2 Samuel 7:13 - Hawaii Pidgin Bible

¹³ He da one goin build one temple fo show wat kine god me, an I goin make his blood line strong an solid, so da king guys dat goin come from him, goin stay king foeva.

2 Samuel 7:13 ပူးပေါင်းရင်းမြစ်များ

Start 49:10

Judah guys goin carry da spesho stick fo show peopo dey da king, Da Judah ohana goin keep dat stick foeva. Till da real owna show up Dass goin be da one Dat da odda peopos goin do wat he tell um fo do.

2 Samuel 22:51

“Me, da king dat stay work fo you, You make me win all da wars. You wen put olive oil on top my head Fo show dat you wen pick me fo come king. Dass why you goin stay tight wit me all da time, foeva Wit me, King David, An wit all da king guys dat bumbye goin come from me!”

2 Samuel 7:16

Yoa ohana goin stay solid foeva. Same ting fo da king guys in da line dat come from you. Da right you guys get fo be da king, goin stay solid foeva too.’ ”

2 Samuel 7:27

“You Da One In Charge, da God Ova All Da Armies! You da God fo da Israel peopo! You wen let me, yoa worka guy, hear all dis secret stuff. You tell me, ‘I goin make yoa ohana strong, jalike I build one house fo you.’ So I yoa worka guy, an az why I no sked fo pray lidis to you.

1 Kings 2:24

Fo shua Da One In Charge stay alive, an he da One make me strong, an make me sit down on top da same throne jalike my faddah David. An I stay shua dat he wen make me one promise dat da Kings fo da Israel peopo goin come from my blood. An cuz I stay shua bout all dat, I know, Adonijah goin mahke today!”

1 Kings 2:4

Wen you do all dat, den Da One In Charge goin make happen wat he tell bout me befo time, ‘Da king guys dat come born from yoa blood bumbye, dey gotta watch out how dey ack cuz I goin see how dey ack. If dey go all out fo do eryting wit one good heart, an wit eryting dey get inside, I know I can trus dem. Den me, Da One In Charge, I no goin wipe out yoa blood line eva. Erytime goin get one guy dat come from yoa blood line, dat goin be da King fo sit on top da throne fo da Israel peopo.’ Dass wat Da One In Charge wen tell bout me.

1 Kings 2:45

But Da One In Charge goin do good tings fo me, King Solomon. Fo shua, kings from David blood goin sit on top King David throne in front Da One In Charge, foeva.”

1 Kings 5:5

So now, I stay figga lidis: I goin build one Temple so erybody goin know wat kine god my God, Da One In Charge, da One I stay pray to. Da One In Charge wen tell my faddah King David, ‘I goin put yoa boy on top yoa throne, afta you pau be da King. Yoa boy, da one goin build da Temple so erybody goin know wat kine god me.’

1 Kings 6:12

“I like tell you someting bout dis Temple you building: If you stay live da way I tell you fo live, an do eryting da right way, an do eryting I tell you fo do, den fo you, I goin make happen da ting I wen make one promise to yoa faddah David fo do.

1 Kings 8:13

But now, I wen build Dis awesome Temple fo you, You can live inside dea, foeva!”

1 Kings 8:15

He tell da peopo: “You know Da One In Charge, da God fo us Israel peopo! We like tell, he do good tings fo us! God wen make one promise to my faddah David befo time. An now, God use his powa fo do da ting he wen promise fo do.

1 Kings 8:19

But, you know wat? You not da one goin build dat Temple. Yoa boy, yoa blood an bones, goin build da temple fo show how I stay.’

2 Kings 21:4

Manasseh build altars dea fo da odda gods, inside da Temple Fo Da One In Charge. Dis da place wea Da One In Charge wen tell, “Jerusalem goin be da place I set up, so peopo can know wat kine god me.”

2 Kings 21:7

He even take da tiki pos fo da wahine god Asherah dat he wen tell his guys fo make, an put um inside da Temple Fo Da One In Charge. Dass da place, Da One In Charge wen tell David an his boy Solomon: “Inside dis Temple an inside Jerusalem town, az da place I wen pick from all da Israel ohanas. I goin make dat place fo peopo know foeva wat kine god me.

2 Kings 8:19

But cuz Jehoram ancesta guy King David wen work fo Da Boss, Da One In Charge no like wipe out all da Judah peopo. Da One In Charge make one promise befo time, fo let guys dat come from David blood be kings foeva, jalike dey one light fo show peopo da way fo go.

1 Records 28:10

Now tink! Cuz Da One In Charge wen pick you fo build one temple dat stay spesho fo him. Come strong an do yoa job!”

