Eryting he tell you gotta do, Fo shua, good fo you do um.

Songs 121:1

Erytime I look da mountains, I tink: Who goin help me?

Songs 123:1

I look up fo pray to you. You, da King. Yoa throne Stay inside da sky.

Songs 145:13

Da powa you get fo be king, Dat powa goin be lidat foeva! Da right you get fo stay in charge A da peopo right now, Goin be fo dea kids too, An fo dea kids kids! Da One In Charge, he erytime do Wat he tell he goin do, An eryting he do, He stay tight wit his peopo.

Songs 146:10

Da One In Charge, He goin stay king foeva! You peopo dat go Mount Zion Fo pray to God, Yoa God stay king fo da peopo Dat stay alive now, An fo all da ones Dat goin come from dem bumbye! Eh you guys! Tell good tings Bout Da One In Charge!

Songs 50:14

You know wat da real kine sacrifice You suppose to make Fo me, yoa God? You gotta tell me ‘Mahalo!’ Fo wat I do, An wateva promise you wen make to me, Do um. Dass da real kine sacrifice.

Songs 66:7

God da One get da right Fo stay in charge foeva, Cuz he strong. All da time he stay watch Da diffren nations real good. Da nations dat like go agains him, No good dey tink dey mo big den him. (Time out fo da music.)

Songs 7:17

I goin tell erybody dat Da One In Charge, he da bestes Cuz he do da right ting erytime! I goin sing so peopo know wat kine god him, Da One In Charge, da God Dass Mo Importan Den All Da Odda Gods!

Songs 9:2

I like dance an sing cuz I stay tight wit you. I like tell good tings bout you Cuz I know who you: Da God Dass Mo Importan Den All Da Odda Gods.

Songs 92:1

Good, fo tell erybody Dat you da greates, Da One In Charge! Good, fo make music Fo erybody know who you, Da God Dass Mo Importan Den All Da Odda Gods!

Isaiah 13:11

“I goin make bad kine stuff happen To da peopo all ova da world Cuz dey ony do bad kine stuff. I goin make all da peopo dat tink dey big, Pau get big head. I goin make all da ones dat make erybody sked a dem Come notting.

Isaiah 2:11

Anybody dat get real high nose, Dey goin come shame. Anybody ack real high makamaka, Dey goin come notting. Dat time, Da One In Charge da ony One Da peopo goin talk good bout.

Isaiah 24:15

Dass why you peopo dat live east side Wea da sun come up, Make shua da peopo dea show respeck fo Da One In Charge! An you guys dat live dea on top da islans, Make shua da peopo dea know wat kine god Da One In Charge, Da God fo us Israel peopo!

Jeremiah 10:10

But Da One In Charge, he da ony god dass fo real. He da God dat stay alive an stay da king foeva. Wen he come huhu, da earth shake. Da diffren peopos no can handle Wen he no like wat dey do.

Sad Song 3:38

Get bad kine tings an good kine tings dat happen, Cuz da God Dass Mo Importan Den All Da Odda Gods, tell wat goin happen.

Daniel 12:7

Da guy wit da linen kine clotheses, dat stay up da riva, put his two hands up to da sky. I hear him make one strong promise in front God dat stay live foeva. He tell, “Goin be three an a half year till dat time come. Wen da one dat make big kine trouble pau take away da powa from da peopo dat stay spesho fo God, all da stuff I wen tell you goin come pau too.”

Daniel 2:44

“Da time numba four kine govmen get powa, God Inside Da Sky goin set up anodda kine govmen. Dat govmen, no goin come wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

Daniel 4:2

“I like tell you guys bout da God Dass Mo Importan Den All Da Odda Gods, an da awesome an unreal tings he wen do fo me. I figga az good fo me tell you guys bout all da stuff he teach me.

Daniel 4:26

Inside yoa dream, somebody wen tell fo leave da stump an da roots a da tree inside da groun. Dat mean fo shua, da Mos Importan God goin let you come da king one mo time, afta you come shua dat da God In Da Sky stay in charge.

Daniel 4:3

“Real awesome, all da kine stuff he do! Da kine stuff he show me, I know he get powa! He stay da king foeva! He get da right fo stay in charge Ova all da peopo dat live today An ova all da peopo dat goin come bumbye.

Daniel 4:32

Da peopo goin make you go way from dem an make you stay wit da wild animals. You goin eat grass jalike da cows. Afta seven year pass, you goin know dat da God Dass Mo Importan Den All Da Odda Gods get da right fo tell all da govmens in da world wat dey gotta do. He can make whoeva he like come da king fo dem.”

Daniel 4:36

“Dat same time dat I wen start fo tink good one mo time. Da peopo show me plenny respeck now cuz I da king. Dey show me dat I stay importan fo dem an I come awesome one mo time. Da smart guys dat wen teach me wat fo do, an my alii guys wen go all out fo come by me. An I wen come king one mo time. I get even mo plenny powa den befo time.

