2 Samuel 22:3 - Hawaii Pidgin Bible

³ My God, jalike one big solid rock fo me. I go by him fo him hide me. He jalike one shield dat no let nobody hurt me. He da One make me strong, an get me outa trouble. He jalike one place on top da mountains, Da one I go to wen I run away, He da One stay get me outa trouble— Wen da peopo dat stay agains me try fo bus me up, Da One In Charge, you take kea me!

2 Samuel 22:3 ပူးပေါင်းရင်းမြစ်များ

Start 15:1

Afta Abram get Lot outa trouble, anodda ting happen. Abram see someting jalike in one dream, but he not sleeping. God, Da One In Charge, tell um dis: “No sked, Abram! I no goin let nobody hurt you. I jalike one shield fo you. I goin be yoa God An pay you plenny bumbye!”

2 Samuel 22:31

“God, he perfeck Da way he do tings. Eryting dat Da One In Charge promise fo do, You can trus he goin do um. Fo all da peopo dat trus Da One In Charge fo take kea dem, He jalike one shield dat no let um get hurt.

2 Samuel 22:47

“Da One In Charge, he stay alive fo real! An I like erybody tell how plenny good tings he wen do, Cuz he jalike one big solid rock wea I can hide! He da God dat get me outa trouble, An I like erybody tell, ‘God, he awesome!’

2 Samuel 22:49

Wen peopo come agains me, He get me outa dea. “Eh God! You even make me mo importan Den da peopo dat attack me. Wen peopo come fo bus me up, You get me outa trouble.

2 Samuel 22:51

“Me, da king dat stay work fo you, You make me win all da wars. You wen put olive oil on top my head Fo show dat you wen pick me fo come king. Dass why you goin stay tight wit me all da time, foeva Wit me, King David, An wit all da king guys dat bumbye goin come from me!”

2 Samuel 23:3

Da God fo da Israel peopo, he talk. Him, jalike one big cliff wea da Israel peopo can hide. “He tell me: ‘Anybody dat lead da peopo an do wass right, An lead um cuz he get choke respeck fo God,

Songs 14:6

Weneva da pooa peopo dat no mo powa Make plan fo do someting, You guys ony make fun a dea plan. But Da One In Charge, he goin make shua fo his peopo, Notting bad goin happen to dem.

Songs 140:1

Eh! You Da One In Charge! Help me get away From da bad kine peopo. Da guys dat like bus up peopo, No let um hurt me.

Songs 140:11

No let da ones dat talk bad Bout odda peopo get respeck Hea inside oua land. Da bad peopo dat like bus up erybody, Make bad tings come to dem, Ova an ova!

Songs 140:4

Eh! You Da One In Charge! No let da bad guys catch me! No let da guys dat like bus peopo up, Hurt me, Cuz dey make one plan fo take me down.

Songs 142:4

Try look aroun me fo see No mo nobody kea fo help me! Da place fo go wea nobody can hurt me, Gone awready! Nobody kea if I alive o mahke!

Songs 144:2

God stay tight wit me cuz I his guy, Jalike he one strong wall On top one mountain, Dat nobody can climb ova Fo come afta me. He da One make shua Notting bad happen to me, Jalike he one shield I use Fo no let nobody touch me. He da One give me da powa Ova da odda peopos.

Songs 18:2

Da One In Charge, he make shua notting bad happen to me, Jalike he one solid rock mountain an one strong wall. He jalike one big solid rock, Fo me go by him fo hide me. He real strong, Jalike he one shield dat no let nobody touch me. He jalike one big wall.

Songs 27:5

Da One In Charge, weneva get hard time, He goin put me inside his place fo nobody hurt me. He goin let me stay inside his tent Fo nobody find me. He goin put me up high on top one big rock Fo nobody reach me.

Songs 28:7

Da One In Charge, he da One make me strong, An he jalike one shield fo no mo notting hurt me. Inside I trus him. Da One In Charge wen give me powa. He wen help me, an I stay good inside. I like how awesome he stay Dass why I sing dis to him

Songs 3:3

Eh! You Da One In Charge! You, jalike one shield aroun me, Dat no let me get hurt. You da one dat make me come awesome You put me back on top my throne.