2 Records 33:4

He even build altars fo odda gods inside da Temple Fo Da One In Charge, no matta Da One In Charge wen tell dis bout da Temple: “Right hea inside Jerusalem, dis goin be fo show peopo who me, foeva.”

2 Records 6:16

“You Da One In Charge, da God fo us Israel peopo. So now, I like you fo do eryting you wen promise yoa worka guy, my faddah David, fo do wen you make dis odda promise to him: ‘You erytime goin get one boy from yoa blood, fo sit on top da Israel throne—but ony if da kings dat goin come from you take kea how dey ack. Dey gotta make shua dey do eryting my Rules tell, jalike you David wen do.’

Job 36:7

God no hold back from watch Fo da peopo dat do da right kine stuff Fo proteck dem. He put dem on top thrones jalike dey kings foeva, An make dem come real importan.

Songs 72:17

I like fo peopo no foget Wat kine king him, Foeva, all da time da sun stay shine. I like fo all da nations tell, “God do good tings fo us, Cuz a dis king an his ohana!” An dey tell, “Dis king, Fo shua he stay good inside!”

Songs 89:21

Wit da powa I get I goin make him stay solid An make him stay strong.

Songs 89:29

I goin make shua Dat da peopo dat goin come From David blood line, Goin stay in charge. Goin get one a dem wit da right Fo sit on top David throne foeva, Jalike da sky stay foeva.

Songs 89:4

‘I goin make shua dat da peopo Dat goin come from you, Goin get da right fo be kings, foeva.’ ” Dass wat God wen promise. (Time out fo da music.)

Isaiah 49:8

Dis anodda message from Da One In Charge fo his worka guy: “Wen da right time come, I goin tell you wat you like know. Wen da time come Fo me get da peopo outa trouble, I goin help you an take kea you. I goin make you da one Fo show da deal I get wit my peopo, Az fo real. I goin make da land fo dem use um one mo time, Da fields wea nobody work um long time, I goin give um back to da ohanas dat own um.

Isaiah 9:6

Cuz one bebe goin born fo us guys, One boy dat God give us. Da govmen goin be his kuleana. Dis da name peopo goin give him: “Da Awesome One Dat show us da bestes tings fo do. Da God dat get all da powa. Da Faddah dat stay foeva. Da Leada dat make us come so notting bodda us.”

Isaiah 9:7

He goin come da leada Fo da govmen, An he goin make eryting come So notting bodda nobody, An fo shua he goin do dat. He goin be da king on top da throne Jalike King David, his ancesta guy. He goin judge erybody da right way, An he goin do da right ting erytime. From da time he come da king, He goin make shua he stay king foeva. All dis goin happen Cuz Da One In Charge, Da Boss Ova All Da Armies, Goin make shua dis goin happen.

Jeremiah 33:17

“Cuz dis wat Da One In Charge tell: ‘David erytime goin get one guy dat come from him an get da right fo be king fo da Israel ohana.

Ezekiel 37:25

Dey goin live on top da land I wen give my worka guy Jacob, da land wea yoa ancesta guys wen live befo time. Dem an dea kids, an dea kids kids goin live ova dea foeva, an my worka guy David goin be da leada guy fo dem foeva.

Daniel 2:44

“Da time numba four kine govmen get powa, God Inside Da Sky goin set up anodda kine govmen. Dat govmen, no goin come wipe out eva, an odda peopo no goin get um. Dey goin smash all da odda kine govmens, so dey no mo powa. An dat govmen, goin stay solid foeva.

Zekariah 6:12

“Tell him, dis wat me, Da One In Charge, Da God Ova All Da Armies, tell: ‘Hea one guy. His name, Da New Branch. He goin sprout up from da place he stay, jalike one branch sprout up from da root. He da one goin build my temple fo me, Da One In Charge.

Zekariah 6:13

He goin build da temple fo me, an he goin get respeck jalike he one king, an sit on top his throne, an lead jalike one king. He goin be one pries guy too, ova dea on top his throne. He goin do da two jobs togedda, an do um good.’

Matthew 16:18

I tell you, yoa name Peter, an dat mean ‘rock.’ On top dis rock I goin make my church. Da powa dat come from Hell fo kill peopo no goin win ova my church guys.

Hebrews 3:3

Jesus stay mo awesome den Moses. Az jalike da guy dat build one house suppose to get mo respeck den da house he build.

1 Peter 2:5

Eh, you guys, come tight wit Christ fo God use you guys too, jalike you guys da stones fo make one place fo God Spirit. An you guys stay alive fo real kine too, jalike Christ. All you guys goin be jalike pries guys dat stay spesho fo God. Jalike you guys goin give sacrifices to God, da kine sacrifices God like, cuz Jesus Christ wen mahke fo all you guys.