1 Corint 10:13 - Hawaii Pidgin Bible

¹³ Wen you guys get chance fo do da bad kine stuff, dass da same ting, jalike wat happen to all da odda peopo. But you know, you guys can trus God fo do wat he tell he goin do. He no goin let you guys get mo plenny presha den you guys can handle. Erytime get presha lidat, God goin make um fo you guys get outa dat. He goin make you guys strong fo handle da presha fo you no fall down.

1 Corint 10:13 ပူးပေါင်းရင်းမြစ်များ

Songs 124:7

Us guys stay alive still yet, Jalike one bird dat get outa one trap! Jalike da bird catcha guys Put up da trap, But now, da trap broke An we outa dea!

Songs 125:3

Bumbye, maybe one bad kine king Take ova da land Wea da peopo live Dat stay do wass right. But dat kine king No goin stay king long time. Cuz if he stay da king, Maybe da good guys like do Bad kine stuff Fo ovathrow da bad king.

Songs 36:5

Eh! You Da One In Charge! You get one good heart Fo help yoa peopo, You get one big heart, Big jalike da sky! You da kine God us guys can trus plenny, Jalike get plenny clouds inside da sky!

Songs 89:33

But still yet, I goin stay tight Wit David all da time. I no goin bulai him fo make um So he no can trus me.

Outa Egypt 3:17

An now, I tell you guys dis: You guys, you get plenny presha right now Egypt side. But I goin get you guys outa all dat. I goin bring you guys anodda land, da one wea get da Canaan peopo, da Het peopo, da Amor peopo, da Periz peopo, da Hiv peopo, an da Jebus peopo. Inside dat good land, ery place get plenny milk an honey.” ’

Isaiah 11:5

He goin stay ready fo make war agains da bad kine stuff peopo do. He goin be strong, cuz he do da right tings erytime, An you can trus him erytime.

Isaiah 25:1

Da One In Charge, you my God! I goin tell dat you da greates, I goin tell peopo I know wat good kine god you! Cuz you wen do awesome kine tings Wen you make one plan from long time befo, An us guys can trus you fo dat, An we know you tell da trut.

Isaiah 49:7

Dis anodda spesho message from Da One In Charge. (He da One dat pay da price Fo get da Israel peopo outa trouble. He da Good An Spesho One fo da Israel peopo.) Dis message, fo da one Dat da peopo tink he no good inside, Da one dat all ova da country, Da peopo hate um, Da one dey figga ony one slave Dat work fo da leada guys. Dis wat Da One In Charge tell dat guy dat work fo him: “Wen da king guys see you, Dey goin stan up fo show you respeck! Wen da prince guys see you, Dey goin go down in front you Fo show you respeck! An all dat goin happen cuz a me, Da One In Charge. I da One you can trus. I da Spesho One fo da Israel peopo. An I wen pick you!”

Jeremiah 12:5

Da One In Charge tell, “If you wen run one race agains odda guys, An dey make you come tired, How you goin run agains horses?! No way! If you stay shua you can handle ony wea da land stay safe, How you goin walk thru da thick bushes by da Jordan Riva?! No can!

Jeremiah 29:11

Cuz me, I know da plans dat I stay make fo you guys. I goin make eryting come good fo you guys, an not bad. I goin make good kine stuff happen to you guys bumbye, da good kine stuff you stay wait fo.” Dass da message from Da One In Charge!

Sad Song 3:23

Ery morning yoa love an pity come new. Us guys can trus you big time!

Daniel 3:17

If yoa guys throw us guys inside da real hot fire, da God we work fo can get us outa dea, an he goin get us guys outa yoa powa, King Nebukadnezzar.

Hosea 2:20

I goin marry you an you goin trus me. An you goin know who me fo shua, Da One In Charge.”

Matthew 6:13

Show us guys how fo no do bad kine stuff Wen somebody give us chance fo do um, But get us outa trouble from da Bad Guy. [Cuz you oua King, You get da real powa, An you stay awesome foeva. Dass it!]’ ”

Luke 11:4

Let us go, an hemo oua shame Fo all da bad kine stuff we do to you, Jalike us guys let da odda guy go, An us no stay huhu wit dem Fo da bad kine stuff dey do to us. Show us how fo no do bad kine stuff Wen somebody give us chance fo do um.’ ”

Luke 16:26

You know, in da middo get one real big ditch. You stay on one side, an us guys stay on da odda side. Da peopo dat like go from ova hea to you no can, an da peopo dat like go from ova dea to ova hea no can too.’