Songs 32:7

You, you jalike one place Wea I can hide from trouble. You proteck me wen get hard time. You put peopo aroun me Dat yell plenny Cuz dey stay good inside, Cuz you wen get me outa trouble. (Time out fo da music.)

Songs 46:1

God, he jalike one place Fo us guys go hide. He make us guys stay strong Fo notting bad happen. Wen get all kine trouble, God stay ready Fo help us guys plenny.

Songs 46:11

Da One In Charge, Da God Ova All Da Armies, He stay right hea wit us guys! He da God Dat oua ancesta guy Jacob Wen pray to. He da One dat make shua Nobody attack us guys! (Time out fo da music.)

Songs 46:2

Dass how come us guys no stay sked, No matta get earthquake An da mountains fall down An broke into small pieces An fall down inside da ocean.

Songs 46:7

Da One In Charge, Da God Ova All Da Armies, He stay right hea wit us guys! Him da God dat oua ancesta guy Jacob wen pray to, God one strong wall Dat no let nobody attack us guys! (Time out fo da music.)

Songs 5:12

Eh! You Da One In Charge! Dis fo shua: Anybody dat stay do da right ting, You make um so eryting go good fo dem. All aroun dem you make good tings happen Jalike you put one shield aroun dem Fo notting hurt dem.

Songs 55:9

Boss, try make da tings Dose peopo tell dey goin do Come all hamajang, Cuz all ova da big town, I see peopo Dat stay bus up each odda An fight each odda.

Songs 59:16

But me, I goin sing Bout how strong you stay. Ery morning, I goin yell to erybody Dat you da greates Cuz you stay tight wit yoa peopo! Cuz you stay jalike one high place Wea I can go hide Weneva I get real hard time.

Songs 61:3

Cuz you da one take kea a me Fo me no get hurt. You jalike one strong fort, So dat da guys dat stay agains me No can wack me.

Songs 71:7

Plenny peopo watch me, Fo dem do wat I do. Cuz you strong, An you no let nobody hurt me.

Songs 72:14

Wen odda peopo make any kine To da pooa peopo An bus um up, Dis king goin pay da price Fo make shua dey stay alive. An if somebody make dem Bleed an mahke, Da king kea plenny bout dat, Cuz dey spesho fo da king.

Songs 84:11

Cuz oua God, Da One In Charge, He show us guys wea fo go Jalike wen da sun shine. An he proteck us guys Jalike one shield. He like do plenny fo us guys, An he make us come mo awesome. Da One In Charge, He no goin hold back notting good From da peopo dat stay do wass right.

Songs 84:9

Eh God! Look da king guy, Dat proteck us guys, Jalike one shield! Try do good tings fo him, aah? Him da guy you wen pick.

Songs 86:14

Eh God! Get peopo dat tink dey get um, An dey stay attack me! Get peopo dat no like Give nobody chance, An dey come togedda Fo find me an kill me, An dey erytime ack Jalike you no mean notting!

Songs 9:10

Eh! You Da One In Charge! Da peopo dat know wat kine god you, Dey trus you, Cuz you no bag From da peopo dat aks you fo help um.

Songs 9:9

Az why Da One In Charge, he jalike one place Wea da peopo dat get plenny presha can go hide Any time dey get trouble.

Outa Egypt 15:2

Da One In Charge, he da One dat make me strong an solid, He wen come da One dat get me outa trouble. He da God fo me, an I like tell, he da greates! He stay da God fo my faddah guy too, an I goin tell, he da bestes!

Smart Guys 18:10

Wen da peopo dat stay do wass right Know fo shua, wat kine god Da One In Charge, Den Da One In Charge goin take kea dem. Jalike Da One In Charge one strong towa fo dem Wea dey can run inside fo hide.

Smart Guys 30:5

Eryting God tell, You know az true Wen you trus him fo take kea you. He jalike one shield fo you no get hurt.