Daniel 5:18

“King Belshazzar, lissen up! Da God Dass Mo Importan Den All Da Odda Gods, he wen make yoa faddah Nebukadnezzar come king. He make him come mo importan, an make peopo get respeck fo him, an make him awesome.

Daniel 5:21

Da peopo no let him stay wit dem no moa. He get da head fo tink jalike one animal. He live wit da wild donkeys, an eat grass jalike da cows. His body come wet wit da dew from da sky. Afta dat, he find out dat da God Dass Mo Importan Den All Da Odda Gods get da powa fo stay in charge a all da peopo dat come king inside da world, an he make whoeva he like come king.

Daniel 6:26

“Dis da rule: All ova da land wea I stay king, erybody gotta come sked an shaking in front Daniel God an get respeck fo him. “He da God dat stay alive. He live foeva. No mo nobody can wipe out Da peopo wea he stay da king. He goin stay in charge foeva.

Daniel 7:14

Da One Dat Stay From Befo Time give da guy Da powa fo stay in charge. He make peopo get respeck fo him An let him be dea king. All da diffren peopos From ery country an ery language Goin show dat guy love an respeck. Da powa he get fo stay in charge, He get um foeva. Dat powa goin be lidat foeva, An no mo nobody goin ovathrow him.”

Daniel 7:27

Den, da God Dass Mo Importan Den All Da Odda Gods goin give da peopo dat stay spesho fo him da powa fo come da nex king an da powa fo stay in charge a da peopo. An da God Dass Mo Importan Den All Da Odda Gods goin give his kings powa ova da odda kings all ova da world. Dey goin stay in charge foeva. All da countries on top da earth goin work fo God peopo, an all da odda peopos goin lissen dem.’

Daniel 9:14

You, oua God, dass Da One In Charge, you no wait fo drop da bad kine stuff on top us, cuz you do da right ting erytime. But still yet we no lissen you.

Jonah 1:14

Den dey yell fo help to da god Jonah pray to, Da One In Charge. Dey tell, “Eh God! You Da One In Charge! No let us guys come wipe out jus cuz we gotta kill dis guy! If he neva do one bad ting, an we kill um, try let us guys go! Cuz you Da One In Charge, an was you dat wen make all dis happen, not us guys! So no poin finga us!”

Micah 4:7

Me, Da One In Charge, I goin make Da peopo dat no can walk good Come one new nation. Da peopo da odda guys wen push away, I goin make dem come real strong. I goin be dea king dat live Mount Zion From dat time an foeva.”

Luke 1:33

He goin stay King fo da Jacob ohana, Da Israel peopo, foeva. Goin be lidat foeva.”

Luke 18:13

But da guy dat colleck tax money wen stan up far away. He no even like look up to da sky, but he beat on his ches an tell, ‘God, I one guy dat wen do bad kine stuff. Give me chance!’ ”

John 5:26

Jalike my Faddah, he can make da peopo come alive fo real kine, same ting, cuz I his Boy he give me da powa fo make um come alive too.

Rules Secon Time 32:4

God, he jalike one big stone. Wateva he do erytime stay perfeck. Eryting he do stay right. He da God dat do wat he tell he goin do. He no do notting wrong. He ony do tings dass good an right.

1 Timoty 1:17

God, he da King foeva. He no can mahke. Nobody can see him fo real kine. He da ony God. Dass why us guys like tell him we get respeck fo him, an he stay awesome foeva an eva. Dass right!

1 Timoty 6:16

He da ony One dat no can mahke. He real good, az why no can come nea him, Jalike one real strong light you no can look at. No mo nobody eva see him, An no mo nobody can see him fo real kine. You know, he da God erybody gotta get plenny respeck fo. He get all da powa foeva! Az it!

Jesus Show 10:6

Da angel guy make one strong promise fo God, dat stay alive foeva an eva, dat wen make da sky an da world, an da ocean, an eryting dat stay inside um. Da angel guy promise, “Dis stay true: God no goin wait no moa! Time awready!”

Jesus Show 11:15

Den da numba seven angel guy blow his trumpet. Had real loud voices come from da sky. Dey tell, “Now da time! God an his Spesho Guy Christ get da powa Fo take ova an be King ova all da peopos inside da world. Dey goin lead da peopo foeva an eva!”

Jesus Show 4:10

Erytime da four tings dat stay alive an go ery place God go do dat, da twenny-four older leadas go down in front God dat sit on top da throne, an show love an respeck fo him. He da One dat stay alive foeva an eva. Dey put dea crowns down in front his throne, an sing lidis:

Jesus Show 4:9

God da One dat sit on top da throne, an stay alive foeva an eva. Da four tings dat stay alive an go ery place God go, dey show respeck fo him, an tell him “Mahalo plenny!” an tell um how awesome he stay.