Amos 6:14 - Hawaii Pidgin Bible

¹⁴ But you know wat Da One In Charge tell, da God Ova All Da Armies? He tell dis: “Eh, you guys from da Israel ohana! I goin bring one army from anodda country Ova hea fo go afta you guys. Dey goin make you guys suffa plenny, an chase you all da way From Hamat Pass, north side, All da way thru da Arabah Valley, south side!”

Amos 6:14 ပူးပေါင်းရင်းမြစ်များ

1 Kings 8:65

Dass how, dat time, Solomon wen make da spesho religious kine ceremony. All da Israel peopo wen come dea togedda fo be wit Solomon, from Lebo-Hamat north side to da Egypt Borda Stream. Dey stay togedda in front oua God, Da One In Charge, seven days, den anodda seven mo days, az fourteen days in all.

2 Kings 14:25

Jeroboam Numba Two, he da one dat take back da Israel land all da way from Lebo-Hamat north side to da Arabah Lake dat dey call da Big Salt Lake, south side, jalike was befo time. Dat happen jalike wat Jonah wen tell goin happen. He Amittai boy from Gat-Hefer, dat wen talk fo Da One In Charge, da God fo da Israel peopo, befo time. Jonah wen work fo God, an he tell dat Israel goin get back dea land.

2 Kings 15:29

Wen Pekah stay king Israel side, da Assyria king Tiglat-Pileser come back attack one mo time. He take ova five town: Ijon, Abel Bet-Maakah, Janoah, Kedesh, an Hazor. He take da Gilead an Galilee lands too, an all da Naftali land, an make da peopo dea give up dea land an go Assyria side.

2 Kings 17:6

Wen Hoshea stay king fo nine year, da Assyria king take ova Samaria town, an make da Israel peopo go Assyria side fo live. He make some a dem live Halah side, some a dem by da Habor Riva dat go by Gozan, an da res inside da towns wea da Mede peopo live.

Isaiah 7:20

Dat time, you guys goin pay da king fo Assyria, fo his army come from da odda side a da Eufrates Riva fo help you guys. But wen dey show up, dey goin rip off eryting you guys get. Goin be jalike Da One In Charge stay use one razor fo cut off all da hair from on top yoa head an legs, an even yoa beard, an you goin come shame.

Ezekiel 47:20

Fo da west side borda, da Mediterranean Sea goin be da borda to one place across Lebo-Hamat on da north side. Az goin be da west borda.

Hosea 10:5

Da peopo dat live Samaria town stay bodda inside, Cuz maybe someting bad goin happen To da young cow idol kine gods in Bet-Aven town. Da Samaria peopo goin come sked, An dea pries guys fo da idol kine gods, Dey all goin stay sad bout da calf statue too. Befo time dey wen stay good inside, Cuz da idol stay awesome. But now odda peopo wen take da awesome idol one far place.

Amos 3:11

Dass why Da One In Charge a me tell dis too: “Goin get one army dat go agains you guys. Dey goin make one circle aroun dis land. Dey no goin let you guys get outa dea. No matta you guys strong, dey goin make you guys come notting. Dey goin steal eryting you get from inside all yoa palace, Dey goin clean you out!”