Isaiah 12:2

“Fo shua, he da God get me outa trouble. I goin trus him an no stay sked. Cuz Da One In Charge, da One make me strong An give me powa. He come awready, da One get me outa trouble.”

Isaiah 32:2

Da king goin be da kine guy Dat goin be jalike one place Fo da peopo hide From da strong wind o da rain, So no can wack um. He goin help da peopo fo res, Jalike one watta ditch inside one dry place, An jalike one big rock Dat make one big shadow In da place wea no mo watta.

Isaiah 45:21

Eh, you guys dat pray to da wood kine gods! Tell me how come you do dat. Go come ova hea by me Fo us figga out wat you like tell me. So! Who wen let peopo hear all dis From befo time, long time befo time? Az was me, Da One In Charge, I da One wen tell all dis. Cuz no mo anodda god dat stay fo real, I da ony One! I da God dat do da right ting erytime, An get peopo outa trouble. No mo anodda one can do dat, ony me.

Jeremiah 16:19

Me, Jeremiah, I pray lidis: “Eh, you Da One In Charge. You da One make me strong! You give me one strong place fo hide! I can run away dea wen get trouble! All da nations all ova da world goin come by you From da mos far places inside da world. Dey goin tell, ‘Fo shua, oua ancesta guys ony get bulaia kine gods, Idol kine gods dat good fo notting. Da idol kine gods neva help dem.’

Jeremiah 16:9

Me, Da One In Charge, Da God Ova All Da Armies, an da God fo da Israel peopo, an dis wat I tell: Dis wat I goin do in front you guys wen you guys still stay alive. I da One goin make um so nobody stay good inside an like make party. No mo nobody inside dis land goin feel good an get good fun. You guys no goin hear da bride an groom an da wedding party no moa.

Luke 1:47

I feel real good inside Cuz God take good kea a me.

Luke 1:69

He give us one Guy dat get da powa Fo get us outa da bad kine stuff we stay in. Dat Guy come from King David ohana, Da king dat work fo God.

Luke 1:71

He wen promise fo take us away From da guys dat stay agains us An from da powa dey get.

Rules Secon Time 32:37

Da One In Charge goin tell his peopo, “Eh, da odda peopo gods, wea dey stay?! Dey suppose to be jalike one rock fo you guys fo go hide by dem! Now, wat happen to dem?!

Rules Secon Time 32:4

God, he jalike one big stone. Wateva he do erytime stay perfeck. Eryting he do stay right. He da God dat do wat he tell he goin do. He no do notting wrong. He ony do tings dass good an right.

Rules Secon Time 33:29

You Israel peopo can stay good inside! No mo nobody jalike you guys. Da One In Charge get you guys outa trouble. Jalike he yoa shield, He help you guys. Jalike he yoa awesome sword, He fight fo you guys. Da peopo dat stay agains you guys Goin come sked an shaking in front you guys. You guys goin walk all ova dea backs.”

Titus 3:4

But den, God wen come show us guys how plenny love an aloha he get fo us, an make good to us. He da One dat get us guys outa da bad kine stuff we stay do.

Titus 3:6

God wen sen his Spirit fo take charge a us guys to da max. He do dat cuz us Jesus guys, an Jesus da One dat get us outa da bad kine stuff.

Hebrews 2:13

An one mo time, anodda place in da Bible, Jesus tell dis: “I goin trus God erytime.” An anodda place, he tell dis one mo time: “Look! Dis me! An dese guys, dey God kids! God wen give dem to me!”

1 Samuel 2:1

Den Hannah pray lidis: “Da One In Charge make me feel real good inside. Cuz a all da stuff he wen do, az why I stay feel lidat now! An now I real strong so I no need worry notting. An I no shame fo face da peopo dat stay agains me an talk big agains dem. Cuz you da One dat get me outa trouble, I stay good inside!

1 Samuel 2:2

“No mo anodda god dat mo awesome an spesho den you, Da One In Charge! You da One, da ony One! You oua God, an you stay solid, jalike da bigges rock! No mo any odda god dat stay solid jalike you!