2 Kings 17:4 - Hawaii Pidgin Bible

⁴ But layta, da Assyria king find out dat Hoshea make one plan wit some odda guys fo bulai him. He know az one bulai, cuz he find out Hoshea wen sen messenja guys fo make one deal wit King So, Egypt side. Ery year befo dat, Hoshea wen pay da Assyria king. But dis year, he no pay um no moa. Cuz a dat, Shalmaneser grab Hoshea an put him in prison.

2 Kings 17:4 ပူးပေါင်းရင်းမြစ်များ

2 Kings 17:3

Shalmaneser, da Assyria king dat time, wen come wit his army guys fo attack Hoshea. Az how Hoshea come one small kine king unda Shalmaneser, an ery year, Hoshea gotta pay Shalmaneser plenny.

2 Kings 17:5

Den da Assyria king go attack da whole Israel land. He put his army guys all aroun Samaria town, an no let nobody go inside o come outside fo three year.

2 Kings 18:21

Wise up! You stay trus da Egypt king, but no can trus him. Da Egypt guys, jalike one small splinta from one bamboo dat get smash, dat poke yoa hand an make you sore if you lean on top um! Az how plenny Pharaoh, da Egypt king, goin help all you guys dat trus him!

2 Kings 24:1

Da time Jehoiakim stay king, Nebukadnezzar da Babylon king attack da Judah land. He take ova da land, an from den, Jehoiakim gotta do wateva Nebukadnezzar tell um fo do. But afta three year, Jehoiakim change his mind, an go fight Nebukadnezzar.

2 Kings 24:20

Cuz wat Jehoiakim do make Da One In Charge stay huhu. Az why all dat kine stuff happen inside Jerusalem an Judah. In da end, Da One In Charge wen kick out all da Jerusalem an Judah peopo, so dey no can show face in front him fo pray. Den, Zedekiah make war agains da Babylon king.

2 Kings 25:7

Da firs ting dey do, dey make Zedekiah watch wen dey kill his boys. Den one a dem poke out Zedekiah eyes. Dey tie him wit two bronze leg chain, an take him Babylon side.

2 Records 32:11

Hezekiah make you guys tink lidis, ‘Wen da Assyria king come afta us guys, oua God, dass Da One In Charge a us, goin get us outa trouble from him!’ But Hezekiah ony bulai you guys. He goin make you guys mahke from stay hungry an thirsty.

Hosea 10:4

Dey make plenny fake promise Dat no mean notting! Dey make plenny deal, But dey no do wat dey wen promise fo do. Az why dey stay take each odda in front da judge. Dey jalike da poison weeds Dat grow inside one field dat somebody wen plow.

Hosea 12:2

Da One In Charge goin poin finga da Judah ohana leada guys. He goin punish da Jacob peopo fo da kine stuff dey do. He goin pay dem back fo wat dey wen do.

Hosea 13:10

So! Wea yoa king, aah?! He suppose to get you outa trouble, aah?! Wea yoa leada guys in all yoa towns?! Da ones you guys wen tell bout, ‘Give us one king an leada guys!’

Hosea 8:10

No matta dey sell dea body to odda peopos, Now I goin bring dem back togedda Fo punish dem. Dey goin start fo come weak Cuz one strong king an his leada guys Goin put presha on dem.

Rules Secon Time 28:36

“Da One In Charge goin make you an da king you wen put ova you go by anodda nation dat you guys an yoa ancestas neva know befo time. Ova dea, you guys goin go down in front odda gods dat peopo make from wood an stone.