1 John 5:20 - Hawaii Pidgin Bible

²⁰ We know dat God Boy wen come an help us guys fo undastan. Az how we know da real God. Us guys stay tight wit da One dass da real God—wit God Boy Jesus, da Spesho Guy God Wen Sen. Dass da real God, an dass da real kine life dat goin stay to da max foeva!

1 John 5:20 ပူးပေါင်းရင်းမြစ်များ

Isaiah 44:6

Lissen up! Dis one spesho message from Da One In Charge! He da King fo da Israel peopo! He pay da price fo get dem outa trouble! He Da One In Charge, Da God Ova All Da Armies! Dis wat he tell: “Me, I da firs One, An I goin be da las One. No mo anodda God afta dat, ony me.

Isaiah 54:5

Az cuz fo my peopo, You jalike da wahine dat get husban now— Cuz jalike I yoa husban, Da One wen make you! Me, Da One In Charge, Da God Ova All Da Armies, Dass my name! I da One dat pay da price Fo get you outa trouble, I Da Good An Spesho God Fo da Israel peopo! Da God Fo Da Whole World, Dass wat dey call me!

Isaiah 9:6

Cuz one bebe goin born fo us guys, One boy dat God give us. Da govmen goin be his kuleana. Dis da name peopo goin give him: “Da Awesome One Dat show us da bestes tings fo do. Da God dat get all da powa. Da Faddah dat stay foeva. Da Leada dat make us come so notting bodda us.”

Jeremiah 10:10

But Da One In Charge, he da ony god dass fo real. He da God dat stay alive an stay da king foeva. Wen he come huhu, da earth shake. Da diffren peopos no can handle Wen he no like wat dey do.

Jeremiah 23:6

Wen he da king, da Judah peopo goin get outa trouble, An da Israel peopo goin know fo shua eryting stay okay. Dey all goin give dea king one name dat mean, ‘Da One In Charge, da one dat do right fo us guys erytime.’ ”

Matthew 13:11

He tell, “God let you guys know all da stuff bout how he stay king in da sky. But da odda guys, he no let dem know all dat kine stuff.

Luke 21:15

Cuz I goin give you guys wat fo tell, an I goin make you guys know wat fo do erytime, so da guys dat stan up agains you no goin know wat fo tell, an dey no goin show proof dat you guys wen do wrong.

Luke 24:45

Den he help dem undastan da Bible.

John 1:18

No mo nobody wen see God fo real kine. But ony dat Guy wen see um. No mo anodda guy jalike him cuz he God too. No mo nobody stay mo tight wit his Faddah den him. He da One dat wen show how God stay.

John 10:30

Me an my Faddah, we stay one.”

John 14:20

Wen I come back alive, you guys goin know fo shua dat I stay tight wit my Faddah, an you guys stay tight wit me, an I stay tight wit you guys.

John 14:23

Jesus tell um, “Whoeva get love an aloha fo me, dey goin do wat I tell um fo do. My Faddah goin get love an aloha fo dem too. Den me an my Faddah goin go by dem, an jalike we goin make house wit dem togedda.

John 14:6

Jesus tell um, “No mo anodda guy can bring peopo to da Faddah, ony me. I bring peopo to um, jalike I da road. I da guy dat get da trut. I da guy dat make da peopo come alive fo real kine.

John 14:9

Jesus tell him, “I stay wit you guys long time, an you still yet donno who me, Philip? Whoeva see me, dey see my Faddah. So how come you tell, ‘Show us yoa Faddah’?

John 15:4

Go stay tight wit me, jalike I stay tight wit you guys. Da branch no can make fruit if no stay tight wit da vine. Same ting, you guys no can do notting if you guys no stay tight wit me.

John 17:14

I tell dem wat you wen tell. Da peopo hea inside dis world hate my peopo. Az cuz my peopo no do same same jalike da odda peopo inside dis world do. An me too, I no do same same ting dey do.

John 17:25

Faddah, you erytime do da right ting. But da peopo hea inside da world donno you. I know you, an my peopo, dey know dat you da One wen sen me hea.

John 17:3

Dis wat da kine life mean dat stay fo real kine foeva: dat da peopo dat get dat kine life know you, da ony God dass fo real, an dat dey know me too, Jesus Christ, da Spesho Guy You Wen Sen.

John 20:28

Thomas tell Jesus, “You, you Da One In Charge a me! You my God!”

John 8:42

Jesus tell dem, “If God was you guys faddah, den you guys wen get love an aloha fo me, cuz I come from God, an now I stay hea. I no come hea jus fo me. I wen come hea cuz God wen sen me hea.

Jesus Guys 20:28

Make shua you leada guys live da way God like you fo live. An take kea all da peopo dat da Good An Spesho Spirit give you guys fo take kea. You guys gotta take kea da church guys jalike one sheep guy take kea his sheeps. Cuz Da One In Charge, Jesus, wen bleed an mahke fo make dem come God kids.

Rome 9:5

Da Jew guys wen come from oua main ancesta guys Abraham, Isaac, an Jacob (dass da guy God call Israel, you know). An Christ, da Spesho Guy God Wen Sen, he wen born from da same ancesta guys too. He da One az God, an he da One dat stay in charge a eryting, da One erybody can talk good bout foeva! Dass him!

1 Corint 1:30

You guys know how come you stay tight wit Jesus Christ? Az cuz God like um fo be lidat, dass why! God, he make Jesus da One fo make us guys know wat fo do erytime. An Jesus make us get um right wit God, an stay spesho fo God, an hemo us guys from da powa da bad kine stuff wen get ova us!