Luke 22:46

He tell dem, “How come you guys stay sleeping? Get up an tell God fo help you guys no do bad kine stuff wen get chance.”

Jesus Guys 27:44

He tell da odda guys fo hang on da boards o da pieces from da boat. Az how all da guys come to da land, an nobody mahke.

1 Corint 1:9

God, he da One dat tell you guys fo come tight wit his Boy Jesus Christ, Da One In Charge a us guys. You guys can trus God erytime fo do wat he tell he goin do.

2 Corint 1:10

Wen we almos mahke, he wen take us outa da bad kine stuff dat wen happen to us guys. An he goin take us outa da bad kine stuff nex time too. We still stay shua he goin take us outa da bad kine stuff ova an ova.

Rules Secon Time 7:9

Az why you guys gotta know dat yoa God, Da One In Charge, he da God dass fo real! He da God you can trus um fo do wat he tell he goin do. He make good da deal he wen make, an he stay tight wit da peopo dat get love an aloha fo him an do wat he tell dem fo do fo mo den tousan generation.

1 Tessalonika 5:24

You can trus God cuz he da One dat stay tell you guys “Go come! Be my guys!” an he goin make um happen.

2 Tessalonika 3:3

But Da One In Charge, we trus him. He goin make you guys come mo strong an solid inside, an he no goin let nobody hurt you.

2 Timoty 4:18

Erytime peopo like do bad kine stuff to me, Da One In Charge goin make shua dat notting bad happen to me. He goin take me outa all dat, an take me to da sky, wea he da King. I like erybody tell how awesome he stay, an I like fo dem tell dat foeva an eva! Az right!

Hebrews 10:23

We stay shua dat God goin do good kine stuff fo us bumbye. So us guys goin go all out an no make jalike we not shua bout wat we tell goin happen. Cuz God da One dat wen make one promise dat he goin do good kine stuff fo us, an he erytime do wat he tell he goin do.

Hebrews 11:11

Sarah, Abraham wife, she wen trus God too. Dass how she get da powa fo start one ohana, no matta she no can come hapai cuz she too ol. God wen make one promise to her dat she goin born one kid, an she trus God dat he erytime do wat he tell he goin do.

Hebrews 12:4

Eh! Wen you guys fight fo no do da bad kine stuff, you neva bleed an mahke.

Hebrews 6:18

Wen God do dat, he do two tings dat no goin change eva. Numba One, he make one strong promise dat fo shua he goin do good tings fo us guys. Numba Two, he get da blame if he no do good tings fo us guys. An God no bulai nobody. He make dat promise cuz he like give us guys plenny good kine words. Dass fo us guys dat stay run to God fo get outa da bad kine stuff, fo us get da good kine stuff God wen promise he goin give us bumbye. We know he goin do dat, an we goin stay wait fo um.

1 Peter 4:19

Wen God peopo suffa, an dey handle um da way he like um fo handle, dey can trus God fo take kea dem. He wen make dem, an he do wat he tell he goin do erytime. An dey still yet goin do good kine stuff, jalike befo time.

2 Peter 2:9

All dis stuff show dat Da One In Charge know how fo get peopo outa trouble wen dey lissen him. Same time, he know how fo make da peopo suffa dat no like do wass right, till dey gotta stan in front God da Judge.

1 John 1:9

But if us tell God we sorry fo all da bad tings we wen do, we can trus God. An he goin do wat he tell he goin do: da right ting. God goin hemo oua shame, an wash us clean inside from all da stuff we do dass not right.

Jesus Show 19:11

Den, jalike one dream, I see da sky open up, an dea in front me get one white horse wit one guy on top him. Dey call dat guy Da One Dat Do Wat He Tell He Goin Do an Da One Dat Tell Da Trut. He erytime do wass right, wen he make jalike one Judge, an wen he lead one army fo fight one war.

Jesus Show 2:10

No sked da stuff you guys goin suffa. You know, da Devil goin set up some a you guys fo go prison, fo try make you guys give up, an you guys goin suffa dea ten days. Hang in dea an trus God, even if dey kill you guys. Cuz I goin give you guys da winna prize—da kine life dass fo real!’

Jesus Show 3:10

You guys wen do wat I tell you fo do, an hang in dea an no give up. Az why I goin take kea you guys wen da big presha come, da kine presha dass goin come on top da whole world fo check out erybody dat stay down hea.’

1 Samuel 29:10

So, morning time, get up early, you an da odda guys. Befo time dey wen work fo yoa boss Saul too, an now dey come wit you. Go back wen get light to da town I wen give you guys.”