Hibru 10:1 - Hano Niu Testamen

¹ Silo be God nu laia lalai Moses, kea vorate nun tavuha huri mwasin ginau be ram dogo, i ran hav melmelo te tavuha kun mwasin ginau mwasigi be rav mai. God vataha taulu ira tataroi ram lol tataroi la hala gaituvwa n̄ano be rav lai lua vuron atatu. Take la hala geki silo geki si hav lol te dum atatu be ram mai aben God be rai vavtutu.

Hibru 10:1 ပူးပေါင်းရင်းမြစ်များ

Ravrava non Pol lalai ata Rom 8:3

Silo gea roron̄ona sigai, huribe silo gea mwa loliana mwa mamara gin vuroda siboda. Ta God mwa lol hano gabe silo si hav lol te dumwia. Nu hora nituna vai lol ureure mai rahuana n̄ano kun gida, ke atatu rituai ram lol rahu gi tanon vuro. Mwa hora nituna kun gabe tataroi tuntun be men vol vuroda, God mwa lol rahun atatu be men lol kaburai vuro.

Kolosi 2:17

Ginau kerageki ran kun gabe nunuan ginau vwate be vi mai. Take ginau be nu mwasigi i nu vavtutu nu mai kea Kraes n̄ano.

Hibru 10:22

I huri ginau geki nu tavuha be tam mai sosori aben God be binihinda vi melmelo i nonda binihimwasigi garagusi ran wasi. Amua binihinda ran bibili gin vuroda, mwa melmelo be tam ḡagaru lol wai melmelo.

Hibru 7:11

God mwa lai non silo lalai ata Israel huria be varan lalaḡo be mwa mwalue nin varan Livae mwa du huba be men lalaḡo hurin alen̄ana. Take ira tataroi kera gea ran hav dadariha tehe be rav lol atatu rav vavtutu lolmatan God. Haḡe bwatuna be ira tataroi kera gea ran hav dadariha tehe, mwa du be lalaḡo vwate vi mom mai be nu hav ḡun te Eron n̄ano, take kun Melkisidek.

Hibru 8:5

Rovoga gabe ira tataroi ran lolia, kun gabe nunun ginau gabe ram loli lol ute amare. Geki mwasigi huri be tuai God nu vevea lalai Moses be vi haḡo Imwa Haohao gea gi tanon tataroi nu vevea be “Gov gita ḡoro tavuhainia be gomen lol ginau duluai kera geki, hurin halana duluai be nan vev seserainia lalainigo, amare la vusi.”

Hibru 9:11

Imwa haohao sabuga gea be mwa dogo alolona nu liu nin ata amua. Imwa gea atatu ram hav lolia tehe, nu hav vorate ginau non ureure be God nu lolia.

Hibru 9:23

Ginau kera geki be ira tataroi tuai ran haḡoe be ramen gogonai alen̄a ran ḡun nunun ginau be ram du lol ute atamare. Mwa du maragai be daga vi rovo ba lolira be ramen melmelo. Take ira raumatan ginau be ram du lol ute atamare mwa du be vora dagan ginau vwate be nu tavuha liu be vi rovo be men lolira ramen melmelo.

Hibru 9:25

Muai tataroi tuai nu hae lol Ute Sabuga Liu vatuvwa lol taul gaituvwa mai dagan ginau rahu. Take Kraes nu hav hae tehe vaivusi be men lin̄ rahuna lalai God.