2 Corint 4:6

God wen tell, “From da dark place, I like da light fo shine,” an he make his light shine inside us guys! Wen we look at Christ face, az jalike God give us da light fo undastan how awesome God stay.

2 Corint 5:17

Dass why, whoeva stay tight wit Christ, dey one new guy. Da ol tings no stay no moa! Look! Da new tings stay come!

Efesus 3:18

Den you guys togedda wit all da peopo dat stay spesho fo God goin get da powa fo undastan how plenny love an aloha Christ get fo erybody erytime. Dis love an aloha no goin come pau eva! Az jalike how da love an aloha stay real wide an long an high an deep.

Philippi 3:9

I like erybody know dat I stay tight wit Christ. I do wat da Rules From God tell me fo do, but dat no make me get um right wit God. I get um right wit Christ cuz I trus him! Az why wen I trus him, God da One dat make me get um right wit him.

1 Timoty 3:16

We all tell dis: Da stuff bout God, dat befo time was secret, dass importan fo real kine. Christ wen come, Wit one body jalike us. God Spirit wen show proof dat Christ stay right. Da angel guys from God wen see him. His guys wen teach Da diffren peopos all ova da world bout him. Get peopo inside da world dat trus him. God wen take him back To da awesome place inside da sky.

Titus 2:13

Same time us guys stay good inside cuz we wait an trus dat Da One In Charge a us guys, Jesus Christ, goin come back. Goin be awesome! Jesus, he wen take us outa da bad kine stuff we stay do. He God, you know, an he get powa ova eryting!

Hebrews 1:8

But God talk to his Boy lidis: “My Boy, you God. You goin stay king foeva. Da spesho stick you carry fo show dat you da King, Dat mean you da King dat erytime do da right ting.

1 John 2:23

Da peopo dat no lissen God Boy, God not dea Faddah. But da peopo dat tell dat Jesus da Spesho Guy God Wen Sen, God dea Faddah!

1 John 2:24

Make shua you guys stick wit wat you guys wen hear from da time you wen start fo trus Christ. If you guys stick wit dat, den you goin stay tight wit God da Faddah an wit his Boy too.

1 John 2:6

Whoeva tell dey stay tight wit God, dey gotta live jalike Jesus wen live!

1 John 4:14

Me an da odda peopo wen see God Boy, an us stay tell erybody da trut: dat da Faddah wen sen him fo get da peopo inside dis world outa da bad kine stuff dey stay do.

1 John 4:16

Us know dat God get love an aloha fo us guys, an us trus him. Da way God stay, he erytime get love an aloha fo erybody. Whoeva live wit love an aloha, dey stay tight wit God an God stay tight wit dem.

1 John 4:2

Dis how you know da Spirit dat come from God. Wen get somebody dat tell Jesus Christ wen come one real guy jalike us, dass da guy wit da Spirit dat come from God!

1 John 5:1

Whoeva stay shua dat Jesus da Spesho Guy God Wen Sen, dey God kids. Erybody dat get love an aloha fo one faddah get love an aloha fo da ones dat come from him too.

1 John 5:15

An if we know dat he stay lissen fo wateva we tell him we need, den we know dat we goin get da tings we wen tell him fo do.

1 John 5:18

Fo shua all da ones dat stay God kids no do bad kine stuff, cuz God Boy take kea dem, an da Bad Guy, da Devil, no can hurt dem.

1 John 5:5

Da guy dat stay shua dat Jesus God Boy, az da ony guy dat can stan up agains da bad kine stuff inside da world, an win.

Jesus Show 15:3

Dey stay sing jalike Moses, da guy dat wen work fo God, an jalike God Bebe Sheep Guy. Dey sing: “God, you Da One In Charge! You Da God Dat Get All Da Powa. You do big an awesome stuff. You erytime do wass right an wass true. You da King fo all da diffren peopos foeva an eva!

Jesus Show 19:11

Den, jalike one dream, I see da sky open up, an dea in front me get one white horse wit one guy on top him. Dey call dat guy Da One Dat Do Wat He Tell He Goin Do an Da One Dat Tell Da Trut. He erytime do wass right, wen he make jalike one Judge, an wen he lead one army fo fight one war.

Jesus Show 3:14

Den da One I wen see tell me, “Da messenja guy I wen sen fo help da peopo dat come togedda fo church Laodicea side, write one letta to him, an tell um dis: “Da One dat stay true, he tell eryting jalike happen fo you trus wat he tell. He da one wen start eryting dat God make inside da world. Dis wat he tell:

Jesus Show 3:7

Den da One I wen see tell me, “Da messenja guy I wen sen fo help da peopo dat come togedda fo church Philadelphia side, write one letta to him, an tell um dis: “Da One dat live ony fo God, you can trus him erytime fo tell da trut. He da One dat get da right fo be da King jalike King David. Dass jalike he get King David key. Wen he take da key an open da door, no mo nobody can shut um. Wen he take da key an shut da door, no mo nobody can open um. Dis wat he tell:

Jesus Show 6:10

Da peopo spirits talk loud, an tell, “Eh, you Da One In Charge! You get all da powa! You spesho, an you tell da trut! How long mo we gotta wait till you come fo judge all da peopo hea on top da earth an punish dem? Cuz dey wen kill all us guys!”