2 Kings 17:8 - Hawaii Pidgin Bible

⁸ Da One In Charge wen throw out da diffren peopos from da land befo time, fo da Israel peopo come take ova um. But still yet, dey come jalike dose odda peopos an ack jalike dem. Dey even do da kine tings dat da Israel kings do too.

2 Kings 17:8 ပူးပေါင်းရင်းမြစ်များ

1 Kings 12:28

So King Jeroboam aks his helpa guys wat fo do. Den he tell his worka guys, “Make two idol kine gods outa gold, da kine dat look jalike bebe cows.” Den he tell da peopo, “Eh, az too hard fo you guys go all da way Jerusalem side fo make sacrifice! Look now! Right hea, da gods fo you Israel peopo! Dis, da ones wen bring you guys hea from da Egypt land!”

1 Kings 21:26

Ahab wen go do real pilau kine stuff, cuz he go all out fo da idol kine gods, jalike da Amor peopo wen do. Az why Da One In Charge wen throw dem outa da land wen da Israel peopo come dea.)

2 Kings 16:10

Den King Ahaz go Damascus fo meet Tiglat-Pileser da Assyria king. He see one altar dat get ova dea, an sen Uriah da pries guy one picha a da altar, an eryting bout how Uriah can make um.

2 Kings 16:3

Ahaz make jalike da Israel kings. He even burn up his boy fo make one sacrifice fo da god Molek, jalike da pilau kine stuff da odda peopos stay do, da ones dat Da One In Charge wen throw outa da land in front da Israel peopo wen dey come dea from Egypt.

2 Kings 17:19

But even da Judah ohana neva do da tings dea God, Da One In Charge, tell um fo do. Dey do da same bad kine stuff dat da Israel peopo wen show dem.

2 Kings 17:40

But da peopo still no like lissen. Dey still stay do all da kine ting dey wen do da place dey wen live befo time.

2 Kings 21:2

Da way Da One In Charge see um, Manasseh stay do bad kine stuff. He stay follow da pilau kine stuff dat da odda peopos do fo dea gods. Dose peopos, dey da ones dat befo time Da One In Charge wen kick um outa da land in front da Israel peopo, so da Israel peopo can take ova dat land.

Songs 106:35

Dey marry an come hapa wit da peopos dat stay dea, An learn how fo do Da kine stuff dat dose peopo stay do.

Outa Egypt 23:24

You betta not go down in front dea gods fo pray to dem, an you betta not let dose peopo make you do stuff fo dea gods, da way dey make. You gotta broke up dea idol gods, an smash da big stones dat dey set up fo dem pray in front.

Jeremiah 10:2

Dis da message from Da One In Charge. Dis wat he tell: “No go learn how fo do stuff Da way da odda peopos do um. Dose peopos come all sked Wen dey see da star pichas inside da sky, But you guys, no let dat kine stuff make you guys sked.

Ezekiel 5:6

But da Jerusalem peopo, dey go agains my rules an do mo bad kine stuff den da peopos dat donno me. Dey go agains wat I tell um dey gotta do, even mo den da odda countries nex to dem. Cuz dey tell laytas to my rules, an dey no ack da way dey suppose to ack, jalike how I tell um fo ack.

Hosea 5:11

Da Efraim peopo goin get plenny presha. Jalike I walk all ova dem wen I judge um. Dey make up dea mind fo do wat da idol kine gods tell um fo do.

Prieses 18:3

You guys, no make jalike da peopo do ova dea Egypt side, da place you guys live befo time. An you guys no make jalike da peopo do Canaan side, da place I goin bring you guys. No do tings like dem.

Prieses 26:1

“No make da kine no good idol kine gods fo you. No put up idol statues o big kine stones dat odda peopos put up fo dem pray in front. An no put up one stone you cut fo make someting inside yoa land, fo you go down in front um. Cuz I yoa God, me, Da One In Charge.

Micah 6:16

But still yet you guys do Wat da rules from King Omri tell you fo do. An you copy eryting Omri boy King Ahab an his ohana stay do. You guys follow eryting dey tell you az good fo you do. Az why I goin let you guys come all bus up. So den, da odda peopos goin tell, “Bummahs!” Wen dey tink bout you guys. Da odda peopos goin laugh an make fun a you guys.’ ”

Rules Secon Time 18:9

Wen you guys go inside da land dat yoa God, Da One In Charge, stay give you guys, no do da kine pilau stuff dat da peopos dat live ova dea do, cuz Da One In Charge hate dat.